¹ Dok aneno lee mo ma oa ki i nam tye ka katti woko, ma tuŋe tye apar ki wiye bene onoŋo tye abiro, kun onoŋo lalukana apar me loc tye i tuŋe ducu; dok i wiye ducu onoŋo tye iye nyiŋ mo ma nyuto cac i kom Lubaŋa. ² Lee ma aneno-ni onoŋo obedo calo kwac, tyene obedo calo tyen ŋuu mager, ki doge onoŋo obedo calo dog labwor. Min kulu madit ca omiyo tekone, komkerre, ki twero madit ma en tye kwede bot lee meno. ³ Aneno wiye onoŋo nen calo gigoyo giketo ret iye ma gimito nekone woko, ento ret meno ma onoŋo giketo i wiye-ni doŋ ocaŋ woko. Lobo ducu olubo lee-nu ki ur madit ma pe wacce. ⁴ Dano gubedo ka woro min kulu ca pien onoŋo omiyo twerone woko bot lee-nu, dok bene guworo lee-nu kun giwacci, “Aŋa ma obedo calo lee man, dok aŋa ma twero lweny kwede?” ⁵ Gimiyo twero bene bot lee-nu me loko lok mogo me wakke ki me yeto Lubaŋa, dok bene gimiye twero me tiyo gin ma iye mito pi dwe pyeraŋwen wiye aryo. ⁶ Ci oŋamo doge me yeto Lubaŋa, kun yeto nyiŋe ki ka ma en bedo iye, kun yeto bene wa jo ducu ma gibedo i polo. ⁷ Dok bene gimiye twero ma ero lweny i kom jo maleŋ ki tayogi woko. Gimiye bene twero me loyo kaka ducu, dano ducu ki leb-gu, wa rok mapatpat ducu. ⁸ Jo ducu ma gibedo i lobo gibiworo lee-nu, dano acel acel ma onoŋo nyiŋe pe gicoyo i buk me kwo pa Latin romo ma yam gineko ca, cakke wa i acakki piny. ⁹ Ka ŋat mo ite tye myero owiny lok man. ¹⁰ Ka ce onoŋo yam giyubo ni gimak dano mo me bedo opii, ci gibitere woko i opii; ka ce ŋat mo neko dano ki pala lucwan, en bene myero gineke woko ki pala lucwan. Meno aye ka ma jo pa Lubaŋa myero gunyut iye kit ma giciro kwede can ki niyegi. ¹¹ Lacen dok aneno lee mukene ka katti i ki ŋom; onoŋo tuŋe tye aryo calo min kulu. ¹² En otiyo ki twero pa lee mukwoŋo ca ducu ma lee-nu bene neno, kun miyo lobo kacel ki jo ducu ma gibedo iye woro lee mukwoŋo, ma ret ma i wiye onoŋo doŋ ocaŋ woko-ni. ¹³ En otiyo tic mogo madito ma bedo me aura twatwal, dok bene miyo mac a ki i polo bino piny i lobo ma dano bene gineno. ¹⁴ Pi tic mogo ma onoŋo giyene me tiyone i nyim lee mukwoŋo ca, omiyo en obwolo dano ma gibedo i lobo, owaco botgi ni guyub cal mo obed ma ka-ka lee ma onoŋo yam giketo ret i kome ki pala lucwan, ma pud onoŋo obedo kwo-ni. ¹⁵ Giyene bene me miyo yweyo i cal lee ma giyubo ca wek omi cal lee-nu olok lok, dok bene wek omi jo ma pe gibiworo cal lee-nu ginekgi woko. ¹⁶ Dok bene en omiyo giketo poyo i kom dano ducu, jo matino ki jo madito, lulonyo ki lucan, jo ma gilone kengi wa ki opii bene, i ciŋgi tuŋ lacuc nyo i tur nyimgi. ¹⁷ Gitimo man wek dano mo pe owil jami, nyo kadi ki catone, ka pe tye ki poyo meno i kome, ma meno obedo nyiŋ lee ca, nyo namba me nyiŋe. ¹⁸ Gin man mito ryeko. ŋat ma niaŋ, ma wiye tiyo twero kwano namba pa lee-nu, pien nambane obedo namba pa dano, nambane tye miya abicel ki pyerabicel wiye abicel.