¹ Waraga man oa ki bot Paulo ma en lakwena pa Kricito Yecu pi mit pa Lubaŋa. Bot jo pa Lubaŋa ma tye i Epeco, ma gin aye jo ma genne i Kricito Yecu: ² Lubaŋa Wonwa ki Rwot Yecu Kricito omiwu kica ki kuc. Gum me cwiny ma gimiyo bot jo ma tye i Kricito. ³ Myero gipwo Lubaŋa, Won Rwotwa Yecu Kricito, pien i Kricito doŋ omiyowa kit gum me cwiny ducu ma tye i polo. ⁴ En oyerowa wa con i Kricito ma pud peya ocako keto lobo, wek wabed jo maleŋ i nyime laboŋo bal mo i komwa pi mar mere. ⁵ Lubaŋa pi mitte kene onoŋo doŋ oyubo con ni wan myero wadok litinone pi tic pa Yecu Kricito. ⁶ En otimo man wek wapak motte me kica me deyo madit ma en omiyo ki wan pi Wode ma emaro. ⁷ Pi remo me to pa Wode ma ocwer piwa, doŋ gikokowa woko, giweko balwa, kit macalo lonyo me kicane dwoŋ kwede, ⁸ ma en omiyo botwa madit lawaŋacel, Pi ryekone ki pi niaŋŋe ducu. ⁹ en doŋ omiyo waŋeyo muŋ me mit mere, kun lubo yub maber ma ceŋ en oyubo me cobo i Kricito. ¹⁰ Yub pa Lubaŋa ma en bicobo ka karene oromo, en aye me coko jami ducu ma tye i polo ki i wi lobo, ki ribogi woko kacel i Kricito. ¹¹ Pien jami ducu tine kun lubo tam pa Lubaŋa ki mitte. En oyerowa i Kricito pi tamme, wek wan wabed jone, kun onoŋo yam en doŋ oyubo woko con ni, ¹² wan Lujudaya ma wan aye jo mukwoŋo bedo ki gen i kom Kricito, myero wami dano gupak deyo pa Lubaŋa. ¹³ Oyero wun Lurok bene ma wutye i Kricito, ma yam wuwinyo lok ada, ma en aye lok me kwena maber me larrewu. Wun wuye en, en mumiyo gimiyowu Cwiny Maleŋ ma con Lubaŋa ociko pire-ni, wek obed macalo lanen ma mere ma doŋ giketo i komwu. ¹⁴ En aye gin ma gijeŋo ma nyuto ni wabinoŋo gin ducu ma Lubaŋa oyubbe me miyo botwa i kare ma Lubaŋa bikoko jone kikome, ma bimiyo dano gipako deyone matek. ¹⁵ Pi lok man, cakke ma awinyo pi niyewu i kom Rwotwa Yecu, ki pi mar ma wumaro kwede jo pa Lubaŋa ducu, ¹⁶ omiyo pe akeŋ pwoyo Lubaŋa piwu, kun alwoŋo nyiŋwu bene i legana. ¹⁷ Alego Lubaŋa pa Rwotwa Yecu Kricito, Lubaŋa Won deyo, wek omiwu cwiny me ryeko, dok bene onyutwu ŋec i kome kekene. ¹⁸ Dok bene alego ni en omeny tamwu, wek wuniaŋ i kom gen ma en olwoŋowu iye, ki i kom mot me lonyo ki deyo madwoŋ ma en miyo bot jone wek obed megi matwal. ¹⁹ Alego bene wek wuniaŋ i kit ma tekone madwoŋ twatwal ma pe pimme-ni tye ka tic kwede i iwa, wan jo ma waye Yecu. Man rom aroma ki tic madit me twer ma en tye kwede, ²⁰ ma ceŋ ocero kwede Kricito ki i kin jo muto, ka okete obedo i kabedo me deyo ka ŋete tuŋ acuc i polo. ²¹ En doŋ tye malo, loyo kit loc ducu ki twero ki teko ki dito ducu ma tye i polo, ki nyiŋ mo ma oywek i lobo me kare man ki i lobo me kare ma bibino-ni bene. ²² Lubaŋa doŋ oketo jami ducu i te twer pa Kricito wek olo, dok omiye bot lwak jo muye en wek en obed macalo wic, kun loyo jami ducu maber. ²³ Lwak jo ma guye Yecu gin aye kom Kricito, ma miyo en opoŋ otum maber woko licwic, kun Kricito bene opoŋ i jami ducu ma i kabedo ducu.