¹ Kombeddi gin ma pire dit ma watye ka lokone kany en ene: Wan watye ki ajwaka madit macalo man, ma doŋ obedo i kabedo me deyo yo tuŋ acuc i ŋet komker pa Won Deyo Madit i polo. ² En tiyo ticce i kabedo maleŋ, i kema me ada ma Rwot aye oguro, ento pe dano. ³ Ajwaka madit acel acel giyere me miyo mot ki tyero gitum bot Lubaŋa; pi meno mitte bene ni Yecu myero obed ki gin mo me atyera. ⁴ Kono nene en tye i lobo kany, kono pe obedo ajwaka wacel, pien ajwagi doŋ tye ma gimiyo mot kun gilubo cik pa Moses. ⁵ Ento gin ma gitiyo giporo ki tipo ki cal keken me kabedo maleŋ ma tye i polo; pien i kare ma Moses doŋ yam cok guro kema, Lubaŋa ocike ni, “Nen ni itiyo jami ducu kun ilubo kit cal ma ginyutti ki i wi got.” ⁶ Ento kit macalo tye, Kricito doŋ onoŋo tic maber atika makato megi-ni woko, rom ki kit gicikke ma en oyubo ma obedo ber matek makato mukene macon ca, pien Lubaŋa omoko kun onoŋo ociko pi miyo jami mabeco makato. ⁷ Kono ka bal mo obedo pe i gicikke mukwoŋo, kono onoŋo gicikke mo me aryo doŋ pe mitte. ⁸ Ento Lubaŋa onoŋo bal tye i komgi, pien owaco ni, “Kare biromo, man lok pa Rwot, ma abimoko iye gicikkena manyen ki jo me doggola pa Icrael, ki jo me doggola pa Juda. ⁹ Pe dok bibedo calo gicikke ma yam aketo ki kwarogi ca, i kare ma yam amako kwede ciŋgi, ci akwanyogi woko ki i lobo Ejipt; pien gin yam pe gulubo gicikkena, omiyo an bene atenyogi woko ata, man lok pa Rwot. ¹⁰ Man aye gicikke ma abiketo ki jo me doggola pa Icrael ka kare meno oromo, Rwot ma awaco: Abiketo cikka ducu i tamgi, abicoyo bene bedo i cwinygi. An abibedo Lubaŋagi, gin gibedo jona. ¹¹ ŋat mo doŋ pe bipwonyo lutugi, dok ŋat mo bene pe biwaco ki ominne ni, ‘ŋe Rwot,’ pien gin ducu gibiŋeya, cakke ki i kom jo matino ma i kingi, o kwede wa i kom jo madito. ¹² Pien abitimo botgi kica i timgi maraco ducu, pe dok abipo i kom balgi mo kadi ki acel.” ¹³ Ka oloko pi gicikke manyen, en tamo pi gicikke mukwoŋo ca macalo gin ma karene okato woko. Gin ma karene doŋ okato, ma oti woko bene, noŋo doŋ cok rwenyo.