¹ Cio pili kuna lara opihin ojir obangiti kunahitoha kuneicieng to rima nahitok ojir karana lo Lobanga ko kitiyena niyang ida itikaji. ² Kuna lara kulahitoha kuneicieng karuhok ojir ida itirabani rima icieng to rahun recera. Ati ojir irwaati icieng ogal tonyio ara cio kulo Lobanga lorumu faida lo kirwaa neicieng ojir irwaati to kimaruno na logal. Sangite kuna lojir isi itiyenahi icieng kuna. ³ Kalitiyena tungani tenya lo talerun ida iruk kisinga lo Lahitok niyang Yesu Kristo na ibehi ko kitiyena lo warun lo Lobanga ⁴ ara inyi tungani ka pufani na lida iniang lobo tohi. Ara inyi tungani na ligeria peha ko ngolofa to tenyi tenyi kuna liyauno okaine, risa, ko tenyi tenyi kulo ngolofa ko ikobiti kuna irohori ⁵ ko swa na lidiho kiji lo cio kuna lotehita kibuha na igere kuna libuha ojo ara tic lo Lobanga kikoi lo rumuno bara lo robia. ⁶ Ati kitongo iyo Lobanga to kimono ara faida nahitok. ⁷ Tonyio oru afa lobo tohi lohiyauno ohoi kof manyu oru mute lobo tohi lohiyaru to kof. ⁸ Ati kolohingon ko daha ko kyelani ojir ohoi kimono to kuna. ⁹ Cio kuna lowak bara ourorita iyo laba ko kume manyu iyo wahita becek kulo dataru kuna liyaru icieng iyo uroro ko muyuhino. ¹⁰ Tonyio ara kimaruno lo robia kerdeti lo rohojita fad. Cio kude logere iya kiruk neicieng oleng to wahun lo robia ko cuhoroti ake ake to kidak nahitk. ¹¹ Ati isi tungani lo Lobanga igera kuna sangite lori ko kuna tofik tau tahita biran, bangun lo Lobanga, kiruk, kimaruno, kidonyo lo tau ko riejun. ¹² Torem rem na ijir lo kiruk iniefa warun na isio lafa lohilolongunorehin isi lafar litulunore isi kiruk nino ketemoni lo sadeni kuna iborengi. ¹³ To ketemoni lo Lobanga na licwara warun iyo sangite fad ko lo Kristo Yesu lafa lifura ketemoni lo Pontios Pilato otul saden na ijir, acik nan isi ¹⁴ lo rica ene ciha oru ko lobo kipal kode lobo tohi irohoi to ketemoni lo cio many far na lolotunore Lahitok niyang Yesu Kristo, ¹⁵ Na mute liyauno Lobanga to far nenge ake. Lobanga na lara kalanyunoni Lobito, na lara Kabu lo kabuno ko Lahitok lo kulahitoha, ¹⁶ Na lara inyi ake lida otum wei na litongo iyo wangun na lida ogoruno na loru tungani lodeu kode otum deuno. Ingohi rima ko kwatun tongon diho inyi karihin ko karihin Amen. ¹⁷ Tocik kabarak kulone kof, keco itidarati kode ofik kigeno neicieng iyo bara na lida igenuno ati ingohi tofihi kigeno neicieng iyo Lobanga na lohicwara ohoi sangite fad kuna lohiwak. ¹⁸ Tocik icieng ingohi itiyoti ara na ijir, obarati iyo ticitici kuna ijiri manyu imoroti, iruhiti ngara. ¹⁹ Tona kikoi oto cia icieng itiyore bara ara na lofihahinore icieng guri kulo warun lo dede. ²⁰ Timoti, toric tohi na lofihahini iyo kana nino. Tongerihi kiromita na lida ojir to cio kulo Lobanga ko tenyi tenyi kulo peha kuna lilolongoti to talerun ojo genyun. ²¹ Na lodumu kude ara neicieng, manyu tona tenya ko kibunyaroti to kikoi lo kiruk. Kisa kingon kosi.