¹ Paulo, ohoigyemani lo Yesu Kristo, ilongoi diwonan ara ohifak, esarahini arakang d’evanjelio n’Ojok ² neruhok inyong berien thohocorok dith’amaninihio hadwa ³ H’Olonyi lonyong lofuhu tho Davide ara othulo. ⁴ Th’akolon thon’Ohoile l’adwaran, inyong lonya ilolongohini ara Olonyi ‘Ojok th’ebuhuna th’ohoyak, Yesu Kristo Ohobu lohothai. ⁵ Tholonyong, ethuk ohothai efothuna alwahio karik awonan ara l’ohoifahak d’eruhohina neruhon dihiji h’ohothing h’amisok, th’arami thoh’ofure lonyong. ⁶ Dihiji h’amisok hune, elongoi ithai nya diwonan ara ho Yesu Kristo. ⁷ D’ohothing fodok howoni di Roma, homuno Ojok, karik elongoi diwonan ara ohothing honyong hodwa: alwahio dothai karik elik nahap th’Ojok, Omonye lohothai karik Ohobu Yesu Kristo. ⁸ Oboithe, afurak nang Ojok hindang ahinwarang tholo Yesu Kristo thoithai bukulung, anyo, athuhi eitek eruhon nathai di hap fodok. ⁹ Aca, Ojok ohoingengelani hindang, legyema nang donyong ditha ohoile hindang ditha evanjelio n’olonyi lonyong, ditha hainyong elececyo nang ithai juui. ¹⁰ Ejiyecyo nang juui ditha homojitha hundang hijan, th’oyihothic fodok, edwong nang de dothai diya th’alwahio thon’Ojok. ¹¹ Aca, awak nang atehuna ithai, desarahinerek nang ithai esorio n’ohole, dithakolyo ithai. ¹² Ahani ne, nang lodithifeyo engangara dihiji hothai, thal’eruhon thanahothai abok abok, nathai karik hindang. ¹³ Thenene, aang nang awak ethaninguna, olarok, hijan, operok olwarai awak nang kodien ainduna dothai, ti, ekohye nang, lwai hongorna, dirimahinerek ahayocong dihiji hothai dang, iring nanya arimahinerek nang dihiji h’ohothing hoikela th’Ojudei. ¹⁴ Awon nang h’amari d’Ogriki karik d’ohodahak , hoilofioro karik honanga. ¹⁵ Inyong na, iring donang, athuk nang ethuthuna dinyahina evanjelio dothai ohothing ho Roma. ¹⁶ Aca, aang nang ahu hojwu d’evanjelio, aca, inyong na akolon n’Ojok dithalwahuna ohthing bukulung hoiruk, dodo ahithemi, d’Ojudei karik d’Ogriki. ¹⁷ Aca, ditha honyong ithalyehini abisan n’Ojok th’eruhon d’eruhon, iring nathuhorik egerohinrek inyong, “Omanya de ohobisani th’eruhon.” ¹⁸ Aca engere n’Ojok nethalyehini tho paradiso. d’ohothing haang owoni ara h’Ojok karik haang obis, ohothing hoida arami hadiri thaangan than’abisan. ¹⁹ Owon ahani, anyo, otehu isong atehan nateharik Ojok. Aca, athuk Ojok ethaithahina isong. ²⁰ Aca gee thayeuna n’ahap, oisukaitha honyong haang otehunu, iring akolon nyanyong no mak karik elajok nanyong, atehuni nune oleyoroi, athuhon nehahauna isong th’asang fodok hanya athuhi ayeuna. Iring na, aang oyihoi ledehinerek isong thoisukai iring owahi inyong. ²¹ Owoni ahani, aca, juk otehi Ojok, kabong ithahuye inyong iring Ojok, kabong dang ofurahini inyong ahinwarang. Kombwo, anangai ditha egigilitha hasong karik etharyohohini othaja hosong haang otehu aning nayyu. ²² Ithahijiye ahwandek hijan ilofioro isong, ti, awoni ara ohonangak. ²³ Eloyicye abolori n’Ojok laang ingohunu ditha ehyelaru n’arijori n’othulo lengohunu, l’ahwen, l’ecangi hara ahejeha arangwan karik l’asang haryetha. ²⁴ Inyong hathi, nesarak Ojok isong ahure n’asang hothohop, aca, iloyicyo angorwo hasong oisukaitha hoyeunerek isong thohomok hoikela, disarahina ahwandek hasong thaang obangi dihiji hosong. ²⁵ Isong iloyicyo arami hadiri h’Ojok ara h’adwala, karik amojyo karik egyemai d’ahap nayeuni, dimaji h’Ohoyani, lomuno mak. Amen. ²⁶ Th’arami thohune, esarak isong Ojok d’awahan asang hothohop hamonyong heyanu ajwuon h’ahu, aca, eloyicyo angorwo hasong oisukaitha hoyeunerek isong thohomok thohoikela. ²⁷ Th’oyihoi tholya aboithe, edehini dang obusuha oyihothik hoisukarik isong h’angorwo honya oyisunerek isong karik amudai ditha h’ahure nawahan asang hothohop dihiji hosong. Abusuha hulya haang ahosi ojwu diyauna h’obusuha iring isong, efothuni ditha h’ahwandek hasong asario nacohi hosong th’obafu tholosong. ²⁸ Iring naang isong owahi eruhohina atehan nasong Ojok, athuk esarahina isong dith’ahu namuyak, disarahina isong thoihandye asang haang irahi ihandyo. ²⁹ Athuhi isong ethfuthahina thaanga than’abisan, th’agagangu karik th’angica. Efuthi th’ahayini, th’attohio, th’angalafa, th’ethatumio karik egigilitha h’eyau. Isong huna olodok, ³⁰ amorio, ohomanak h’Ojok, aang ohwadu aning nabo, ethadara, anduhio n’asuhe, atahitha oyihothik hoihandyerek asang hamonyong, aang iruhi arami h’omonye dia h’ahathingi. ³¹ Aang ateha, eruhon, aang othaja karik. Aang otehi aning naboling, aang othaja karik aang omiehinai. ³² Otehi isong hulo efahit n’Ojok, hijan oihandyo asang hune hule, ocohi dosong diyye. Ti, ikara hijan asang hune hamaring ihandye, iruhi dang hohomok hoihandyo isong.