¹ 1 Olarok, awahan n’othaji karik efio hindang Ojok thosong, inyong ethalwahuna nasong. ² Acama nang iring nateharik nang owoni h’awahan n’Ojok, ikara th’atehan. ³ Aang isong otek abisan n’Ojok. Othifeyo isong ehuhumyo abisan nasong. ⁴ Aang ohoiruhi abisan n’Ojok. ⁵ Egero Musa arami h’abisan n’aindu th’oyano, “Othulo lobis th’oyano, isuka de th’abisan thon’oyano.” ⁶ Ti, abisan naindu th’eruk, ajyo, “Hoijo di thaji hohoi, ngai de olo dihide diyanu Kristo di hap?” ⁷ Karik hoijyo, “Ngai de olo tholohop haboro diyanu Kristo th’ohoyak?” ⁸ Ti, ngai ojyo ocame lo?, “Oindek ocame dohoi, dihuthuk karik dithaji hohoi.” Ocame l’eruk lya lenyahi ohoi dindak. ⁹ Ara ijyo iye th’ahuthuk thana hoi Yesu Ohobu lethabuhu Ojok th’ohoyak, ithalwahunu iye de. ¹⁰ Othulo leruk d’abisan th’othaji, ocama ethalwahuna th’ahuthuk. ¹¹ Ojyo amanini n’arami h’Ojok hegero, “Aang ahu n’othulo leruk do nyong hoju.” ¹² Aang Ojudei karik Ogrik hoikela. Ohobu aboithe lya. Ohobu losong fodok. Inyong lo l’ohothing fodok hoithalwaha donyong. ¹³ Lolwaha th’ofure thol’ohobu, ithalwahunu de. ¹⁴ Angai de ti ithalwaha isong donyong ara kabong hoiruhi? Angai de iruk isong donyong, ara kabong isong hoithairu? Ngai ithairu isong ara aang ohoithayeyenani? ¹⁵ Angai ethayeyenie isong, ara kabong isong ifahahini dithayeyenio? Iring nathuhi egeryerek, “Angai berien olibori ahejek h’ohothing h’arami angejuho h’amuno n’asang hayyu.” ¹⁶ Ti, kabong isong fodok hoithaningu arami angejuho hayyu. Ojyo Isayiya, “Hobu, ngai iruk ocame lohoi?” ¹⁷ Oindu eruk th’ethaningio; oindu ethaningio th’ocame lo Kristo. ¹⁸ Ti, ajyo nang, “Kabong isong hoithairu? Aa kabong. “Ethaninguni isong dihap fodok. Karik ewas ocame losong dicuhi h’ahap fodok.” ¹⁹ Ngonyena ajyo nang, “Aang Israele otek?” Ajyo Musa dodo, “Edodolyo nang iye de d’ohaine th’arami thah’aangan n’amaji; th’arami thah’amaji thanawang otehu arami hamok, dingere iye. ²⁰ Isayiya, l’aang obang, ajyo, “Arimak nang ohothing h’aang nang othifeyo, Nang aleyo d’ohothing ho kabong nang ifiyo.” ²¹ Ti, Isayiya ajyo do Israele, “Ofaning fodok, ewas ahas hundang d’ohothing homesyo edari ethairyo.”