¹ Man doŋ tyen me adek ma abio kwede botwu. Caden ma romo aryo nyo adek aye myero gumok lok ducu ma gikelo me alara, macalo yam gicoyo. ² Lok man yam atito botwu con i kare ma atye i wotta me aryo, dok anwoyo wacone kombeddi ma doŋ atye cen, bot jo ma yam gubalo, ki bot jo mukene ducu, ni meno, ka dok adwogo botwu pe abitimo kica ki ŋat mo. ³ pien wubimito neno gin ma moko ni Kricito aye ma tye ka lok i doga. En pe goro ki botwu, ento nyuto tekke i iwu. ⁴ Yam gigure i kom yatariya pi gorone, ento kombeddi en kwo pi tek pa Lubaŋa. Kadi wan bene wagoro i en, ento i bedowa kwedwu wabibedo kacel kwede pi tek pa Lubaŋa. ⁵ Koŋ wuŋine kekenwu, wek wunen ka ce wucuŋ matek i niyewu. Wutemme kekenwu. Pe wuniaŋ ni Yecu Kricito tye i iwu, tekke ka wubedo dano ma Lubaŋa pwoyo? ⁶ Ageno ni wubiniaŋ maber ni wan mere pe wabedo jo ma pe gipwoyogi. ⁷ Walego Lubaŋa piwu ni pe wutim gin mo marac, pe me nyuto ni wan jo ma Lubaŋa pwoyo, ento wamito ni wun wutim gin maber, kadi bed wanen calo jo ma en pe opwoyo. ⁸ Pien wan pe watwero tiyo gin mo ma pe rwatte ki lok ada, ento watwero tiyo gin ma rwatte ki gin ma tye ada keken. ⁹ Cwinywa yom ka wagoro ma noŋo wun wutek, dok walego piwu ni wudok jo muteggi. ¹⁰ Gin mumiyo acoyo lok ma pud atye ka mabor kwedwu, wek pe abed ger i komwu ka abino, kun atiyo ki twero ma yam Rwot omiya wek akonywu me doŋo, ento pe me dwokowu cen. ¹¹ Me agikkine, utmegina, doŋ wubedi. Wuyub kitwu doŋ obed maber, dok bene myero wuwiny kokona pi gin ma alegowu pire. Wubed ki cwiny acel, wubed bene ki kuc, ci Lubaŋa ma won mar ki kuc bibedo kwedwu. ¹² Wumotte kekenwu ki mot me mar. ¹³ Lwak pa Lubaŋa ducu gumotowu. ¹⁴ Kica pa Rwotwa Yecu Kricito, ki mar pa Lubaŋa, ki ribbe ma Cwiny Maleŋ kelo obed kwedwu ducu.