¹ Wʉ́os Isirálíŋá sís uramas palí,Ila námá ii in ɨ́ŋo Wʉ́o bála kééŋ kwa sí errel,Áí lelelá ká ináŋ dog kí dúiŋ doral dog Isirálíŋá dʉŋo aaŋ Birámíŋ Atine Bajamɨ́níŋ Órréŋ kwa lé aaŋ . ² Wʉ́o kééŋ kwa sí áá errel ba kila sí âl yé míŋ waar jáŋó,Bɨ́ ás baluŋ bâ âl Wʉ́oŋ Domboreŋa Toya beléŋá ila saŋgal lé âl Elíja Wʉ́o lé Dalɨ́me piyá Isirálíŋâ írí , ³ Loŋpii yeeŋ kɨ́ɨ́ŋ domoŋ kwá sí ka̱wŋɨ naŋ kɨ́ɨ́ŋ Goboŋâ lóŋá sí pera káwe bá ká Dʉó tog aaŋ nás áiy na dog kuwéli áíláŋ kawe. ⁴ Wʉ́o yee kaa jawí jáwí ká dúíŋ suur sís kwa Líríŋás Sabes írís aá alá Wʉ́o Pɨyé dʉoŋ sí ba̱gɨ á kawe baa âl Baal ka̱rɨ́ya. ⁵ Bá ila Dorá Tog bɨ́rri na kila kwâŋ dɨó alá Wʉ́o jáŋó bá kwa etáŋa gé kila âl Wʉ́o jáŋó nás káye. ⁶ Na bás Dééŋ Jáŋos kí dééŋ si Tʉlɨŋ si tɨyél na kila ʉ́dóŋá lé áíy ba âl yeeŋ káwe ,Ɨdɨ́ŋ abás Wʉ́oŋ jaŋos kilas ʉ́dóŋá lés alá yeeŋ káwe liya dééŋ Tʉlɨŋ tʉlɨŋ see kʉoŋ áiy baa. ⁷ Na na kaiy Isirálíŋá A̱rɨt ás kʉmbéŋ baa alá yeeŋ kwé liŋí marŋ bá kwa Etáŋa díŋa kaɨ́ŋ âl Wʉ́o jáŋó nás kʉmé kwa kerŋa namá kawríŋê áláŋ Wʉ́oŋ belé sí kela kámíyal. ⁸ Niná albá Wʉ́oŋ Domboriŋa Toya lé Rímeŋ eŋŋa Wʉ́o Kɨ́eŋ Ta̱bʉŋa na Kilmaŋa lé ulla piyá ná kɨ́eŋ Kʉ́ŋɨ́ lóó á lawe baa na Kɨ́eŋ Kɨ́ló ʉʉ kela á ame baa namaŋ Ettê dog bás in dálaŋ si kaɨ́ŋá. ⁹ Na Dawʉ́t namá in beléŋ Dɨ́eŋ Súbu saláŋ Kʉyɨr na Zargan eeŋ ná Tɨ́ɨ na kasáŋ Dɨ́tóŋ eeŋ ná Tʉgó ná káwúyíl ¹⁰ Kaláŋ Kʉ́ŋɨ́ dɨkó ɨŋŋɨ ná Lóó âŋ ka̱gɨ́la baa ,Na kaláŋ kéréŋ kí Táríŋá Tokéŋa Raal Doŋgóré kéli. ¹¹ Jârra kopoŋol síŋ liya námá in ɨ́ŋŋo Isirálíŋá sí alá tʉgʉl Dééŋ lá jásíŋo lé káyíe,Ái lelelá Ɨdɨ́ŋ ná Ʉ́dóŋá Jɨtɨŋa káwe Jopóŋó Járraŋa lés Tánnáŋa áláŋ dɨ́eŋ erre Kilmaŋa puká piyá . ¹² Abás kɨ́eŋ ka̱tɨ́ŋa Da̱ldɨŋ sís Borras patás soŋâs élle na bás Dɨ́eŋ Jopóŋós