¹ Jo ducu ma gubedo opii, myero guti ki luditogi macalo jo ma romo awora i yo ducu, wek ŋat mo pe oyet nyiŋ Lubaŋa nyo pwonywa. ² Jo ma luditogi doŋ guye Rwot, myero pe gukwer worogi, ni pien gin doŋ gibedo omego, ento myero gumedde me tiyo tic maber makato botgi, pien jo ma gikonyo ki ticgi gubedo jo muye Rwot dok jo ma gin maro. Pwony lok magi dok icuk cwiny dano iye. ³ Ka ŋat mo pwonyo mere lok mapat kun pe lubo lok ada pa Rwotwa Yecu Kricito pi pwony me diniwa, ⁴ noŋo en okette malo kene ki wakke, ento pe ŋeyo gin mo kadi ki acel. Iye opoŋ ki par maraco me pyem ki daa i kom nyiŋ lok mogo; doŋ lok macalo meno a iye nyeko, pyem, yet ki par maraco ma miyo gen rwenyo woko i kin dano. ⁵ Dok bene miyo jo ma ryekogi oballe, ma mako lok me ada oloyogi woko, gibedo ka wo awoya nono, kun gitamo ni dini aye yo me noŋo lonyo. ⁶ Lonyo dit twatwal i dini ka ce iyeŋ ki gin mo keken ma itye kwede. ⁷ Pien wan yam pe wakelo gin mo i lobo kany, dok bene pe wabitwero tero gin mo ka waa ki i lobo. ⁸ Ento ka watye ki cam ki ginaruka, jami magi romowa gire. ⁹ Ento jo ma mito bedo lulonyo miyo Catan bitogi ci gipoto i bal, ka doŋ gimoko i owic pa Catan pi mitgi mapol me miŋo ma tye ka unogi, miyo girwenyo dok gito woko matwal. ¹⁰ Pien maro lim en aye acakki me gin maraco ducu; man en gin ma omiyo jo mogo gua woko ki i niye, ka doŋ gurwatte ki lwak can mapol ata mucorre i komgi. ¹¹ Ento in dano pa Lubaŋa, leŋ yo ki jami meno, ket cwinyi i kit ma atir, i lworo Lubaŋa, i niye, i mar, i diyo cwiny ki i mwolo. ¹² Lweny lweny maber me niye; mak kwo ma pe tum matek ma yam gilwoŋi iye i kare ma ituco niyeni i nyim lucaden mapol ata. ¹³ Aciki i nyim Lubaŋa ma miyo kwo bot jo ducu, ki i nyim Yecu Kricito, ma otuco niyene maber i kare ma miyo lok me cadenne i nyim Pontio Pilato: ¹⁴ Gwok cik ma gimiyi, bed laboŋo kit roc mo nyo lok mo ma gijuki iye, nio ka Rwotwa Yecu Kricito binen. ¹⁵ Lubaŋa ma gipwoyo, en acel keken aye Won Twer, Kabaka pa luker ducu, Rwot pa rwodi, en binyuto man ka kare kikome doŋ oromo. ¹⁶ En Lubaŋa acel keken ma pe to, ma bedo i Leŋo mo ma ŋat mo pe romo nyiko cok kwede, cakke con ŋat mo pud pe munene, dok bene dano mo pe twero nene. Woro ki twer ma pe gik obed bote. Amen ¹⁷ Cik lulonyo me kare man ni guwek wakke, dok bene pe guket gengi i kom lonyo ma pe genne, ento guket gengi i kom Lubaŋa ma miyowa jami ducu mabup ma yomo cwinywa. ¹⁸ Myero guti tic mabeco, gubed lulonyo i timo ber bot dano, i poko jami, ki i miyo mot ki yomcwiny. ¹⁹ Ka gutimo meno, noŋo gukano mono maber pigi kengi pi kare me anyim, wek gumak kwo ma en aye kwo kikome. ²⁰ Ai Temceo, gwok gin ma yam doŋ gimiyo i ciŋi. Gwokke i boko lok mogo ma pe me woro Lubaŋa, ki i pyemmogo ma a ki gin ma gilwoŋo gobagoba ni, “ŋec”, ²¹ pien jo ma giwaco ni gitye ki kit ŋec meno gibayo piny nono i lok ma mako niye Kica pa Lubaŋa obed kwedi.