¹ Myero ginenwa macalo lutic pa Kricito, ki lugwok muŋ pa Lubaŋa. ² Gin ma mitte ki bot lugwok jami, en aye ni myero gubed jo ma genne. ³ Ki tuŋ bota man lok matidi mo twatwal ka wuŋolo kop i koma, kadi lukiko mo pa dano bene. An kikoma bene pe aŋolo kop i koma kena. ⁴ Pien aŋeyo ni cwinya leŋ, ento man pe twero miyo aloyo kop. Rwot aye ma ŋolo kop i koma. ⁵ Pi meno, pe wuŋol kop mo ma peya kare oromo, ma pud peya Rwot odwogo. En aye ma bimenyo gin ducu mukanne i piny macol, dok binyuto tam ma tye icwiny dano miyo nen woko ka maleŋ. I kare meno Lubaŋa bipwoyo dano acel acel i kit ma myero. ⁶ Utmegina, lok magi aloko odok i koma ki i kom Apolo piwu, wek omi wun wapwonnye i komwa ki te lok man, ni, “Wubed kun wulubo gin ma yam gicoyo,” wek dano mo i kinwu pe owakke, ma pako dano acel kun cayo kwede ŋat mukene. ⁷ Doŋ aŋa mono ma neno in macalo dano mapat ki jo mukene? Gin aŋo ma itye kwede ma pe gimii amiya? Ka gimii amiya, piŋo iwakke kwede kumeno calo pe gimii amiya nono? ⁸ Doŋ wuyeŋ woko! Doŋ wudoko lulonyo bene! Doŋ bene wudoko luker, kadi bed wan pe luker! Atikane kono, onoŋo wamito ni wudok luker, wek wan bene wabed luker kacel kwedwu. ⁹ Pien atamo ni, Lubaŋa onyutowa wan lukwena calo jo mudoŋ cen twatwal, macalo jo ma giŋolo kop me to i wigi; pien doŋ wadoko ginanena pi jo ma i wi lobo ducu, bot lumalaika ki bot dano. ¹⁰ Doŋ wadoko lumiŋ pi Kricito, ento wun wuryek i Kricito. Wan wagoro, ento wun wutek. Giketo deyo i komwu, ento wan gicayowa acaya. ¹¹ Nio kombeddi kec tye ka nekowa, orwo pii oketowa woko, boŋowa pe me aruka, gidoŋowa ki ciŋ, ki pacowa-gu bene pe. ¹² wacanne kun watiyo tic matek ki ciŋwa. Ka dano giyetowa, wan walamo gum i komgi; ka giunowa, wan waciro acira; ¹³ ka gibalo nyiŋwa, wan wanwerre giwa anwera ki mwolo. Doŋ wadoko calo yugi me wi lobo; wan doŋ cilo me jami ducu. ¹⁴ Pe acoyo lok man ni wek lewic omakwu, ento me pwonyowu macalo litinona ma amaro. ¹⁵ Kadi bed wutye ki lupwony alip ki alip ma gitelowu i yo pa Kricito, pe wutye ki wego mapol. Yam adoko wonwu i Kricito pi lok me kwena maber. ¹⁶ Pi meno alegowu, wulub kita. ¹⁷ Man en gin mumiyo acwalo Temceo botwu. Temceo aye latinna ma amaro i Rwot, dok genne. En bipoyo wiwu i yo ma atye ka lubone i Kricito Yecu, ma apwonyo ki jo ducu muye Kricito i kabedo ducu. ¹⁸ Jo mogo i kinwu gitye ka tamo ni an pe abibino botwu, omiyo gitye ka wakke. ¹⁹ Ento ka Rwot oye abio botwu oyot, ka wek abinene tek pa jo ma gitye ka wakke-ni, ento pe lok ma giloko aloka. ²⁰ Ker pa Lubaŋa pe ocuŋ i kom gin ma giloko aloka ento i kom tek. ²¹ Wumito gin aŋo? Wumito abin botwu ki odoo, nyo abin ki mar ki cwiny me mwolo?