¹ Koŋ wunen kit mar madit ma Won omiyowa, ni gilwoŋwa ni wan litino pa Lubaŋa; me atir, watye kumeno. Gin mumiyo lobo pe ŋeyowa, pien onoŋo yam pe oŋeye. ² Lurema, kombeddi doŋ wan litino pa Lubaŋa; kit ma wabibedo kwede peya onen, ento waŋeyo ni ka en binen, wan bene wabinen calo en, pien wabinene kit ma en tye kwede. ³ Doŋ ŋat acel acel ma tye ki gen man ma omoko i kom Kricito, lonnye kene bedo maleŋ, macalo Kricito bene leŋ. ⁴ Dano acel acel ma timo bal noŋo turo cik, bal aye turo cik. ⁵ Wuŋeyo ni Kricito yam onen wek ekwany bal woko; i en kikome bal mo pe iye. ⁶ Ŋat mo ma bedo i en pe timo bal; ŋat mo ma timo bal noŋo pe onene, dok bene noŋo pe oŋeye. ⁷ Litinona, pe wuwek ŋat mo obwolwu. ŋat ma timo gin ma tye atir, noŋo kite atir, macalo Kricito bene kite atir. ⁸ ŋat ma timo bal, meno noŋo dano pa Catan; pien Catan obedo ka timo bal nia i acakki piny. Gin mumiyo Wod pa Lubaŋa yam onen, en aye pi turo tic pa Catan woko. ⁹ Pe tye ŋat mo ma Lubaŋa onywalo ma timo bal, pien kodi pa Lubaŋa bedo i iye; en pe twero balo, pien noŋo Lubaŋa munywale. ¹⁰ Man aye gin ma bimiyo gineno jo ma gin litino pa Lubaŋa ki jo ma gin litino pa Catan: ŋat ma pe timo gin ma tye atir pe latin pa Lubaŋa, kadi wa ŋat ma pe maro ominne bene. ¹¹ Jon 13.34 Pien man aye lok ma wuwinyo nia i acakki, ni myero wamarre kekenwa. ¹² Pe wabed calo Kain ma yam obedo latin pa Larac, ci oneko ominne woko. Gin aŋo mumiyo oneke? Pien gin ma en otiyo ducu obedo rac, ento gin ma ominne timo onoŋo tye atir. ¹³ Utmegina, pe wubed ki ur ka lobo kwerowu. ¹⁴ Waŋeyo ni wakato ki i to, wao doŋ i kwo, pien wamaro utmegiwa. Dano ma pe ki mar, noŋo pud odoŋ i to. ¹⁵ ŋat ma dag ominne meno lanek, dok bene wuŋeyo ni, pe tye lanek mo ma kwo ma pe tum bedo i iye. ¹⁶ Man doŋ miyo waniaŋ i kom mar, pien Kricito omiyo kwone piwa. Wan bene myero wami kwowa pi utmegiwa. ¹⁷ Ka ŋat mo tye ki jami me lobo man madwoŋ, ce oneno ominne ma piny oloyo, ento okwero miye kony, ci mar pa Lubaŋa bedo i iye niŋniŋ? ¹⁸ Litinona, pe wabedu ki mar i lok ma waloko ki dogwa keken, ento wamar dano ki mar me ada ma nen i tic. ¹⁹ Man bimiyo waŋeyo ni wan jo ma tye ki ada; ci bimiyo cwinywa kwe i nyime; ²⁰ ka ce cwinywa ŋolo kop loyowa, ci waŋeyo ni Lubaŋa dit kato cwinywa woko, dok ŋeyo lok ducu. Tekcwiny i nyim Lubaŋa ²¹ Lurema, ka cwinywa pe ŋolo ni kop oloyowa wabedo ki tekcwiny i nyim Lubaŋa; ²² dok bene wanoŋo gin mo keken ma walege pire, pien wagwoko cikke dok watiyo gin ma yomo cwinye. ²³ Doŋ cikke en ene ni, myero waye nyiŋ Wode Yecu Kricito, dok wamarre kekenwa, macalo en yam ocikowa. ²⁴ ŋat ma gwoko cik pa Lubaŋa bedo i Lubaŋa, Lubaŋa bene bedo i iye. Gin ma miyo waŋeyo ni en bedo i iwa, pi Cwiny Maleŋ ma en omiyo botwa.