¹ Ifothu othulo lelik eruhon nanyong kwong ofere. ² Iruk lobo, anyo asang fodok; loboling eruk anyo ojasi hamaring. ³ Othulo lonyo asang fodok th’awang homorye othulo lonyo ojasi hamaring. Othulo lonyo ojasi hamaring th’awang homorye othulo lonyo asang fodok. ⁴ Iye ngai dijaran oyyu dia omonyo ngadi thongadi larara ahana? Owoitha dia opwaharu inyong lo dihithemi ho lahong thonyong; ti, ithawejihini de inyong; isarak de inyong ohobu akolon n’awetha. ⁵ Do lobo, okalu ofaning lobo lobo th’ayiji. Do lobo ayiji operok fodok see. Ohothing fodok thoiruho iring negigilorik isong. ⁶ Lethahuyo ofaning, ithahuyo th’ofure thol’Ohobu. Lonyo, onyo th’ofure thol’Ohobu. Afurak Ojok ahinywarang. L’awang onyo, ida anyo th’Ohobu. Afurak nang dang Ojok ahinwarang. ⁷ Awang lobo lohothai lesuka th’ahwan thana nyong. Awang loye th’ahwan thana nyong. ⁸ Ara esuka, esuka d’Ohobu; ara eye, eye d’Ohobu; Inyong anara dia esuka dia eye ohothai h’Ohobu. ⁹ Th’arami tho hune, aye, ebuhu Kristo dowon inyong ara Ohobu l’ohoyak karik l’ohoiswok. ¹⁰ Ara iye, ainyong isarak iye ajaran oyyu dia onmonyo lelai? Anyo imoryo iye lelai? Efunu mwai fon iwetha dihithemi h’Ojok ara lawoni di kara di kanyo arami h’ohothing. ¹¹ Igero: “Iring esuka nang,” ojo Ohobu, “Oduhutho de ahungitho do nang.” ¹² Ifunu ohothai fodok mwai inyahina Ojok ainyong ehandyo ohothai. ¹³ Inyong na, ohothai th’awang hokanyaru ahwandek. Kombwo, ohothai thoihandyethek ahana ohothai th’awang holohai ahwandek. ¹⁴ Atek nang iring natehari nang th’Ohobu, Yesu. Awang aning nebot th’ahwan thanyong. D’othulo lojo ibot fodok, donyong ibot aning nawon. ¹⁵ Ara eryafu iye lelai th’anyari thanahoi, awang amuno thohoi. Hetharohojo th’anyari thanahoi othulo laye Kristo thonyong. ¹⁶ Hoisarak oisukaitha hohoi iye tholauni. ¹⁷ Ikara ohobye l’Ojok l’anyari hal’amatha. Ohobye l’Ojok inyong abisan, elik n’othaji karik amuno ditha h’Ohoile Lodwa. ¹⁸ Loigyema do Kristo thoyihoi tholya, iruhu Ojok, and ohothing dang eruhuni. ¹⁹ Iring na, hathifothethek elik n’othaji h’asang haduho ohothai fodok. ²⁰ Hoitharohojo egyema n’Ojok th’anyari; amonyori nawon d’othulo lonyo, isarak inyong thoipala. ²¹ Oyyu awangan n’anyo n’ahiringo; oyyu awangan amatha obalu, oyyu awangan n’anyo aning nabo kwong, ara awang hoiyanu omorit do lelai. ²² Eruhon nahoi asang olwarai, thoiwona dihiji hohoi h’Ojok. Othulo lawang hoiruhu epal nanyong th’asang thaheruhu inyong, thomunoi. ²³ Othulo l’awang otek tuhudi, eruhu anyo aning nawang inyong otek tuhudi, ipal. Othulo l’awang onyo th’eruk, iyau.