¹ Yam con Lubaŋa oloko ki kwarowa i dul lok mapol dok i yo mapatpat, kun loko ki i dog lunebi; ² ento i kare man ma lacen-ni en doŋ oloko kwedwa i Wode. Jami ducu ma tye, Lubaŋa ceŋ otiyogi pi twer pa Wode, ma en oyubo ni myero obed won jami ducu. ³ En dero me deyo pa Lubaŋa, cal pa Lubaŋa kikome tye i kome, dok en bene ma tiŋo jami ducu ma tye, ki teko me lokke. Ma doŋ en otyeko tic me lwoko bal, en obedo piny i kabedo me deyo tuŋ acuc i ŋet Won Deyo Madwoŋ ma tye malo i polo. ⁴ kun doŋ en odoko ladit mada makato lumalaika ducu, ma rom aroma ki kit ma nyiŋ ma gimiye ber matek makato megi woko. ⁵ Lubaŋa yam koŋ owaco ki lamalaika mo ni, “In i Woda, tin doŋ anywali”? Nyo dok ni, “An abibedo Wonne, en bibedo Woda”? ⁶ Dok bene i kare ma kelo latin kayo i lobo en owaco ni, “Lumalaika pa Lubaŋa ducu myero guwore.” ⁷ I kom lumalaika, Lubaŋa oloko ni, “En loko lumalaikane doko yamo, luticce en loko doko leb mac.” ⁸ Ento i kom Wode en oloko ni, “Komkerri, in Lubaŋa, biri nakanaka, odoo kerri en odoo me ŋolo kop atir. ⁹ In imaro kit ma atir, cwinyi dag tim marac; pi meno Lubaŋa, ma en Lubaŋani, owiri ki moo, moo me yomcwiny madwoŋ, makato luwoti ducu.” ¹⁰ En dok oloko ni, “In Rwot wiati iketo guti me lobo, polo bene en tic me ciŋi. ¹¹ Gin birwenyo woko oyot, ento in iri nakanaka; gin ducu gibiti macalo boŋo, ¹² ibidologi woko macalo ibano koti, gibilokogi macalo ginaruka. Ento in ibedo ma kiti tye acel, mwakani pe bigik.” ¹³ Lubaŋa yam owaco ki lamalaika mo ni, “Bed i ŋeta tuŋ acuc i kabedo me deyo, nio ka abimiyo lukworri gidoko kom laten tyeni?” ¹⁴ Lumalaika kono dok gubedo aŋagi? Gin ducu gubedo cwiny mogo ma tiyo tic pa Lubaŋa; en orogi ka konyo jo ma binoŋo larre.