¹ Cik pa Moses gire tye iye tipo keken me jami mabeco me kare me anyim, pe calgi kikome. Pi cik dano gibedo ka kelo gitum ma kitgi acel nakanaka, mwaka ki mwaka; en doŋ pe tye ki twero mo matwal me loko jo ma bino bot Lubaŋa gudok jo mabeco muteggi. ² Ka nene tye kit meno, kono gitum pe doŋ ogik woko? Kono jo ma woro Lubaŋa doŋ gilwoko balgi woko matwal, kono pe dok gimedde me bedo ki kit ŋec mo i cwinygi ni gin lubalo. ³ Ento gitum magi bedo ka poyo wi dano i balgi mwaka ki mwaka. ⁴ Pien remo twoni ki remo dyegi pe twero kwanyo bal woko wacel. ⁵ Pi lok man, i kare ma Kricito obino i lobo, en oloko ni, “In giri pe imito gitum kadi gityer, ento iketo koma tye. ⁶ Ii pe obedo yom pi gitum awaŋa ki gitum ma gityero pi bal. ⁷ Ka doŋ awaco ni, ‘An a ene, doŋ abino ka cobo mitini, in Lubaŋa,’ macalo yam gicoyo i koma i buk adola.” ⁸ Mukwoŋo en oloko ni, “In pe imito gitum, kadi mot ma gityero, nyo gitum awaŋa ki gitum pi bal, cwinyi bene pe yom iye,” ma gin jami ma gityero pi cik. ⁹ Ka dok oloko ni, “An a ene, doŋ abino ka cobo mitini.” Ojwayo mukwoŋone-ni woko wek omi ekel me aryone. ¹⁰ Doŋ pi mitine meno, omiyo gilonyowa wadoko leŋ pi Yecu Kricito mumiyo kome ma ka gitum kicel keken ma otyeko lok woko ducu. ¹¹ Ajwaka acel acel cuŋ i dog ticce nino ducu kun tyero kit gitum acel-lu kare ki kare ma pe tye ki twero mo matwal me kwanyo bal. ¹² Ento Kricito yam otyero gitum acel keken pi bal, pi kare ducu, ka doŋ obedo piny i ŋet Lubaŋa tuŋ acuc i kabedo me deyo. ¹³ Nia wa i kare ca en tye ka kuro nio ka gimiyo lukworre doko kom laten tyene, ¹⁴ pien gitumme acel-lu omiyo jo ma en olonyogi bedo leŋ gudoko jo mabeco muteggi matwal. ¹⁵ Cwiny Maleŋ bene omiyo cadenne botwa, pien ka doŋ oloko ni, ¹⁶ “Man aye gicikke ma abiketo ki jo me doggola pa Icrael, ka kare meno okato, man lok pa Rwot: Abiketo cikka ducu i cwinygi, kun acoyo bedo i tamgi.” ¹⁷ ka dok omedde kun loko ni, “Pe dok abipo i kom balgi ki timgi maraco.” ¹⁸ Ka ma weko bal tye iye, gitum mo pi bal doŋ pe mitte. ¹⁹ Pi meno, utmegina, wan doŋ watye ki yo me donyo i kabedo maleŋ ki tekcwiny pi remo pa Yecu. ²⁰ En oyabo botwa yo manyen, yo makwo, me donyo i ŋe boŋo kicika; yo meno aye en kome. ²¹ Kit macalo doŋ watye ki ajwaka madit ma loyo ot pa Lubaŋa. ²² myero doŋ wanyiku cok bot Lubaŋa ki cwiny me ada, kun niye bene doŋ odonyo matut i cwinywa, ma doŋ cwinywa leŋ, pien ŋec me gin maraco ma yam watimo doŋ gikwanyo woko, dok bene komwa doŋ gilwoko woko ki pii maleŋ. ²³ Wamoku matek likiŋ i gen ma watuco, laboŋo tagge atata, pien ŋat ma ocikowa-ni lagen. ²⁴ Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, ²⁵ kun pe waweko cokke kacel, kit macalo jo mogo doŋ guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca doŋ tye ka nyiko cok-ki. ²⁶ Pien ka watimo bal akaka ma doŋ noŋo watyeko limo ŋec i kom lok me ada, gitum mo pe dok odoŋ ma gityero pi balwa. ²⁷ Odoŋ kuro ŋolo kop keken kun watye ki lworo madwoŋ, ki mac mager ma bityeko dano ma gipyem ki Lubaŋa. ²⁸ Dano ma pe lubo cik pa Moses gineko aneka laboŋo kica mo, ka ce lok oloye i nyim caden aryo nyo adek. ²⁹ Doŋ wutamo ni can ma rom mene ma gibiketo i kom ŋat ma ocayo Wod pa Lubaŋa, dok ma opyedo remo me gicikke pa Lubaŋa ma gilonye kwede me bedo maleŋ, dok ma oŋalo Cwiny Maleŋ me kica pa Lubaŋa? ³⁰ Pien wan waŋeyo ŋat ma oloko ni, “An aye abiculo kwor, abiculo waŋe lacen,” dok ni, “Rwot biŋolo kop i kom jone.” ³¹ Bedo gin me lworo twatwal me poto i ciŋ Lubaŋa makwo. ³² Ento koŋ doŋ wupo i kare mukato, kit ma yam wuciro kwede, kun wulwenyo ki lwak cam madwoŋ, i kare ma doŋ ceŋ pa Lubaŋa otyeko ryeny omenyowu. ³³ Kare mukene yam giyetowu dok giunowu i nyim lwak, kare mukene bene wuribbe ki jo ma gitimogi kit meno. ³⁴ Pien kica yam omakowu i kom mabuc, dok bene cwinywu obedo yom kadi giyako jamiwu, pien wun kikomwu onoŋo doŋ wuŋeyo ni wutye ki jami mukene mabeco makato magi, dok ma ri nakanaka. ³⁵ Pi meno pe wubwot tekcwiny woko, pien tye ki bakacic madit ma wubilimo. ³⁶ Mito wubed kun wuciro, wek omi wuti gin ma Lubaŋa mito, ci doŋ wunoŋo gin ma yam en ociko pire. ³⁷ Macalo yam en oloko ni, “Odoŋ kare manok mo, ci ŋat ma bino ca bibino woko oyotoyot ma pe bigalle. ³⁸ Doŋ danona ma kite atir bibedo kwo pi niye; ento ka odok woko cen, cwinya pe bibedo yom i kome.” ³⁹ Ento wan pe watye i kin jo ma dok cen, ka girwenyo woko matwal-li; wan watye i kin jo ma gitye ki niye, ma en aye doŋ gwoko kwogi.