¹ Diholu h’arami hune, atehu nang anjelohio arangwan owethi d’ekeri arangwan h’ahap, ahibu isong indafaitho rotrot opeceni arangwan h’ahap, daang ahomwa nawam dihap, d’ahari nahittok dia d’ohiyani lowon. ² Atehu nang anjelo loboling oindu tholo moithe. owon h’ebahit n’amanini n’Ojok lomijo. Ekor inyong lo omurut dihide d’anjelohio arangwan honya ohorihini thoiryafu ahap karik ahari nahittok. ³ “Hoiryafu ahap, ahari nahittok dia oyandik, lwai ohoi esarahina dihomong h’ohoigyemak h’Ojok lohoi, ebahit n’amanini.” ⁴ Ethaningu nang ohifalai l’ohothing honya abahye: 144,000 n’ohothing honya abahye th’amukoko bukulung ho Israele. ⁵ Abahye nya ohothing alif tomon larehai th’amukok no Juda, alif tomon larehai th’amukok no Reuben, alif tomon larehai th’amukok no Gad, ⁶ alif tomon larehai th’amukok no Asher, alif tomon larehai th’amukok noNaphtali, alif tomon larehai th’amukok no Manasseh, ⁷ alif tomon larehai th’amukok no Simeon, alif tomon larehai th’amukok no Levi, alif tomon larehai th’amukok no Isaachar, ⁸ alif tomon larehai th’amukok no Zebulun, alif tomon larehai th’amukok no Yosefo, karik alif tomon larehai th’amukok no Banjemino ⁹ Diholu hasang hune, atehu nang nya elulung n’ohothing naang othulo leheru – ohothing abok abok tho: misok, mukoko, ohothing, karik ahuthuhye – owethi dihithemi h’okara karik h’Oker. Iyofoi nya abongoitho abongi, hibu isong indafaitho dihas hosong athandak h’osohot, ¹⁰ Ahibu isong ikor omutto dihide, “Ethalwahio, owon ara n’Ojok lohoi, lowoni di kara karik owon ara n’Oker. ¹¹ Anjelohio fodok owethi diker h’okara, ohobolok, karik asang arangwan hayeuni ara hamijo, apwaharai th’ahomongithe dihithemi h’okara. Amojyo d’Ojok. ¹² hijan, “Amen! Emamajio, abolori, elofioro, afurahina n’ahinwarang, ethahabuyo, h’athuthulya thoiwona d’Ojok lohothai mak! Amen!” ¹³ Thiya lobo th’ohobolok efiyo nang, “Hongai hulya, hoithayofo th’abongoitha abongi hulya, karik thongai ofuni isong? ¹⁴ Nang ajyo donyong, “Lahong, itek iye,” inyong ajyo donang, “Isong hulya ohothing hathuk afuna thatha ethathaciana nahittok. Athuhi elalayo abongoitho hasong karik ecilye ara abongi.th’ahotho thon’Oker. ¹⁵ Th’ahu thona, isong hodihithemi h’okara l’Ojok. Isong amojo donyong th’afaning karik th’aharie di Templo honyong. Orethak de lowoni di kara amoroko nanyong dimohohina isong. ¹⁶ Aang ahure isong oindu ilengan, karik juk ahibothiit aang isong ofuni ibotho. Aang oholong dia anohong najahitha angai oindu isong iborihina dihap. ¹⁷ Aca Oker l’ethehiji h’okara de iyohoitho isong; oindu de iyohoitho isong d’ologugudut l’ahari, karik oindu de Ojok ifyeuna ehiyok thohode hosong.