¹ Waraga man oa ki bot Paulo ma lamabuc pi Kricito Yecu, ki bot ominwa Temceo. Bot Pilemon latic wadiwa ma wamaro ² gin ki laminwa Apia, ki Arkipo askari wadiwa, ki jo muye Kricito ma gicokke i odi: ³ Lubaŋa Wonwa ki Rwotwa Yecu Kricito omiwu kica ki kuc. ⁴ Apwoyo Lubaŋa kare ducu ka alwoŋo nyiŋi i legana, ⁵ pien abedo ka winyo pi marri ki pi niyeni ma itye kwede i kom Rwotwa Yecu ki bot jo pa Lubaŋa ducu. ⁶ Man omiyo alego ni, kit ribbe ma waribbe wan kwedi i kom niye odok matek ma romo niaŋowa matut i kom gin maber ducu ma watye kwede i Kricito. ⁷ Pien marri okella yomcwiny, dok ojiŋo cwinya, omera, pien ikweyo cwiny jo pa Lubaŋa. ⁸ Pi meno, kadi bed atye ki tekcwiny i Kricito ma miyo aciki acika me tiyo gin mo ma mitte, ⁹ ento pi marri-ni aneno ni ber alegi alega, an Paulo ma acuŋ ma ka Kricito Yecu, ma kombeddi bene doŋ adoko lamabuc pire. ¹⁰ Alegi pi latinna Onesimo, ma doŋ adoko wonne ki i buc kany. ¹¹ kare mukato onoŋo konnye koŋ obedo pe boti, ento kombeddi doŋ konnye dit boti ki bota bene. ¹² Doŋ acwalo en me dwogo boti enno, en doŋ odoko macalo dul koma kikome. ¹³ Onoŋo amito ni koŋ agwok en bota kany, wek omiya kony ma kakari ma kun pud atye i buc pi tito lok me kwena maber. ¹⁴ Ento pe amito ni atim gin mo ma kun noŋo in pe iye, wek berri pe obed macalo gin ma gidiyi iye adiya, ento obed pi yeyoni in kikomi. ¹⁵ Gwok nyo man en gin mumiyo en yam opokke woko kwedi pi kare manok, ni wek doŋ igame matwal, ¹⁶ pe dok macalo opii, ento makato opii woko, macalo ominwa ma wamaro. Makatone adada en pire tekka, ento ki tuŋ boti pire doŋ tek twatwal, macalo lakonnyi dok omeru bene i Rwotwa. ¹⁷ Kit meno, ka iŋeyo ni an abedo lawoti, myero igame i kit ma kono igama kwede. ¹⁸ Ka ce yam otimo gin mo marac i komi, nyo tye ki banyani mo, kwan magi ducu i wiya. ¹⁹ An paulo kikoma aye acoyo lok man ki ciŋa, abiculi. Pe awaco ni in bene itye ki banyana, en kwoni kikome. ²⁰ Iyo, omera, amito kony mo ki boti i Rwotwa. Kwe cwinya i Kricito. ²¹ Atye ki gen matek i komi ni ibiworo doga, oweko atye ka coyo boti lok man kun aŋeyo ni ibitimo makato ma awacci-ni. ²² Medo ki meno, yubba kicika me buto pa welo, pien atye ki gen ni legawu biweko gimiya botwu. ²³ Epapira mabuc wadiwa i Kricito Yecu omoti, ²⁴ kadi Marako, Aristako, Dema ki Luka lutic wadiwa bene gumoti. ²⁵ Kica pa Rwotwa Yecu Kricito obed kwedwu.