¹ Othaja fodok thoiruho d’ohoindefak h’ohothing h’ahap. Oindu abolori nasong, ikara th’amaji naboling; oindu th’Ojok. Ohoindefak h’ohothing hah’ahap, Ojok isarak d’amaji ne. ² Loida ohoindefak h’ahap karik h’ohothing, ida ohifahe l’Ojok. Hoida hulya, okanye de arami hasong. ³ Awang ohoindefani l’ohothing hal’ahap ho monyo d’asang h’arami hayyu; omonyori d’asang hamonyo. Ara iwak iye awangan abangi ohoindefani l’ahap, ihandye asang hayyu; ifufuryo de inyong iye. ⁴ Inyong lo ongaca l’Ojok d’ayiji nahoi; ara ihandyo iye asang hamonyo, obanga; awang hodaha h’odemi kwong arami; inyong lo ongaca l’Ojok; ohorofani l’engere d’othulo lehandyo namonyo. ⁵ Ithaningye arami hanyong, ikara th’abangi then’engere nanyong karik dang th’arami thoh’othaji. ⁶ Th’ahosi thah’arami hune, inyong neduma iye enyahwo donyong. Ohoindefak h’ohothing hah’ahap ongacani h’Ojok kwong ayiri. ⁷ Odumai ohothing fodok howon hohoi h’ahorosi: ohoindefani la’amiji, ohoithanyangani, ohoibobolok h’ohoithadahak; obanga othulo lowon h’aning nabangi; ifufurye ohothing howak efufura. ⁸ Hoiwon holobo h’ahoros, arahari amuno n’ahwandek donyong loindafaitho oyano tuhudi. ⁹ Iring na, “hoyau h’athulo n’oloboling, hoitoho, hoihoholyo, hoiyul asang halifa,” karik owon efahi nabo nanyahi ocame lo, “Imuno iye de othulo loindek dohoi, iring nemunorik iye ahwan nahoi.” ¹⁰ Inyong na, othubu amuno akolon n’oyano. ¹¹ Th’arami thohune, itek iye omiru hehenyunerek iye th’ajoo. Aindek ethalwahuna nahothai ahithemi th’omiru heruhori. ¹² Abolo aharye; aindek ofaning ainduna. Hesarahina egyemathik h’omudwe arakang; hehuhumyethek ahwandek d’afangan. ¹³ Hadahathik iring ohothing hodaha th’afaning; ikara iring adaha n’ebotho. Hothai thawang hodahai th’eleru h’ahayini. ¹⁴ Kombwo, heyofohina Hobu Yesu Kristo, edehi eleru dihap.