¹ Waraga man oa ki bot Petero, lakwena pa Yecu Kricito. Bot jo pa Lubaŋa ma guket woko ata, ma gubedo welo i Ponto, Galatia, Kapadokia, Acia ki Bitunia, ² ma Lubaŋa Won aye muyerogi pi yubbe ma en oŋeyo con, ma Cwiny mere Maleŋ doŋ olonyogi gudoko maleŋ wek guwiny lok pa Yecu Kricito, dok bene wek gikir remone i komgi: Kica ki kuc myero omedde botwu. ³ Gipwo Lubaŋa Won Rwotwa Yecu Kricito! Pien pi kicane madit omiyo ginywalowa odoco wek wabed ki gen makwo pi cer pa Yecu Kricito ki i kin jo muto, ⁴ ki dok wek wanywak ginaleya ma pe top, ma cilo pe ogudo, ma pe balle, ma gikano piwu i polo. ⁵ Lubaŋa tye ka gwokowu ki tekke pi niyewu, wek wunoŋ larre ma giyubo, ma binen i kare me agikki piny. ⁶ Wubed ki yomcwiny pi man, kadi bed kombeddi gwok nyo cwinywu twero cwer pi kare manoknok mo pi kit ma gitye ka omo ki cwinywu i yo mapatpat, ⁷ wek ginen niyewu, ka ce tye niye me ada. Pien kadi jabu ma gitemo ki mac pe ri nakanaka, ento niyewa pire dit kato jabu, dok bene bikelo botwu pak ki deyo ki woro i kare ma Yecu Kricito binen iye. ⁸ Kadi pud pe wunene, doŋ wumare. Dok bene kombeddi kadi pe wunene, wuye en kun wubedo ki yomcwiny madit ma pe wacce, dok bene me deyo. ⁹ Adwoggi me niyewu omiyo wunoŋo larre me tipowu. ¹⁰ Lunebi ma yam gutito pi kica ma gibimiyowu yam guyenyo matek, kun gipenyo lok i kom larre man. ¹¹ Gin yam gumito ni giŋe aŋa, nyo kit kare mene, ma Cwiny pa Kricito ma tye i igi tye ka nyuto, i kare ma otito iye pi can ma Kricito biciro, ki pi deyo ma dok bilubo. ¹² Yam onoŋo ginyuto botgi ni, kwena ma gimiyogi pe otiko gin kikomgi, ento otiko wun. En aye lok ma kombeddi doŋ jo ma gitito lok me kwena maber gutyeko tito botwu pi Cwiny Maleŋ ma gicwalo ma oa ki i polo; lok ma lumalaika bene guparo me nenone matek twatwal. ¹³ Pi meno, doŋ wubed ma wuyubbe i tamwu, kun wugokke bene. Wuket genwu ducu i kom kica ma bibino botwu i kare ma Yecu Kricito binen iye. ¹⁴ Macalo litino ma luwiny, pe wumi kwowu orwatte ki mitiwu ma yam koŋ wubedo kwede i kare ma onoŋo pud wukwiya piny ca. ¹⁵ Kit macalo ŋat ma olwoŋowu leŋ, wun bene wubed jo maleŋ i kitwu ducu; ¹⁶ pien coc ma yam gicoyo loko ni, “Wubedo jo maleŋ, pien an aleŋ.” ¹⁷ ŋat ma wulwoŋo ni Wonwu-ni ŋolo kop i kom dano acel acel ma pe leŋŋe, kun lubo kit tic ma ŋat acel acel otiyo; mumiyo myero wubed ki lworo i nyime kare ducu ma pud wutye kany macalo welo. ¹⁸ Wun wuŋeyo ni gityeko kokowu ki i kit pa kwarowu ma pe konyo. Pe gikokowu ki gin ma balle woko, macalo ryal nyo jabu, ¹⁹ ento gikokowu ki remo pa Kricito me wel madwoŋ ma rom ki latin romo ma bal mo nyo roc mo pe i kome. ²⁰ Lubaŋa onoŋo doŋ otyeko yere wa con, ma pud pe oketo guti me lobo, ka dok onyute woko piwu i kare man, ma en aye kare me agikki. ²¹ Pire omiyo doŋ wadoko jo ma geno Lubaŋa ma ocero Yecu ki i kin jo muto, ci omiye deyo; en meno gin mumiyo niyewu ki genwu tye i kom Lubaŋa-ni. ²² Doŋ wulonyo cwinywu woko odoko maleŋ pi lubo lok ada, wek wubed ki mar ma goba pe iye macalo utmego; pi meno myero wumarre kekenwu mada ki cwinywu ducucu. ²³ Doŋ ginywalowu odoco, pe ki kodi ma balle, ento ki kodi ma pe balle, pi twero me lok pa Lubaŋa, en lok ma tye ki kwo ma ri nakanaka. ²⁴ pien yam gicoyo ni, “Gin ducu ma tye ki kom obedo calo lum, deyone ducu rom ki deyo pa tur lum. Lum ner, ature bene o woko, ²⁵ ento lok pa Rwot ma en oloko bedo matwal.” Lok meno en aye lok me kwena maber ma yam gitito botwu.