¹ Ento Yecu ocito wa i wi got Jeituni. ² Odiko con en dok odwogo i ot pa Lubaŋa; jo ducu gucokke bote, en obedo piny, opwonyogi. ³ Lupwonycik ki Luparicayo gukelo dako mo ma gimako ka timo abor. Gukete i dyere. ⁴ guwacce ni, “Lapwony, dako man gimako ka timo abor, ginoŋe iye kikome. ⁵ I cik Moses ocikowa ni, dano macalo man myero gicel woko ki got. I kono iŋolo niŋniŋ?” ⁶ Guwaco lok man pi teme, wek ginoŋ lok ma gibidote kwede. Ento Yecu okulle piny, ocoyo ŋom ki lwete. ⁷ Ka gumedde ka penye, en oille malo, owaccigi ni, “ŋat ma i kinwu ma pe ki bal okwoŋ cele ki got.” ⁸ En dok okulle piny, ocoyo ŋom ki lwete. ⁹ Ka guwinyo lok man, ci guket ki acel acel, kun ocakke ki i kom jo madito; ci Yecu odoŋ kene kun dako-nu pud ocuŋ i dyere. ¹⁰ Yecu oille, openyo dako ni, “Dako, gin kono gitye kwene? Pe tye ŋat mo ma oŋolo kop loyi?” ¹¹ En ogamo ni, “Pe tye ŋat mo, ladit.” Yecu owaco ni, “An bene pe abiŋolo kop loyi. Cit giri; cakke tin pe dok ibal.” ¹² Yecu dok oloko ki gin kun waco ni, “An a ceŋ me lobo; ŋat ma luba pe biwoto i piny macol, ento bibedo ki ceŋ me kwo.” ¹³ Luparicayo guwacce ni, “In giri ibolo lok me caden i komi keni, lok ma ibolo pe me ada.” ¹⁴ Yecu odok iye ni, “Kadi bed abolo lok i koma kena, lok ma abolo me ada, pien aŋeyo ka ma aa iye, ki ka ma acito iye, ento wun pe wuŋeyo ka ma aa iye, ki ka ma acito iye. ¹⁵ Wun wuŋolo kop i kit pa dano, ento an pe aŋolo kop i kom ŋat mo. ¹⁶ Kadi bed aŋol kop, ŋolo koppa tye atir, pien pe atye kena, ento wan ki ŋat ma oora. ¹⁷ I cikwu gicoyo ni, lok pa caden aryo bedo ada; ¹⁸ an abolo lok me caden i koma kena, dok Wora ma oora bene cadenna.” ¹⁹ Gipenye ni, “Woru tye kwene?” Yecu odok iye ni, “Wun pe wuŋeyo an, kadi Wora. Kono wuŋeya, kono wuŋeyo Wora bene.” ²⁰ En oloko lok man i kare ma pwonyo dano i ot pa Lubaŋa, i ot lim, ento pe tye ŋat mo ma omake, pien karene peya oromo. ²¹ En dok owaco ki gin ni, “An abicito woko. Wun wubiyenya, wubito i balwu; ka ma acito iye, wun pe wutwero bino iye.” ²² Lujudaya guwaco ni, “En binekke kene, pien owaco ni, ‘Ka ma acito iye wun pe wutwero bino iye’?” ²³ En owaccigi ni, “Wun wua ki piny, an aa ki malo; wun jo me lobo, an pe a dano me lobo. ²⁴ Atyeko wacciwu ni, wubito i balwu; pien wubito i balwu ka pe wuye ni an a en.” ²⁵ Gupenye ni, “In aŋa?” Yecu odok ki gin iye ni, “An a ŋat ma yam atittiwu con nia i acakki. ²⁶ Atye ki lok mapol me aloka i komwu, ki kop mapol me aŋola; ento ŋat ma oora en me ada, atito ki lobo gin ma doŋ awinyo ki bote.” ²⁷ Pe guniaŋ ni en tye ka tittigi pi Lubaŋa Won. ²⁸ Omiyo Yecu owaco ki gin ni, “Ka doŋ wutiŋo Wod pa dano malo, ci wubiniaŋ ni an a en, dok ni pe atiyo gin mo pira kena, ento aloko gin ma Wora opwonya iye. ²⁹ ŋat ma oora tye kweda; pe oweka kena, pien nino ducu atiyo gin ma iye mito.” ³⁰ Ka oloko lok