¹ Ná naa Kúíŋ bǎrŋa ká kí Wʉ́oꞌŋ urumaꞌŋ dorá–ii, kɨ́eŋ sǔrŋa Wʉ́o–sí baní niná gobbó sállá ná teyyá–ii alá Wʉ́o–sí kilma sɨmmó pii in ba̱gɨ see kwaŋi áláŋ tawar bawí . ² Kɨ́eŋ sǔrŋa–sí ás bɨŋoba áláŋ in beŋ niná in da̱ldɨŋɨ kwa,Maraŋ ǎ̱w náis Wʉ́o kɨ́eŋ kilmaŋa jɨŋo ná kɨ́eŋ ta̱bʉŋ jɨŋo ás tog, ila áláŋ bá taga barri bɨges Wʉ́oꞌŋ ari kaa–ii iláŋ arraꞌŋ tʉllɨ́ŋ kilmaꞌŋ sɨmmɨ̂ŋ ná arrí kololí ³ Ná kí Wʉ́o;ŋ tʉllɨ́ŋ dorá ila ká iní ká dʉó bi dʉó–sí in kámiŋ áláŋ dɨɨ́ŋ suurꞌiŋ ʉʉ ila suŋŋáírí á jawrítíba ái lá Wʉ́o iní ála in loŋ áláŋ jawríti ná áláŋ dɨ́ɨ́ŋ suurꞌiŋ ʉʉ–lé dʉó ádi jaaŋ ná áláŋ suur–sí seejɨ̌a̱ꞌŋ temin írí jawríti ai lá Wʉ́o iní . ⁴ Niná asá kɨ́ kwa nyét sǔrŋa kaaŋ ná kí arɨ́ŋa suŋŋá kewe ná in a̱rɨ́ŋa nyét tááriŋa kerker–sí ka̱ɨŋ ná píe. ⁵ In deloŋ dog barbar kɨ́ kwa suŋŋá kaaŋ maraŋ Jáásodʉŋo bá kwa nyét suur tog kaaŋ ná dʉó bi dʉó bá ila suurꞌiŋ a̱rɨ–ii . ⁶ Ná kɨ́ kwa nyét–sí dola kerker kaaŋ ai lá kí tʉllɨ̂ŋ dorá kaní ná ǎ̱w nás táárí áa, Naa á bái Wʉ́o kʉro iní sʉrreŋ kí seejɨ̌a̱ suŋŋá jirsiŋo in dála ai lá Wʉ́o iní. ⁷ Ná bás dɨ́eŋ dolol kwa–sí táárí pii bás táárí jaa , Ná dɨ́eŋ kilaŋi ásáŋ kwa–sí gʉʉd jawlíti bás gʉʉd tullé jawlíti. ⁸ Ná dɨ́eŋ dolol ila–ii ásáŋ kuro jaŋíti bás kí see janyíŋi , Ná bá dɨ́ɨ́ŋ ila–ii áláŋ kwa–sí janní bá kí kilmaꞌŋ pattɨŋ janí, Ná bá Wʉ́o–ii ta̱bʉŋ jawíꞌŋ kʉro iní ila táála–sí bá puttó jɨ̌a̱, Ná bá–ii dôl in lá kaní ásáŋ kwa–sí urmɨŋ jawíti bás kí urma jawlí. ⁹ Joiŋi inloŋ áláŋ suur bási. a̱rɨ ɨt–sí bawríŋi alá jɨttɨ́ ná a̱rɨ–sí puttóŋ baiŋ alá tullé–ii. ¹⁰ Bɨ́ Jáásodʉŋoꞌŋ ka̱rɨjʉlokwa sǔrŋa–sí in boiŋi niná bǎrŋa ná sǔrŋa–sí ba̱gɨ ila–lé suŋŋá baní ǎl bɨ bóel áláŋ Bɨŋa kaní ¹¹ táárí suŋŋá báa ásɨda á beŋba, Loŋpii–sís táárí kí zɨndɨ́eba ná kí kíeŋ kilmaŋas nyét báa. ¹² Bʉndí nái dɨ́eŋ jǎ̱go kereg kí kilmaꞌŋ sɨmmɨ̂ŋ tɨ̌a̱yel ná ǎ̱w kɨ́eŋ dɨróŋa–lé bɨrmel ná ǎ̱w nás kí tina nyét bʉ̌ʉmel. ¹³ Ǎ̱w nás kɨ́eŋ lotá kí kɨ́eŋ bǎrŋa ná Jáásodʉŋoꞌŋ ka̱rɨjʉlokwa gé sarɨ́geŋ bʉ́ndel yeeŋ–sís kɨ́eŋ toŋa bɨtɨrɨŋɨt ába dorá kwǎ gé. ¹⁴ Wʉ́o–sí bɨɨlel ásáŋ kila kwa–sí bora patta piá ái la Bɨŋa–sí teltilíŋ káwe, Ee Ye–sí bɨlel ásáŋ yeeŋ–sí bora patta piá ná yeeŋ–sí náleŋ abáwba. ¹⁵ Ná nái kí kila kwaŋ gí kilmaŋa sɨmmó ge, Ná dog kí kila kwaŋ bomola ǎl koome. ¹⁶ Â̱w ná kwaŋ nyét tullé baŋ ná doggore as bʉndel maraŋ sí kí kila kwaŋ bɨrsɨ̂g alá dǔu ge. Ná kɨ́eŋ ta̱bʉŋa–lé in á bâwritiba âl kwa–lé suŋŋá riya baaŋ. ¹⁷ Jɨ̂ttɨ–sí kí jɨ̂ttɨ á bawítiba. Báa–lé bá a̱rɨ ála baw áláŋ dʉó bi dʉó in lɨw ǎl tullé–ii . ¹⁸ A̱rɨ ɨt–sí báa ǎl taga ɨndel , ná ǎ̱w nás kí kwa nyéttiŋ tullé baaŋ. ¹⁹ Ná kipéŋa suur á bá̱bʉŋba kondoŋa, Maraŋ kila Wʉ́o–sís bundí. Ɨdɨ̂ɨŋ in rimmeŋ eŋa," Kipéŋa ǎl kúíŋ ge , áláŋ Ká ábʉ Loŋpii in nálaŋ kwǎ". ²⁰ Maraŋ ába dɨ́ɨ́ŋ gárím durí bá a̱rɨ dig janí ná amí ná abá gal burí bás koro janí ná baa ná abá in–sí jaa baŋ yé utúꞌŋ kasa ta̱bʉŋ juilel. ²¹ Bundí ba áláŋ jɨttɨ ka̱lɨ iní maraŋ jɨttɨ–sí kí tullé ka̱lɨ baní.