¹ Ajo nang dothai, olarok, th’amehina thon’Ojok, isarahina ahwandek hathai d’Ojok ara ehuma namijo, nadwa han’efothu Ojok. Ingengelunu egyema nahoi. ² Hoithahijihi ahwan ara nahap; iloyice ahwan th’ethalengejuhyo ahu nahoi. Ihandye ahani th’atehan ainyong oyyu, ainyong neruhuni, abis iring nawaharik Ojok. ³ Acama nang ahani th’alwahyo than’athuhi esarahina do nang, dawang lobo thothai igigilo bebe th’ahwan thana nyong iring neraharik isong igigilorik. Kombwo, isong tho igigiloi th’ahongon iring n’athuhorik Ojok esarahinerek do song eruk iring nya. ⁴ Okelethoi ahwan aboith olwarai. Awang egyemathik h’okeri h’ahwan abok abok horijoro. ⁵ Orijoro iring ohothai olwarai dihwan ho Kristo aboithe; etihahunu; esuka amaji aboithe. ⁶ Ewon h’esoritha h’ekela thoho loboling th’alwahyo thana isarahini d’ohothai. Ara esoryo nolobo acoryo n’arami, thegyamarik esoryo ne ring eruk nanyong. ⁷ Ara owon alwahyo ara esoryo noloboling, tholwahye; ara ethayeyenio esoryo nolobo, thoithayeyenie. ⁸ Ara ethakolyo n’ohoigyemak esoryo noloboling, thoithakolye; ara esoryo nolobo esoryo, thoisory th’othaji tho lonyong fodok; ara esoryo nolobo endafaitho n’ohothing, thoindafathe tuhudi; ara esoryo nolobo amehina, thomehi th’amuno. ⁹ Amuno nahwandek thoiwona kwong adwala; Idai amonyori; indefa ayyiji th’enget. ¹⁰ D’amuno n’olarok, iruhotho ahwandek; d’arami h’ethahuyo, obangatha ahwandek. ¹¹ D’atehan egyema ara nayyu, hoiririhitha. Th’othaji, owaha. D’Ohobu, igyemai. ¹² Omunoi d’ayenio nahoi no mwai. Ongongye ethahthacanitha hahoi. Omojoi juii. ¹³ Ingarak alwahyo ohoiruhok; orimak oyihothik olwarai ho ithaithahinerek do homok. ¹⁴ Oboroye ohothing hoithasahyo iye; hoifyethak ohothing homan iye. ¹⁵ Omunoi h’ohothing homuno; ikoro h’ohothing hoikor. ¹⁶ Ahu nahoi thorijoro ara nayyu d’ohothing fodok. Hoithadara. Ifothu ohorathak; hoigigilo th’ahu thanahoi hijan ihong iye. ¹⁷ Hoirofu othulo loboling th’amonyori. Ihandye asang hahoi ahibu ohothing fodok ingengelyo. ¹⁸ Ara ocohi dohoi, iwona h’ohothing fodok h’elik n’othaji. ¹⁹ Hoiryafuna hwandek hathai, ohothing hamuno nanga; ti, idehina ahwandek d’enegre n’Ojok. Atha ingere hijan: “Arofuna hindang, aduma nang de,” ojo Ohobu. ²⁰ “Ti, ara oleng ahure omerohothononi lohoi, isarak anyari donyong. Ara ibotho ahibothit, isarak donyong ahari; Ara ihandyo iye ahani, iye lecofak ahinang dihide hananyong.” ²¹ Amonyori thawang hotehu iye; otehu amonyori th’ayiji.