¹ Aciki i nyim Lubaŋa ki i nyim Kricito Yecu ma biŋolo kop pa jo makwo ki jo muto, dok pi dwogone ki pi locce, ni meno, ² tit lok pa Lubaŋa, cuŋ iye matek i kare maber ki i kare marac, mi dano guniaŋ maber, jukgi kun idiyo cwinyi i pwony kare ducu. ³ Pien kare tye ka bino ma dano doŋ pe biciro pwony me ada, ento itgi bibedo ka yilo ayila, kun gicoko lupwony ma twero pwonyogi ki gin ma gimito winyone. ⁴ Gibiloko ŋegi wek pe giwiny lok ada, kun giŋak woko giwirre i lok ma tere pe. ⁵ Ento in myero ibed ma igwokke i kare ducu; cir can ka opoto i komi, ti tic me tito lok me kwena maber, dok icob ticci ducu kakare. ⁶ An doŋ dano cok neka woko calo gitum me atyera i wi keno tyer; karena doŋ oo me weko lobo man. ⁷ Doŋ atyeko lwenyo lweny maber, atyeko cobo ŋwecca, dok agwoko bene niye. ⁸ Kombeddi doŋ gikano pira mot me kit atir, ma Rwot ma ŋolo kop atir bimiya i Nino maca; pe bota keken, ento bot jo ducu ma doŋ cwinygi tye ka paro pi dwogone bene. ⁹ Tem ki tweroni ducu me bino bota oyotoyot. ¹⁰ Pien Dema doŋ oweka woko pi maro jami me lobo-ni, ocito gire woko i Tecalonika; Krecen ocito mere i Galatia, ki Tito ocito i Dalmatia. ¹¹ Luka kene aye odoŋ tye kweda kany. Wubin wun ki Marako, pien en ber twatwal dok konya. ¹² Tukiko aoro ocito i Epeco. ¹³ Ka ibino, kella ki boŋo ma yam aweko i Teroa tuŋ pa Karpo. Kwokka bene bukka, makatone maca me del ca. ¹⁴ Alegijanda latet mola otima marac twatwal; Rwot bicule pi timme-nu. ¹⁵ In bene myero item gwokke i kom nyer-ru, pien en yam opyem ki lokwa matek mada. ¹⁶ I pidona mukwoŋo, dano mucuŋ pira obedo pe. Jo ducu guriŋo gutenya woko liyak. Lubaŋa myero pe okwan lok man i wigi. ¹⁷ Ento Rwot ocuŋo ka ŋeta, ka doŋ omiya teko me tuco lok kakare, wek Lurok ducu guwiny; olara kit meno ki i dog labwor. ¹⁸ Rwot bikonya miyo aa woko ki i gin maraco ducu, kun lara wek ao i kerre me polo. Deyo obed bote nakanaka. Amen. Mot me agikki. ¹⁹ Pricika gin ki Akwila, ki jo me ot pa Oneciporo. ²⁰ Eracto mere yam odoŋ i Korint; Tropimo aweko two i Mileto. ²¹ Ket tek io ma kare me koyo peya ocakke. Yubulo omoti, kadi ki Puden ki Lino, ki Kalaudia, kacel ki utmegiwa ducu. ²² Rwot obed kwedi. Kicane obed kwedwu.