¹ Pi meno utmega, ma amaro dok ma aparo piwu twatwal, wucuŋ matek i Rwot kit meno, pien wun aye wubedo yomcwinya ki tok wiya me deyo, luwota. ² In Euodia ki in Cintuke, alegowu me bedo ki cwiny acel i Rwot. ³ In latic wadwa me ada bene, alegi ikony mon man ba, pien gin bene gulwenyo kacel kweda pi lok me kwena maber kacel ki Kelemente bene ki lutic wadiwa mukene ducu, ma doŋ gityeko coyo nyiŋgi woko i buk me kwo. ⁴ Wubed ki yomcwiny i Rwot kare ducu. Dok anwoyo waco botwu aye ni, Wubed ki yomcwiny. ⁵ Wuwek jo ducu guŋe mwolo ma wutye kwede. Rwot doŋ cok. ⁶ Pe wubed ki par i kom gin mo, ento i lok ducu wumi Lubaŋa oŋe gin ma wumito i lega ki i bako dogwu kacel ki miyo pwoc bene. ⁷ Man bimiyo kuc pa Lubaŋa ma kato ŋec pa jo ducu gwoko cwinywu ki tamwu maber i Kricito Yecu. ⁸ Me agikkine, utmega, wuket tamwu i kom lok macalo magi: gin ducu ma tye ada, gin ducu ma romo awora, gin ducu ma tye atir, gin ducu maleŋ, gin ducu ma mwonya, gin ducu ma dano pwoyo, ki gin mo maber makato, ma myero apaka. ⁹ Wuti gin ma nene wupwonyo, ma wugamo, ma wuwinyo, dok ma wuneno ki bota; ci Lubaŋa won kuc bibedo kwedwu. ¹⁰ An atye ki yomcwiny matek i Rwot pien kombeddi dok wuparo pira kit ma yam con. I adane-ni, pe wuweko paro pira, ento kare me konya aye obedo pe botwu. ¹¹ Dok bene pe akoko can, pien doŋ apwonnye woko ma aŋeyo ni, gin ma atye kwede romma. ¹² Aŋeyo bedo ki gin manok, dok bene aŋeyo bedo ki gin mabup. Adonyo i dul pa jo ma ŋeyo bedo ki gin mo ma ginoŋo i kare mo keken, yeŋo matek mukato kare, nyo ciro kec, bedo ki lonyo madwoŋ nyo bedo ki can. ¹³ Atwero jami ducu liweŋ pi Kricito ma miya teko. ¹⁴ Ento wun yam wutimo ber me ribbe kweda i can munoŋo odiya. ¹⁵ Dok wun jo Pilipi wuŋeyo maber ni, i kare ma yam aa i Makedonia i acakki tito lok me kwena maber pe tye lwak mo i kin jo muye Rwot ma guribbe kweda i yo man me miyo ki gamo mot, ento kono wun keken. ¹⁶ Kadi wa i kare ma atye i Tecalonika wucwalla kony ma mitte tyen aryo kulu. ¹⁷ Pe tyen lokke ni amito mot, ento amito nyayo magoba ma gibikwano botwu. ¹⁸ Atyeko gamo gin ma wumiya ducu, obedo dwoŋ mukato kare. Oromma doŋ maber, pien Epaprodito bene omiya mot ma wucwale kwede ni okel bota. Man gin aye gin ma ŋwece kur ma gityero bot Lubaŋa, ma en opwoyo, dok ma yomo cwinye. ¹⁹ Ento Lubaŋana bimiyowu jami ducu ma wumito, kun kwanyo ki i lonyone me deyo ma en tye kwede i Kricito Yecu. ²⁰ Deyo obed bot Lubaŋa Wonwa nakanaka. Amen. ²¹ Wumot jo pa Lubaŋa ducu i Kricito Yecu. Utmega ma gitye kacel kweda kany bene gumotowu. ²² Jo pa Lubaŋa ducu gumotowu, makatone jo me ot pa Cecar. ²³ Kica pa Rwotwa Yecu Kricito obed kwedwu.