¹ Waraga man oa ki bot Paulo ma lakwena pa Kricito Yecu pi mit pa Lubaŋa, ma lubo cikkene me miyowa kwo ma tye i Kricito Yecu. ² Bot Temceo latinna ma amaro: Lubaŋa Won ki Kricito Yecu Rwotwa omini gum, kica ki kuc. ³ Apwoyo Lubaŋa ma atiyo bote tic ki iya maleŋ, macalo kwarowa yam gutiyo bote, kun alwoŋo nyiŋi i legana me kare ducu. ⁴ Ka apo pig waŋi, miyo i dyeceŋ ki dyewor aparo me neni, wek apoŋ ki yomcwiny. ⁵ Apo i kom niyeni ma goba pe iye, ma yam koŋ okwoŋo bedo bot dani Loi, ki meni Yuneki, ma aŋeyo atir ma pe akalo akala ni tye boti bene. ⁶ Man omiyo apoyo wii wek iti ki mot me kica ma yam Lubaŋa omii pi keto ciŋa i wii, ma doŋ odoko macalo mac ma doŋ okwe woko; buki wek olyel. ⁷ Pien Lubaŋa yam pe omiyowa cwiny me lworo, ento omiyowa cwiny me teko ki me mar ki me gwokke kenwa. ⁸ Pi meno lewic pe omaki me miyo caden i kom Rwotwa, lewic bene pe omaki i koma, an ma abedo lamabucceni, ento ribbe kwedwa i ciro can pi lok me kwena maber, i teko pa Lubaŋa. ⁹ En olarowa dok olwoŋowa me bedo jo maleŋ, pe pi tic mogo ma wan watiyo, ento pi lubo gin ma en kikome oyubo, ki pi kicane ma yam en omiyo botwa i Kricito Yecu i acakki piny. ¹⁰ Kombeddi doŋ ginyuto woko botwa i bino pa Lalarwa Kricito Yecu ma doŋ okwanyo to woko matwal, ci omiyo kwo ma bedo matwal onen woko ka maleŋ pi lok me kwena maber. ¹¹ Pi lok me kwena maber-ri, yam giketa abedo latit-lok, lakwena ki lapwony bene. ¹² Man en gin mumiyo aneno can kit macalo atye ka nenone wa i kare-ni. Ento lewic pe maka gira, pien aŋeyo ŋat ma aye, dok bene ageno atir ni, en twero gwoko gin ma omiyo i ciŋa nio i Nino maca. ¹³ Lanenni me aluba myero obed lok me ada ma yam iwinyo ki bota, kun ilubo kwede niye ki mar ma tye i Kricito Yecu. ¹⁴ Gwok gin maber ma gimiyo i ciŋi pi teko pa Cwiny Maleŋ ma bedo i iwa. ¹⁵ In iŋeyo ni, jo ducu ma tye i Acia doŋ guloko ŋegi woko bota. Pugelo gin ki Kermogen gitye i kingi. ¹⁶ Rwot myero otim kica i kom paco pa Oneciporo, pien yam obedo ka dwoko cwinya tyen mapol. Lewic pe omake pi twec ma gitweya kwede ki nyor, ¹⁷ ento i kare ma en oo i Roma oyenya matek nio ka onoŋa. ¹⁸ Rwot myero omi en onoŋ kica ma a bote i Nino maca. Dok in bene iŋeyo maber mada kit kony ma en obedo ka miyone i Epeco.