¹ Ojo Lahitok diho Moses ko Aaron to kof lo Ijipt, ² "Ingohi ene ofa tara diho ite ofa lo lobito, ofa lo lobito lo kari ningi. ³ Torihohi tuban lo cio kulo Israel jimitan to far lo tomon lone ofa ojir tungani lobito lobito onyumu kilelo to kaji nenge lobito to kaji lobito lobito. ⁴ Kalisidi lobo kaji ida otum keruno kilelo ingohi tongari ko loryehat neicieng na inyiha noo, langun loyeniti borengun lo cio kuna longoni. Ojir ite itutum borengun lo cio ko tyang na lotum tungani lobito lobito konya. ⁵ Ingohi kuna sang linyumuno ite tara mongi kulo kera kode korecio kuna lara kari lobito manyu onyuji oru lobo lofunyia, lokamalahanyang kode lohabohoi. ⁶ Itoric kuna kirieho many far lo tomon ko ongon lo ene ofa, far na longotore cio kulo Israel to tuban icieng kurou langun lodoyoro kolong. ⁷ Ojir icieng itaru lobo okoto otwehini kai ko angatihin kulo bauhin kulo agwalahin kulo kajihit kuna lokonyare icieng kuna kirieho. ⁸ Na karue bito ojir icieng okony tyang na lofejo to kima ko cianitok kuna idwari ko mugati kuna lofuni oru ibula. ⁹ Kekony na tyang owar kode oyeri to kifi ati itofej ara fejo to kima fad ko kue, meselek ko sangite kulo kocehe. ¹⁰ Ketitongohi lobo many owang kof. Kolotong lobo ko kiwanyi, ojir icure. ¹¹ Koditi na ngidahare ite inyi ene: ko kyelani otorahino komoci to gasi, kamuha kejuha, ko iluhi kuningi kac. Itoruk daha nenge; Ara daha lo rangaru lo Lahitok. ¹² Iyo na karue bito arang cia nan ara kof lo Ijipt afade tee okangi fad kulo cio ko kulo sang, manyu ayauno cia nan ngoto lo tenya iyo lobangahin kulo Ijipt fad. Nan Lahitok. ¹³ Itongo cia okoto ara kitotorita ningi iyo kajihit kuna lingoni ite, manyu kaladeu nan okoto ahirang cia nan ite. Oru lobo jiok lo wei cia lohitir ite kalabok nan Ijipt. ¹⁴ Ara ene far na likwera ite; to kofiang fad kuna lofwonuno ojir ite idaha ara karama lo Lahitok itidwar lo karihin fad. ¹⁵ To faritin mietare ojir ite idaha mugati na lofuni oru ibula. To far lo lobito itidume ibula to kajihit kuningi, tonyio tungani na lonyia lobo tohi likukumi to ibula many to far lo lobito many far lo mietare ojir odumari inyi to Israel. ¹⁶ To far lo lobito itofik tuba manyu ifik lobito far lo mietare. Ketir lobo tic tur to kuno faritin, ingohi tara kikukuma lo daha keken, tohi na ngitii ite inyi na. ¹⁷ Itonyia karama lo mugati kuna lida ofuni to ibula tonyio ara enefar token, ayaunore nan agwalahin kuningi to kof lo Ijipt. Ikwerati ara itidwar lo karihin fad to kofiang fad kuna lofwonuno. ¹⁸ Iyo ofa lo lobito ojir ite inyia mugati kuna lofuna oru ibula many to kurou lo far lo tomon ko ongon many kurou lo far lo keek are ko lobito. ¹⁹ To faritin mietare ojir ibula ida orumahino kajihit kuningi. Manyu lobo tungani kode misiohoni kode monye lo kof na lonyia lobo tohi likaruto ko ibula ojir odumari to kiji lo cio kulo Israel. ²⁰ Kenyia lobo tohi likaruto ko ibula. Fajihit fad kuna limanya ite ojir idaha mugati kuna lofuni oru ibula. ²¹ Oto Moses ko tubuno lohitwaha kulo Israel fad ko jimitan diho icieng, "Ifwo deu itonyum kirieho to kajihit kuningi, ingot kilelo lo rangaru. ²² Itodumu itorit lo lodwa icafahi iyo okoto to besen itwehi iyo bauhin kulo agwala kai ko ngatihin are fad, ojir lobo tungani to kiji ningi ida orute sita many owang kof. ²³ Kololoro Lahitok kilorita kof fad boho cio kulo Ijipt, odeu cia inyi okoto kai ko angatihin kulo bauha kulo agwalahin kuningi ko rangita kuna agwalahin manyu ida ingohi kafadani orute kajihit kuningi kifada