¹ Tinyia ojo Lahitokdiho Moses, ² "Tode lanyumu nan Bezalel kito lo Uri lotata lo Hur lo imanit lo Juda. ³ Manyu latifut nan inyi to Okorif lo Lobanga, kilefere, yenun, genyun ko kigingi gelegele fad ⁴ lo kikukuma sangite kuna idwaruha kuna litibibiluno iyo dahab, rial ko mwala ⁵ lo nguto ko tedo morutok, lo gata keyek ko fihahino tau lo kitiyo sangite kulo dwarujon fad. ⁶ To angati manyu ladumu nan Oholiab kito lo Ahisamak lo imanit lo Dan lo lwaha inyi. Manyu lacio nan kirunga diho katiyok kagingak fad lo kikukuma sangite fad kuna lacik nan diho isi: ⁷ Kema lo kirico, sanduk lo cik ko kitongi lo kisa kai nenge ko sangite kulo katua lo kema fad; ⁸ meja ko sangite kunenge fad, lomo lo dahab na ilihinya ko sangite kunenge fad, ciali lo iheru, ⁹ ciali lo cura kiciorita ko sangite kunenge fad, besen ko kitiwoitita nenge. ¹⁰ Ko kyelani kuna litibibili, kyelani kuna inyuji kulo Aaron kadwarani ko kyelani kulo tee kunenge kalirwaati diho nan ara kadwarak ¹¹ ko ngoroni kitweita ko iheru na iur kulo faji na Inyu. Ojir icieng ikukum iya idi lacihare nan isi." ¹² Tinyia ojo Lahitokdiho Moses, ¹³ "Torihohi cio kulo Israel tijo, ' Ojir ite iric sabit nitole. Ara cia ene kitotori kiji nei ko ite to kofiang fad kuna lofwonuno, ojir ite iyenare ijo nan Lahitokna lahitinyujo ite. ¹⁴ Itoric sabit tonyio ara far na Inyu diho ite. Tungani na licome ojir ifadari. Cio kuna litiyo lobo tic to la far ojir odumari to kiji lo cio kuneicieng. ¹⁵ To faritin ile ojir itiyoti ticitici, ati far lo mietare itongo ara far lo kiyoma lo sabit na Inyu diho Lahitok. Tungani na litii lobo tic to sabit ojir ifadari. ¹⁶ Ojir cio kulo Israel oric far lo sabit, ikwerati inyi to kofiang kuna lofwonuno ara ciharu na losio tur. ¹⁷ Ara cia kitotori kiji nei ko cio kulo Israel tur, tonyio to faritin ile ofik Lahitokkai ko kof ojo far lo mietare iyoma inyi.'" ¹⁸ Kolokeru Lahitoktenya ko Moses to kai lo donge lo Sinai, icio inyi morutok kuna ikedeveti are kuna ligero cik. Morutok kuna ikedeveti kuna lokorodohi kafiele lo Lobanga kigero cihicihi.