Járra sís Bora patás élle na yeeŋ Dorra patá nín síŋ kéla ila Tin lé abá Isɨrálíŋá dɨó kaɨŋi. ¹³ Ká na Jârra bɨŋa sí gîs írsiŋ Ɨdɨ́ŋ ná ká Jârráŋ Kʉréme aaŋ, Ká dúíŋ Wʉ́oŋ si Táríŋ írí Doŋgórés ɨndélíŋ . ¹⁴ Na in si a̱igel áláŋ Dúíŋ Órréŋ kwa sí undí áláŋ si mat taga kilmâŋ pʉkɨŋ eeŋ áláŋ mat sii díŋas sís oppó. ¹⁵ Ɨdɨ́ŋ abá níŋ Yeeŋa sí Wʉ́o úríŋí Kʉldɨŋ nyét Da̱ldɨ́ŋ dɨó básíŋ nyét kí Wʉ́oŋ síŋ Súúleŋ kɨŋɨ na liya ai níŋ eeŋ abás Wʉ́o yee sís Tɨnna Ila bá tágiŋ in lóŋ in âl Wayi tólá Jaiŋ lé káɨ́ŋe. ¹⁶ Abás da̱rɨ́s dɨwô díi sís teyá káwe kí ila dorá indálaŋ ila Da̱rɨ́ bá síŋ ny;et Teyá eeŋ na abás Wʉ́o sís Tawrá kawíe indálaŋ ila Da̱rɨ́ bá síŋ nyét teyá eeŋ ¹⁷ Abá Dáríŋ Zatʉ́níŋ Kelgaŋa díŋa dʉ́yɨ́ŋɨ ná bʉ́yɨ́e, Jɨ́ bá in jaluŋ niná Zatʉ́níŋ Hamílíŋ Delgáŋ ,Asá kéle nás Zatʉ́n Dáríŋ lés Tómeŋ si káwe ná kí kelga keerŋa Arrá Dɨ́ŋ lé Nímeŋ ɨndel ¹⁸ Kelgeŋa Duiŋólá sí Doŋgóré asi jɨndel baa.Na abás Doŋdórés Jɨndel bá awʉ́ nás in jaluŋ asá Dɨ́ɨ́ŋ sís jányíti,Maraŋ ála Dɨɨ́ŋɨ nás Jɨ nyíti. ¹⁹ Maraŋ Jɨ́ áláŋ bá in juwa kelgaŋa ɨdɨ́ŋ dʉyɨ́ŋɨ áláŋ si ká Túmeŋ si eeŋ . ²⁰ In Belé see ii,Yeeŋ iláŋ dʉyíŋɨ ná bʉ́yɨ́ŋɨ asá see jáyɨ ás ka̱ɨŋɨ baa maraŋ Dɨ́ɨ́ŋ ná see jéél Dogóré asi jeŋba maraŋ awʉ́ ná gî Ka̱lɨtɨ̂. ²¹ Wʉ́o Yawʉ́da sí ísteŋ ás piyá baa Ɨdɨ́ŋ ná yeeŋ kelgaŋa Sɨ́rge na walá dog Jɨ sí ísteŋ áí síŋ piyá baa ²² Awʉ́ ná awáyîŋ ʉʉ lé na Wʉ́oŋ A̱sɨŋ lé bâl jawríti Yé kila kwâŋ erre asân ni âl káyɨ́ŋɨ maraŋ ásáŋ dɨ́ɨ́ŋ ʉʉ awáyí eeŋ abás Jɨ́ jayɨ́ŋ ná jɨ́ dééŋ awálé Jáwʉ́ maraŋ abá dééŋ awáyí lé á jáwʉ́ baa bá gî kure. ²³ Na abá Yeeŋ dɨ́éŋ see jáyɨŋ wa̱rɨŋ lés ás kʉ́yɨ́tɨ́ yâba bá síŋ dɨ́éŋ lóó Toyi lé Tómeŋ káwa lóó alá yeeŋ déle kaɨ́ŋí Ɨdɨ́ŋ ná síŋ Wʉ́o bá sí asi keer Taga Tómeŋ piyá . ²⁴ Ɨdɨ́ŋ ná abá