¹ Ti, iye, ocamai aning nasiru h’ettittoyo nadiri. ² Ityenie ohobolok thoyijo, thobangi, thosiru diruhon, dimuno, karik thokolo difwan ahithemi. ³ Iring ahani ne dang, ityenie dang ongorwo ahabolok thobangi thoisukaitha thohosong, thaang hocamai imonyoroi th’ohothing thohomok, dia amatha obalu bebe, ti, thoiwona ara ahetyenak h’aning nayyu, ⁴ karik ahani ne dang ithethemahini ongorwo hattik thomunoi obusuha karik okalifinok hosong. ⁵ thoteha, tholiboro karik thoiwona ara ahendefak hayyu h’ahangithek, thoiruho arami h’obusuha hosong, tek acamarik ocame l’Ojok imonyoroi. ⁶ Ingarahina ottwat thomuja d’oisukaitha hosong. ⁷ Thoyihothik bukulung, ithaithak ahwan nahoi ara arijori n’egyemathik hayyu. ⁸ D’etyenio nahoi, ithaithak eladiri, abolori nahoi 9 karik ocame ladiri tholohide edara, dojwu ahu n’othulo leda arami hahoi, anyo, daang orimahini thohothai aning nabo namonyong nacamai. ⁹ Ongacani thoiwona tholohop h’ohoindefak hosong d’asang fodok, dithamunoyo isong karik thaang hoilaferejyo hosong. ¹⁰ thaang hohoholye thosong, ti, kombwo, thoithaithak eruho nayyu, dara th’oyihothik fodok diyanu isong akolon d’etyenio n’Ojok ohithalwahani lohothai. ¹¹ Aca, athuk alwahio n’Ojok aleyori dithalwahuna ohothing bukulung. ¹² Ittittoyo inyong na ohothai edara aangan n’elajok, awahan nasang hothohop karik amanya nendafaitha nahwan nahoi, abisan karik omanyitha h’elajok h’oper lo. ¹³ Ahibu ohoi imijo ahithemi difothuna eyihina nahothai namunoi, aleyori n’abolori n’Ojok karik ohoithlwahani lohothai lohittok, Yesu Kristo. ¹⁴ Esarak Yesu ahwan nanyong dihouna ohothai thaangan n’ayano, dithaliboryo inyong ara honyong, ohothing homuno egyemathik hayyu. ¹⁵ Ocama th’arami thohune, ingarak ohothing thoihandye isong, karik ara iye ithabisyo th’akolon fodok. Lobo thaang olau iye.