ite. ²⁴ Itoric kuno tenyitenyi ara cik to ite ko to lotataha kuningi tur. ²⁵ Kalingon ite nu kof lohicwara Lahitok ite iya lafa locihare inyi, ijifata ene tic. ²⁶ Ojir kalitifia mute tee kuningi ojo, "Nyio fotiri lone tenya?" ²⁷ Itorihohiti icieng ijo, "Ara ene kikumi lo Rangaru Paska lo Lahitok, tonyio orang afa inyi kajihit kulo Israel to kof lo Ijipt ingohi kajihit kuniyang na karue lifadare inyi cio kulo Ijipt." Oto cio ogung kof iwori Lobanga. ²⁸ Itii cio kulo Israel iya na locihare Lahitok Moses ko Aaron token. ²⁹ Kologoru tuk lo karue, ifade Lahitok tee okangi kulo cio kulo Ijipt fad, kiciaha to kito okang lo Parao la litongo iyo seger lo Okabwe many iyo kito okang lo mabusoni na lotora faji na imutok ko okangi kulo sang fad ara lobito. ³⁰ Owoju Parao karue ko kulahitoha kunenge fad ko cio kulo Ijipt fad, oto kicira na litibanga igor kof lo Ijipt tonyio oru lobo kaji to kajihit kulo cio kulo Ijipt lida tungani owei katua. ³¹ Ilolongu Parao Moses ko Aaron na karue ko jimitan diho icieng, "Itiwoju ifwo ite ko cio kulo Israel, kingerihiti nan ko cio kunei! Ifwo iworata Lahitok iya na litenyare ite. ³² Iyaroti ko sang kuningi iya na litenyare ite, ito hati ifwo. Kigatahi manyu nan gum. ³³ Oruk cio kulo Ijipt Israel fworo to kof neicieng ojo, "Tonyio ngohikeroro ha ohoi fad.'' ³⁴ Tona icio cio oting kofwo kuneicieng kuna lingoli orihe ida ofihi ibula oryongohini okokoho kuneicieng ara na lobuburahini kingolihin iyo kyelani. ³⁵ Itii cio kulo Israel iya na lorihohinore Moses icieng ilifuni sangite kulo rial ko dahab ko kyelani iyo cio kulo Ijipt. ³⁶ Icio Lahitok cio kulo Ijipt imoroti noo iyo cio kulo Israel iciori icieng sangite kuna lilifa icieng fad, tona obelaru icieng Ijipt. ³⁷ Iciak cio kulo Israel lotita to Ramases many Sukos. Ara afa cio rei kuna lotum alif mia ile na lida ikeni ngorwo ko tee. ³⁸ Ilik cio beciek ko icieng ko sang beciek; kiri, kera ko kicu. ³⁹ To kuna kofwo lingoli liyauno cio kulo Israel to Ijipt, ifun icieng mugati kuna loru ibula. Oru afa ibula iyo kuna kofwo lingoli, tonyio ifuhuni icieng to kof lo Ijipt oruhi icieng tik lo kikukuma daha neicieng. ⁴⁰ Tona orumu kitongo lo cio kulo Israel lotum karihin mia ongon ko keek uni. ⁴¹ To lohicungi lo kuna karihin mia ongon ko keek uni many ogoru la far, ofwonu cio kulo Lahitok to kof lo Ijipt kajihit fad. ⁴² Tonyio iriria Lahitok icieng na karue lo kiyauno icieng oleng to kof lo Ijipt, ojir na karue cio kulo Israel iriria na karue to kofiang fad lo kibuhunita ko kiwora Lahitok. ⁴³ Orihohi Lahitok Moses ko Aaron ojo, "Cihicihi kulo daha lo Rangaru kuno: Ojir lobo misiohoni ida onyia. ⁴⁴ Otum lobo opii linyiangu isi daha langun lilir isi inyi. ⁴⁵ Ati ida katangunoni kode tungani na lidum isi lo kitiyo lobo tic to faritin kude kuting onyia. ⁴⁶ Ojir odahahini kajihatua, kerutorore lobo tyang sita. Kegil lobo koite nenge. ⁴⁷ Ojir cio kulo Israel fad onyia na karama. ⁴⁸ Misiohoni na lomanya kiji ningi kolowak daha Rangaru lo Lahitok ojir ilir cio ko tee rei kulo kalenge fad,oto inyi ko rijon iya tungani na lotomonohini kiji ningi kidaha ko ite ara lobito. Ida tungani retoni na lida iliri onyia daha lo karama lo Rangaru. ⁴⁹ Inyi na cik bito litiyo to tungani lo kof lo Israel ko misiohoni na lomanya kiji ningi. ⁵⁰ Itii cio kulo Israel fad tohi na locik Lahitok ara iyo Moses ko Aaron. ⁵¹ Manyu to la far bito iyauno Lahitok cio kulo Israel oleng to kof lo Ijipt to agwalahin kuneicieng ko imaniti kuneicieng.