gî Jɨ Zatʉ́níŋ Kurú Hamíl lé gî kándé na kéle ná gî Zatʉ́níŋ kurú lés Tómeŋ káwe na ʉʉ ila laiŋ Jaiŋ lé ákee baa na yeeŋ alá sɨ́rá ge ai náŋ asila gé na ai níŋ si Tómeŋ si ɨŋŋɨ alá dɨ́éŋ Dárí Zatʉ̂níŋ kurú ii asá Tómeŋ si aɨndel. ²⁵ wʉ́oŋ urma kwa nyétíŋ írí ,Kúíŋ Bárŋa íne bʉ́tʉ́ŋ ʉʉŋ see kee ná ká weel ásáŋ baluŋ ɨdɨ́ŋ ná ila ʉʉ áá gî júndí baa ásáŋ bári bɨ́ ai saa riyá baŋ ,Na ila Isirálíŋ Ta̱bʉ́ŋ pʉtɨŋɨ an ila indálaŋ dééŋ lóo âŋ awʉ́ baa maraŋ báŋ déliŋ kee nama níŋ Járráŋ tin págó. ²⁶ Na in bá yéi áláŋ si Isirálíŋá kéges kopoŋol,In ná alá Wʉ́oŋ Domboreŋa Toy ii lé Rímeŋ eŋa ,Jopó dʉŋo áláŋ Zoon kóró ná élla ná Yagʉ́bíŋ Atine ŋâ Ta̱gɨŋî wa̱rɨŋ nyét túga jáwí. ²⁷ Na ká kégeŋ síŋ Dúíŋ Sárta in sís kám,Abás ká kɨ́eŋ si Katɨ́ŋas ásó. ²⁸ Ɨdɨ́ŋ ná Isirálíŋá Wʉ́oŋ belé tulê sí kawríŋî namá Wʉ́oŋ Gárima kɨŋɨ.Dɨ́eŋ ʉʉŋ bɨ́ Jârra ásáŋ lóó baŋ . ²⁹ Maraŋ Wʉ́oŋ Jáŋô ʉʉŋ yeeŋ sí kɨ́eŋ jáŋô ʉʉŋ Wʉ́o soŋá kóŋí. ³⁰ Ɨdɨ́ŋ ná Wʉ́o kééŋ Dola kwa sí ájáwúlíŋ tiba na dog kila kwa sí á errel baa âl yé jáŋó,In ná asá bɨ́ Wʉ́o sí ba̱gɨ ábâ baa maraŋ na asá bɨ́ Wʉ́oŋ si urmas bomé. ³¹ Indálaŋ dog Isirálíŋá Wʉ́o sí ba̱gɨ ákáwe baa na kíla Dorá tág bá yéi nás Wʉ́o sís urmas palí . ³² Ɨdɨ́ŋ ná kwa nyét Wʉ́o sí bagɨ ákáwe ba na namá iláŋ ii ná yé yeeŋ sí in tɨyél inná Túmnáŋá.maraŋ yé nyétiŋ in sí ɨdɨ́ŋ piyá. ³³ Wʉ́oŋ Bʉjé Wʉ́oŋ Ka̱wa̱jiŋ aiy appâ ii na dééŋ Rɨɨŋ an Jɨ́wɨŋ aiy kʉlgʉ́té gee,Kɨyé ásáŋ Taga kééŋ Járiŋâ arrá ráŋ kɨ yé áísáŋ kɨŋa kééŋ atɨ́níeŋâ arrá ráŋ , ³⁴ Kɨ yé asá Wʉ́oŋ Ta̱bʉ́ŋ adis looŋ, Kɨ yé áláŋ taga yee ʉʉŋ see ínní. ³⁵ Kɨ yé áláŋ Taga ye sí a̱rrɨ ínní áláŋ naa yé jáwí . ³⁶ Ɨdɨ́ŋ ná bá Ótá bá kí dééŋ Dorá ɨŋŋɨ.Ótá nyét bá kí dééŋ Dorá kaɨŋ naŋ dééŋ kaɨŋɨ awʉ́ ná Galaŋ Wʉ́oŋ gee nama níŋ kaɨŋɨ Eyâ.