¹ Ethalyehina na no Yesu Kristo nesarak Ojok donyong dithaithahina ohoigyemak honyong ainyong de nafuk kwak. Isarak inyong thotehi thasulahina anjelo lonyong d’ohoigyemani lonyong Yoanne. ² loiruhu anyahina ocame l’Ojok, Yesu Kristo karik asang fodok hatehu inyong. ³ Othulo lehena ecorit ne omurut dihide, ohothing hoithanigyo ocamitha hothatha ecorit ne karik ohothing hoiruk ainyong negero ditha h’ecorit ne, thomunoi. ⁴ Yoanne, d’ekklesiahio cofa hotho Asia: Alwahio thoiwona dothai, elik n’ahap, tholowon, tholonya owon karik tholoindu de, th’ohoilehio cofa hothohithemi h’okara lonyong, ⁵ tho Yesu Kristo, ohoiruhoni lotihak, ohoithemoni th’ohoyak karik th’ohoindefani l’ohobwore h’ahap. Donyong lomuno ohothai, ahohi eyatha hahothai th’ahotho thananyong. ⁶ athuk ehuhumahina ohothai ara ohobye, ho fadiri, ara h’Ojok karik Omonye lonyong, abolori karik okolon thowoni donyong mak Amen. ⁷ Otiha, inyong de loindu dith’adikolo. otehuni de inyong ahonde fodok haharom inyong. Ikori de amukoko hothohop bukulung thonyong. Aa. Amen. ⁸ “Nang Alpha karik Omega,” Ojyo Ohobu Ojok, “inyong lowon, inyong lonya owon karik inyong de loindu, Lamolo.” ⁹ Nang, Yoanne – loithelai, longara hothai ethathaciana, ohoboye karik angongio nadihani hawon ditha ho Yesu, awon nang nya d’ofifi, loilongoi ara Patmos di nyahina ocame l’Ojok karik Yesu. ¹⁰ Awon nang nya ditha h’Ohoile d’ofaning l’Ohobu. Ethaningu nang tholohurong honang omurut lohwat iring l’amo. ¹¹ Ojyo, “Igerok ainyong itehu iye dith’amanini, ara iye isulak d’ekklesiahio cofa: Ephesus, Smyrna, Pergamum, Thyatira, Sardis karik Laodicea. ¹² Nang eloyitho dingengelyo longai omut locama donang lya. Diloyitho honang, atehu nang ethawejitha ayeli cofa h’ahimang. ¹³ Dihiji hosong ihyelaru nabo olonyi l’othulo, loiyofoitho abongo nahodo lwai dihejek, athora disuhe th’efithek ayel. ¹⁴ Obwori nya ahu karik ohofir iring awaro – obwori iring ofalanga h’ohuju – ahonde hanyong ajahitha ongadiep l’ahimang. ¹⁵ Ojahitha nya ahejek hanyong ebindang anadwor neresa dia namuda, karik omurut lonyong nya ahwat iring ahari olwarai hangetha. ¹⁶ Owon h’ohilyefi cofa dinget karik odemi lofi oyirihi arehai oindu tholo huthuk honyong. Owulo nya ohomong nanyong iring oholong lonok bebe. ¹⁷ Atehuna hindang inyong, nang apwaharu dihejek honyong iring othulo lathuk aye. Ethahi ahinang nanyong nenget dihide honang, ajyo, “Hoibang, Nang lothohithemi Nang lothoholu. ¹⁸ karik lomanya. Aye nya nang, ti, idoro, amanya nang, nang amanya mak! Awon nang h’ongaitha h’aye karik ho Hades. ¹⁹ Inyong na, Igerok dihap asang hethuk iye atehuna, aning nawon karik aning naindu de ifuhon diholu hone. ²⁰ Iring ainyong ojyori ohilyefi cofa hetehu iye thinget honang karik ethawejitha ayeli cofa h’ahimang: Ohilyefi cofa isong anjelohio cofa; Ethawejitha ayeli h’ahimang isong ekklesiahio cofa.