¹ Waraga man oa ki bot Paulo ma en latic pa Yecu Kricito, ma Lubaŋa olwoŋo me bedo lakwena, ka doŋ gimiye tic me tito lok me kwena maber ma oa ki bot Lubaŋa. ² Lok me kwena maber onoŋo yam Lubaŋa ociko pire con i lok ma lunebi yam gutito, dok bene onoŋo gicoyo woko i ginacoya maleŋ. ³ Lok me kwena man maber-ri gicoyo okemo Wode. I kit me kom, Wode-nu yam ginywale i kin likwayo pa Daudi. ⁴ Ento pi Cwiny Maleŋ Lubaŋa onyuto en obedo Wode i tic matek ma ocere kwede ki i kin jo muto, en aye Yecu Kricito Rwotwa. ⁵ Pire omiyo wan walimo kica pa Lubaŋa, ki tic me bedo lukwena wek wami dano ma i rok ducu gulub niye pi nyiŋe; ⁶ ma wun bene wutye i kingi, wun dano ma doŋ gilwoŋowu me bedo jo pa Yecu Kricito. ⁷ Bot wun jo ducu ma wutye i Roma ma Lubaŋa marowu, dok olwoŋowu me bedo jone kikome: Lubaŋa Wonwa ki Rwotwa Yecu Kricito omiwu kica ki kuc. ⁸ Mukwoŋo apwoyo Lubaŋana i Yecu Kricito pi wun ducu, pien niyewu doŋ gituco pire oromo wi lobo woko ducu. ⁹ Lubaŋa ma aworo ki i cwinya kun bene atito lok me kwena maber i kom Wode, en aye cadenna ma ŋeyo ni atuco nyiŋwu i legana i kare ducu ma pe akeŋ. ¹⁰ Alego ni ka twerre, ka Lubaŋa oye, olo myero anoŋ yo me bino botwu i kare-ni. ¹¹ Atye ka paro me nenowu mada, wek apok botwu mot mogo me cwiny me jiŋowu wek wubed matek. ¹² Gin ma aloko en aye ni wun kacel ki an wabikonnye lawaŋacel; en aye ni niyena bikonyowu, ki niyewu bene bikonya. ¹³ Gin ma amito wuŋe, utmegina, en aye ni onoŋo abedo ka tamo tyen mapol ni myero abin botwu, wek omiya anoŋ jo mogo ki i kinwu. Lurok mukene ducu, ento meno pe otwerre; kadi wa onyoo bene pud gigeŋa woko. ¹⁴ Atye ki banya bot Lugrik ki bot lurok ma gikwiya piny, bot luryeko ki bot lumiŋ; ¹⁵ en aye gin mumiyo atye ki miti me tito lok me kwena maber botwu bene wun jo ma wubedo i Roma. ¹⁶ Lewic pe maka pi lok me kwena maber, ma en aye teko pa Lubaŋa me laro jo ma tye ki niye, mukwoŋo Lujudaya, ka doŋ Lugrik bene. ¹⁷ Pien lok me kwena maber nyuto kit ma Lubaŋa kwano ni dano bedo ma kite atir, ma man timme pi niye keken, cakke ki acakkine o kwede wa i agikkine. Kit macalo gicoyo ni, “Dano ma kite atir pi niye bibedo kwo.” ¹⁸ Pien doŋ ginyuto akemo pa Lubaŋa woko ki i polo pi tim pa jo maraco ducu ma pe giworo Lubaŋa, ma gitye ka geŋo lok ada ni pe oti tic, pi timgi maraco. ¹⁹ Pien gin ma dano twero ŋeyone i kom Lubaŋa doŋ onen woko ka maleŋ botgi, Lubaŋa doŋ onyuto botgi. ²⁰ Cakke i kare ma giketo lobo, kit pa Lubaŋa ma onoŋo pe nen doŋ onen, kun giŋeye i jami ducu ma en otiyo, en aye tekone ma pe gik, ki dit ma en Lubaŋa tye kwede. Mumiyo dano doŋ pe gitye ki lok mo ma myero gupid pi geŋo ŋegi; ²¹ pien kadi bed onoŋo yam giŋeyo Lubaŋa, ento pe guwore macalo Lubaŋa, pe bene gupwoye, ento tamgi odwokogi i gin ma pe konyo, ki tam ma i cwinygi me miŋomiŋo bene doŋ ocido woko odoko col. ²² Gulwoŋŋe kengi ni gin luryeko, ento gulokke dok gudoko lumiŋ. ²³ Ci guloko deyo pa Lubaŋa ma pe to woko, kun giporo ki cal pa dano ma to, nyo ki cal pa winyo, nyo me pa lee, nyo me pa twol-gu. ²⁴ En mumiyo Lubaŋa otenyogi woko liyak i miti me caro ma tye i cwinygi, wek gubal kwede deyo me komgi kekengi. ²⁵ Guloko lok ada i kom Lubaŋa guwilo woko ki goba, kun giworo dok gitiyo bot ginaketa, ma ka woro ki tic bot ŋat ma oketogi, ma gipwoyo nakanaka. Amen. ²⁶ Pi tyen lok man omiyo Lubaŋa otenyogi i tamgi mugom ma gitamo ma kelo lewic. Kadi wa mongi bene guweko bedo ki co i kit ma ginywalogi ni gubed kwede-ni, ento dok gucako tiyo gin mapat. ²⁷ Ki co bene kit meno guweko bedo ki mon woko i kit ma ginywalogi ni myero gubed kwed-ni, ento mitigi dok ocako waŋo komgi calo mac, kun gimito ni gibed ki luwotgi, kun co buto ki co wadgi, ma meno tim me lewic mada, ento gilimo can malit i komgi pi kit balgi-nu. ²⁸ Doŋ kit macalo gin pe guneno gin mo ma konyogi i ŋeyo Lubaŋa-ni, Lubaŋa bene otenyogi woko i tamgi ma konnye pe, wek doŋ gutim gin ma pe myero. ²⁹ Onoŋo yam gupoŋ ki kwa bal mapol ducu, tim maraco, woro me lim, raccwiny. Onoŋo bene gupoŋ ki cwiny me nyeko, nek, daa, goba, ki kwarcwiny. Onoŋo bene gubedo lukwot dano, ³⁰ luyet dano, dok jo ma dag Lubaŋa. Gubedo luŋala, jo ma lyerre, jo ma wakke, lurot kit me timo tim maraco, jo ma pe winyo lunyodogi, ³¹ jo ma kwiya piny, jo ma pe genne, pe gitye ki mar i cwinygi, kica bene pe makogi i kom dano. ³² Kadi bed giŋeyo cik pa Lubaŋa ni jo ma timo gin macalo meno gibito, ento gin pe gitimo jami macalo meno atima keken, gipwoyo bene jo ma tye ka timone.