¹ Th'ohoboloni, d'atwathi nanyimuni karik d'okalifinok honyong, hamuno nang ditha eladiri, - ti, ikara nang hamaring, nang karik ohothing dang bukulung hathuk atehan arami hadiri - ² anyo, th'arami thah'adiri thahapwak ditha hohothai,, isukai de ditha hohothai mak, ³ alwahio, amiehina karik elik n'ahap owoni de hohothai th'Ojok, Omonye karik tho Yesu Kristo, Olonyi l'Omnye ditha eladiri karik amuno. ⁴ Amuno nang bebe dirimahina homok th'okalifinok hohothai hodaha ditha eladirii, iring nethuk ohoi efothunerek efahit na th'Omonye. ⁵ Thenene, amelyo nang iye, naba - ikara iring nera nang igerohinerek dohoi efahit angejuk, ti, aboithe nethuk ohothai arimahin tho culwe - hijaran ohothai thomunoi ahwandek. ⁶ Amuno inyong na, hijan disuka ohothai th'efahitha thahanyong. Inyong ne efahit, iring nethuk ithai ethaningunerek thoculwe, hijan ithai thodahai thonyong. ⁷ Anyo, athuk ohodwalak karik hohotumak holwa ajingahina di hap, karik orisai hijan aindu Yesu Kristo ara othulo. Ohotumani lya karik omerohothononi lo Kristo. ⁸ Omijethe dihwandek hothai, d'aang ithai ithalithok asang hethuk ohothai egyemuna, ti, karik dang defothu esorio nahittok. ⁹ Lolo ahithemi awang hoisuka ditha h'etyenio no Kristo, aang howon h'Ojok. Lowon ditha h'etyenio no Kristo, owon h'Omonye karik Olonyi. ¹⁰ Ara oindu othulo lobo dohoi; ara awang heyanu dohoi etyenion ne, hoifothu inyong dihang hohoi. Hoimandayo dang inyong. ¹¹ Lemandayo inyong ongara honyong egyemathik hamonyong.. ¹² Owoni asang olwarai. Aang nang awak egerohina dothai th'amanini karik th'ahari thah'egerorik. Ti, eyuhi nang, aindu nang de dohoi, defunu icama amaji aboithe , difut, acohi amuno nahothai. ¹³ Okalifinok h'enehani nanyimunu na, imandaye iye.