man, jo mapol guye en. ³¹ Yecu owaco bot Lujudaya ma guye en ni, “Ka wumoko i lokka, ci wun lupwonnyena adada; ³² miyo wubiŋeyo lok me ada, lok me ada bigonyowu.” ³³ Gudokke iye ni, “Wan likwayo pa Abraim; ma naka yam peya wabedo opii pa ŋatti mo. Man doŋ in iwaco niŋniŋ ni, ‘Gibigonyowu’?” ³⁴ Yecu odokkigi iye ni, “Adada awacciwu ni, dano ducu ma timo bal, en opii me bal. ³⁵ Opii pe bedo i ot nakanaka, ento latin anywalli bedo gire nakanaka. ³⁶ Pi meno, ka Wod ogonyowu gibigonyowu atika. ³⁷ Aŋeyo ni wun likwayo pa Abraim; ento wumito neka, pien lokka pe noŋo kabedo i iwu. ³⁸ An aloko gin ma aneno ki bot Wora, wun wutiyo gin ma wuwinyo ki bot wonwu.” ³⁹ Gudok iye ni, “Abraim en wonwa.” Yecu owaccigi ni, “Kono wun litino pa Abraim, kono wutiyo macalo Abraim. ⁴⁰ Ento koni wumito neka, an dano ma atittiwu lok me ada ma awinyo ki bot Lubaŋa; Abraim yam pe otiyo kit meno. ⁴¹ Wun wutiyo gin ma wonwu otimo.” Gidok iye bote ni, “Wan pe ginywalowa i abor; watye ki wonwa acel, en aye Lubaŋa.” ⁴² Yecu ogamo doggi ni, “Kono Lubaŋa wonwu, kono wumara, pien an aa ki bot Lubaŋa, koni doŋ atye kany; pe abino pira kena, en aye oora. ⁴³ Piŋo pe wuniaŋ lok ma awaco? Pien pe wutwero winyo lokka. ⁴⁴ Wun wua ki bot wonwu, Catan, wumito cobo gin ma wonwu mito. Nia i acakki piny en con lanek, pe cuŋ i ada, pien lok me ada pe i iye. Ka en loko lok goba, en lok macalo kite tye, pien en lagoba, doki won goba. ⁴⁵ Ento pe wuye an, pien an aloko lok me ada. ⁴⁶ Aŋa i kinwu ma nyuto lok me bal i koma ma loya? Ka atito lok me ada, piŋo pe wuye an? ⁴⁷ ŋat ma oa bot Lubaŋa winyo lok pa Lubaŋa; gin ma omiyo wun pe wuwinyo, pien pe wua bot Lubaŋa.” ⁴⁸ Lujudaya gudokke iye ni, “Wan pe wawaco kakare ni, in Lacamaria, itye ki cen?” ⁴⁹ Yecu odok iye ni, “An pe atye ki cen; ento aworo Abana, wun pe wuwora. ⁵⁰ An pe ayenyo deyona pira kena; tye ŋat ma yenyo ma kakara, en aye biŋolo kop. ⁵¹ Adada awacciwu ni, ka ŋat mo mako lokka, pe bito matwal.” ⁵² Lujudaya gudokke iye ni, “Koni doŋ waniaŋ ni itye ki cen. Abraim yam oto, ki lunebi bene guto, ento in iwaco ni, ‘Ka ŋat mo mako lokka, ci pe bibilo to matwal’. ⁵³ In i dit ikato kwarowa Abraim, ma ceŋ oto-ni? Lunebi bene guto, do! In ikette ni in aŋa?” ⁵⁴ Yecu ogamo ni, “Ka aketo deyo i koma kena, deyona mwa; Wora aye keto deyo i koma, en ma wun wuwaco ni Lubaŋawu-ni. ⁵⁵ Wun pe wuŋeye; ento an aŋeye. Ka kono awaco ni pe aŋeye, kono adoko lagoba macalo wun; ento an aŋeye, amako lokke. ⁵⁶ Kwarowu Abraim yam obedo ki yomcwiny ni ebineno ninona; ci oneno, cwinye obedo yom matek.” ⁵⁷ Lujudaya guwacce ni, “In ma mwakani bene peya oromo pyerabic-ci, ineno Abraim?” ⁵⁸ Yecu ogamo doggi ni, “Adada awacciwu ni, ma Abraim pud pe, onoŋo doŋ an atye.” ⁵⁹ Omiyo gukwanyo got me cele; ento Yecu okanne, ci okato woko ki i ot pa Lubaŋa.