¹ Thiya anjelo ethaithak nang owor l’ahari h’esu, halibo tholohide halibori. Ongetti th’okara l’Ojok karik l’Oker. ² tholoihiji h’oyihoi lohittok l’abore. D’oyirihi arehai h’owor, owon ohiyani l’esu abok abok, ithadoye opeceni h’ahayo tomon larehai d’oyefa. Abene h’ohiyani ara hethalihyerek amisok. ³ Aang afecio holo iwonan. Okara l’Ojok karik l’Oker lolo iwonan de di bore; ohoigyemak honyong hofwo ingyema donyong. ⁴ Otehu de isong ahomong nayong, ara ofure lonyong egero dihomongithe hosong. ⁵ Aang aharie holo iwonan diya karik aang ohothing hofwo iwahan afangan n’ahiryai nawulo dia afangan n’oholong, anyo, Ohobu Ojok lolo inwaha dosong. Isong hafwo indafaitho ahap mak. ⁶ Anjelo ajyo donang, “Ocamitha hulya, owoni hayiji karik owoni ara hadiri. Ohobu, Ojok l’ohoilehio karik l’ohocorok, asulak anjelo lonyong dithaithahina ohoigyemak honyong ainyong de nafuk kwak.” ⁷ “Otiha! Nang laindu kwak. Othulo loiruk ocamitha h’acorio h’amanini na, thomunoi.” ⁸ Nang, Yoanne, inyong lethairu atehu arami huna. Ethairuna karik atehuna hindang isong, apwaharu nang dihap dimojo dihejek h’anjelo lonya ithaicyo nang asang hune lo. ⁹ Ajyo donang, “Hoihandyo ahani. Nang ohoigyemani hohoi, h’olarok hohoi, ohocorok karik ohothing hoiruk ocamitha h’amanini na. Omojyoi Ojok!” ¹⁰ Thiya ajyo donang, “Hoihyenok ocamitha h’ocorio h’amanini na, anyo, anyihari omiru. ¹¹ Othulo laang obis, thaang howethai ehandyo awangan n’abisan. Othulo lamuyak ehandyo amuyahi, thaang howethai ehandyo amuyahi. Lobis thaang howethai ehandyo abisan. Lodwa, thaang howethai awonan ara lodwa.” ¹² “Otiha! Nang laindu kwak lya. Esorio hindang nawon honang, didumarik othulo iring egyemathik hanyong. ¹³ Nang Alpha karik Omega, ohoithemoni karik oicuhit, aculwe karik ecuhit. ¹⁴ Ohothing hoilalayo abongoitho donyerek isong th’ohiyani l’esu karik dojingarik dith’abore tholoyihethik, thomunoi. ¹⁵ Ongohe hodindak, oiboniok, oilerujok, ohottohok, ohomojok d’ajohi, karik ohothing bukulung homuno anyobio, adwala karik emangio. ¹⁶ Nang, Yesu, asulak anjelo hindang dinyahina dothai arami hune ara h’ekklesiahio. Nang ohade karik ongerenyi lo Davide, ohilyep l’amoithe berien lowulo.” ¹⁷ Ohoile karik Ahodwothi nawahi amuthayo ajyori, “Iwong” Loithaningu thoijara, “Iwong” Loibotho ahibothit, inyong thoindu, ara owak inyong, thoindu hamaring dimatha ahari h’esu.” ¹⁸ Anyahi nang d’othulo loithairyo ocamitha h’acorio n’amanini ne. Ara loiduhu dihwan honyong ocamitha th’amanini n’acorio ne, Ara ofonik lobo dosong, ofonik de dang Ojok adihathik hegero ditha hamanini ne. ¹⁹ Ara iduhu lobo adi th’ocamitha h’amanini n’acorio na, iduhu de Ojok oyirik lonnyong adi ditha h’ohiyani l’esu karik ditha abore nadwa hegero ditha h’amanini ne. ²⁰ Lonyahi arami hune ajyo, “Aa! Nang laindu kwak.” Amen, Iwong, Hobu, Yesu! ²¹ Alwahio n’Ohobu Yesu, thoiwona hothai bukulung. Amen.