¹ Diholu hasang hune, ethaningu nang aning nabo idolo thomurut tholohwat iring l’ohothing holwari dihide ilolongo hijan, “Halleluia! Ethalwahuna, abolori karik akolon, owon ara n’Ojok lohothai. ² Akanyo nanyong owon ara nadiri karik nabis. aca athuk angoco arami h’amwak nahittok, nathuk ethaboco ahap th’eleru thananyong. Athuk arofuna ahotho n’ohoigyemak honyong thohinang honyong na. ³ Edoloi operohothi oitharehe, “Halleluia! Afuro adotho thonyong mak.” ⁴ Ohobolok athomone areha larangwan hulo karik asang arangwan hayeuni ara hamijo huna, apwaharai dihap, amojoi Ojok, lowoni dihide h’okara. Isong ajyori, “Amen! Halleluia.” ⁵ Thiya, omurut ekorunu thokara, ajyo, “Ithahuyethek Ojok lohothai. ithai ohoigyemak honyong fodok, ithai, hoibang inyong, ithai arehai dang, haang oko karik hoko.” ⁶ Thiya, nang ethairu oilolong iring l’ohothing olwarai, iring ahamwaitho n’ahari olwarai, iring emedehitha n’ahila, ajyori, “Halleluia! Aca Ohobu, loindafatho ahap, Ojok lohothai, Lamolo.” ⁷ Hamunothik, habalathik thamuno karik hesarahina donyong abolori! Aca athuk amuno n’amutha n’Oker ainduna karik athulo nanyong ehuhumyo ahwan nanyong arabo. ⁸ Ahorihini inyong na thoithayofye th’abongoitho thaharere, hawilang karik aliborok” (Aca abongo narere inyong abisan n’ohothing h’Ojok hodwa). ⁹ Ara anjelo ajyo donang, “Igerok arami huna: Ohothing hoilongoi d’amuno n’amutha n’Oker, thomunoi.” Inyong lo ajyo ikoti donang, “Ocamitha hulya hadiri h’Ojok.” ¹⁰ Nang apwaharu dihap dihejek honyong, nang amojo inyong, ti, ajyo donang, “Hoihandyo ahani! Nang ohoigyemani hohoi karik olarok hohoi hoiruhi karik endafaithe arami ho Yesu. Omojyo Ojok, aca eruhohina karik endafaitho n’arami ho Yesu, inyong ohoile l’acorio. ¹¹ Thiya, nang atehu ahide onga; nang atehu diya agodigodi abong. Lodaha dihide honyong lo, ilongoi inyong ara ohoiruhoni ladiri. Okanyo inyong lo karik arem th’abisa.” ¹² Ojahi ahonde hanyong owulyewulye h’ahimang karik owoni dihu honyong alohuluhi olwarai. Owon h’ofure legero dihide honyong, lara inyong, ikara othulo loboling, otek olefeng. ¹³ Iyofoitho inyong lo abongo nanya etuhini ditha hah’ohotho, ara ofure lonyong elongoi ara Ocame l’Ojok. ¹⁴ Elulung n’ohoremok h’ahide, hothifoitho dihide h’agodigodihio abongi inyong, loiyofo abongo narere, abong karik nalibo. ¹⁵ Thohuthuk honyong, odaha odemi lohittok, lofi, lobahyerek inyong dihap amisok; oindu de indafaitho isong th’ahinang ebindang. Oreyo inyong lo amoco h’engere n’Ojok Lamolo. ¹⁶ Owon hofure legero dibongo karik dithora honyong: “Lahong lalahong karik Ohobu l’ohobusi.” ¹⁷ Nang atehu anjelo owetha ditha h’oholong. Inyong lo, elongo thomurut tholohwat ahwen bukulung hawaitha tholohu, “Ifuna, osuduhathik amaji aboithe d’amuno nahittok n’Ojok. ¹⁸ Ifuna onyethek ahiringo n’ohobusi, nahahong h’ohoremok, n’ohothing hoko, ahiringo n’agodigodihio karik n’ohothing hodaha thosng, ahiringo n’ohothing bukulung, hoisuka iring owak isong, karik n’ongacani, n’ohothing haang oko karik hoko.” ¹⁹ Nang atehu oicang karik ohobusi h’ahap helulungir h’ohoremok hosong. Osuduha isong nya diremorik, lonya odaha th’agodigodi karik helulung n’ohoremok honyong. ²⁰ Endefuni nya oicang h’ohocoroni laang owon ara ladiri lehandyo ethaithitha dihithemi honyong. Thethaithitha thohune, ethadwalyo nya ohothing hathuk efothuna ohoforo h’oicang karik ohothing honya amojyo arijori nanyong. Amirohini nya isong arehai ditha h’ajor nawulo ara ahimang. ²¹ Homok hosong attohori nya th’odemi tholohittok loindu thohuthuk holodaha th’agadigadi. Anyo ahwen fodok ahirngo nasong naye nya.