¹ Ohoidefak h'ohothing, isarahina d'ongacani aning nabis karik nacohi dosong. Itek ithai hijan iwon ithai hohoindefani dihide. ² Odulothi dimojo th'akolon. Omijethe tuhudi dith'amojo h'afuryo n'aninywarang. ³ Omojothi amaji aboithe thohoi dang, d'ongahi Ojok oyihyet d'ocame, dicama arami hadiri hedima ho Kristo. Th'arami thohune efitha nang. ⁴ Omojothi d'acama nang tuhudi iring nerarik nang icama. ⁵ Odahathi th'olofioro d'ohothing hothondak. Olwahuna omiru. ⁶ Ocamitha hothai thoiwona juii h'alwahio. Isarahina ahipere ditha h'ocamitha hothai, ditek ithai angai itharangye ohothing hulya abok abok. ⁷ Iring d'asang hawon ara hundang, isarak de Tycikus ithai toteha. Inyong lo olai leruk loth'othaji; inyong lo ohoigyemani th'othaji karik ongaca l'Ohobu. ⁸ Asulak nang inyong dothai th'arami thohuna, ditek ithai arami hahoi, karik dang dithakolyo othaja hothai. ⁹ Asulak inyong h'Onesimo olai neruk loth'othaji, loboling iring ithai. Onyahini ithai de asang fodok hawon dini. ¹⁰ Aristarkus, othulo lefitha iring nang, ithamandayo ithai, karik dang Marko losoning ho Barnaba (lefothu ithai thonyong ainyong ihandye, ara laindu dothai, ifothuna inyong), ¹¹ karik dang Yesu, lelongoi ara Justo. Ohotho h'angocye hulya hama ohoigyemak hundang hulya h'ohobye l'Ojok. Esarak isong hulo nang alengan nesuka. ¹² Ithandayo ithai Epafras, inyong lo lobo lothai karik ongaca lo Kristo Yesu. Omojo inyong lo bebe thoithai diwahu ithai ara ithai inihi ahwandek hathai fodok d'ainyong owak Ojok. ¹³ Ocohi donang dijaran igyema inyong lo bebe thoithai, th'ohothing thoho Laodicea, karik ho Hierapolis. ¹⁴ Ithamandayo ithai Luka, ohomurani loth'othaji karik Demas. i ¹⁵ Ithamandahina olarok hotho Laodicea karik Nymfa karik ekklesia nawon dihang honyong. ¹⁶ Ara amanini ne nathuhi ehenahina dothai, thehenahini dang d'ekklesia no Laodiceans, iheniethe dang amanini notho Laodicea. ¹⁷ Ijaratha do Arcippus, "Omije tuhudik d'amaji nahoi n' egyema nefothu iye th'Ohobu, awak hijan ihandyo iye. ¹⁸ Emanda na th'ahinang thono hindang ho Paulo. Hoikwothik efitha hindang. Alwahio thoiwona hothai.