¹ Nan Petero jayo lo Yesu Kristo. Diho cio kuna lonyumu Lobanga, welo kuna lisarihi kof lo Pontus, Galatia, Kapadokca, Asia ko Bisinia ² Kuna afa lonyumuni to yenun lo Lobanga Apa berien to tic lo kitinyujo na litii Okorif to ningo iyo Yesu Kristo ko kiruru to okoto nenge. Ingohi kisa ko kisiliban tara ningi rief. ³ Ingohi kwama tongon iyo Lobanga monye lo Lahitok niyang Yesu Kristo. To kisa nenge na hitok licio inyi ohoi otomone ngejuk iyo kigeno na iwar na lolotu ara iyo kibuhuno lo Yesu Kristo to kiji lo kaweyak ⁴ Manyu iyo lunyo lo tohi na lida mute ori, kode lipalaru kode oru na likumahini kai tote ⁵ Kuna lohitihuni to golun lo Lobanga to kiruk many lolotunore mute lo lwaha na likukumahini kitibotuno to faritin kulo lohicungi. ⁶ Tona itokwamati bebe kileng many adi ngitoyo ite to faritin kude kuting to itemiti kuna lotemarihin ite. ⁷ Ofwonu kuno ojir kiruk ningi na lilany dab na litinyuji to kima ojir itigoli iyaunore maja, deyo ko kwatun mute kalitibotuni Yesu Kristo. ⁸ Kokileng ngida ite ideu inyi imaru ite inyi, manyu ko kileng ngida ite ideya inyi iruk ite inyi. ⁹ manyu ifut ko kwama na lida otenyuno tonyio ingon ite rumuno konyek lo kiruk ningi ko lwahuno lo lwahita kuningi. ¹⁰ To tenya lone lwaha, kamocak kulafa lotenya to kisa na orumu lolotuno iyo ite, lotahi to fiha lo taulo ko to kigingi nahitok, ¹¹ to tema rumuno tik ko tenyi tenyi kuna louta okorif lo Kristo nafa longon katwa neicieng lafar kalimoca icieng to kidak lo Kristo ko deyo na mute lijifita. ¹² Orumu afa litibotuni iyo icieng ojo ida ara kenite kuneicieng irwa icieng ati ite kolotenya icieng to kuno sangite litiihino na lerihohi cio kuna lititima layomit na ijir iyo cio to golun lo Okorif na Inyu na loculuni to kai. Kileng malaikahin okodomo afa deya kuno sangite. ¹³ Tona ikukumata kibuha ningi to tic: itoric kenite kuningi; itofik kigeno ningi bebe iyo kisa na liciorihinoti ite kalitibotuni Yesu Kristo. ¹⁴ Iya tee kuna iningoho kerihe ifik taulo iyo wahita kuna irohori kulafa limanyare ite to lunya. ¹⁵ Ati iya na lonyujore kalolongunoni ningi, itongoti ara kuna inyuji iyo sangite fad kuna litiyo ite, ¹⁶ tonyio igero ojo, “Itinyu tonyio anyu nan”. ¹⁷ Iya na lilolongore ite Apa na longoto tenya lo ticitici kulo cio oru kisisio, itomanyati manya ningi ene iya welo to bangun na inyu. ¹⁸ Tonyio iyen ite jimitan ida afa kilwahuni ite to sangite kuna lorujoro iya dab ko rial iyo manya na ifara lone kof lafa liluny ite iyo fafaico kuningi ¹⁹ ati to okoto lo Kristo na inyu kito lo kern a loru lofunya kode lohabohoi. ²⁰ Onyumuni afa inyi many orihe ida oduhi kof ati ofwonuni itibotuni to kuno faritin kulo lohicungi to ite. ²¹ Ara iyo inyiiruk ite Lobanga na litibuhu inyi to kiji lo kaweyak manyu itikwat inyi inyi licio kiruk ko kigeno ningi ongon iyo Lobanga. ²² Jijia iya na litinyu ite kenite kuningi to ningo tenya lo dede imarunore ite recera kuningi, imaruti kenite tona igol to taulo fad. ²³ Tonyoo lotomonuni ite ari ida ara to kinyiemo kuna imuraha ati to kuna ijiri ara iyo tenya lo Lobanga na losio. ²⁴ Tonyio igero ojo, “Ori cio fad iya nyiari manyu deyo neicieng fad ori iya lo katurahak kulo mwang; inore nyiari manyu oruruoro katurahak ²⁵ ati tenya lo Lahitok owoita Tur”. Manyu inyi ene tenya ene afa lititimahini ite.