¹ Utmegina, amito poyo wiwu i kom lok me kwena maber ma yam atito botwu, ma doŋ wugamo-ni, en bene ma doŋ wucuŋ iye-ni; ² en lok ma wularre pire-ni, ka doŋ wumako matek kit ma yam atittiwu kwede, ka onoŋo pe wuye nono. ³ Pien lok ma nene amiyowu ma pire dit mukwoŋo, en lok ma yam gimiya, ma waco ni, Kricito yam oto pi balwa, kun lubo coc ma yam gicoyo; ⁴ dok bene ni giyike, ka doŋ gicere woko i nino me adekke, kun lubo coc ma yam gicoyo. ⁵ dok ni yam onen bot Petero, ka dok onen bot jo apar wiye aryo ca. ⁶ Ka dok onen bot utmego makato miya abic lawaŋacel; pol dano mogo i kom jo-nu pud gitye kwo, kadi bed jo mogo doŋ guto woko. ⁷ Dok oturu ki nen bot Yakobo, lacenne onen bot lukwena ducu. ⁸ Me agikkine ducu, ci bene onen bota, kadi bed abedo calo latin ma gibwogo abwoga. ⁹ Pien an atidi twatal i kin lukwena ducu, ma onoŋo pe porre me lwoŋa ni an lakwena, pien yam aketo can i kom jo pa Lubaŋa muye Kricito. ¹⁰ Pi kica ma Lubaŋa omiya en mumiya atye macalo atye-ni; kicane ma tye bota-ni yam pe obedo me nononono. An yam abedo ka medde ki tiyo tic matek twatwal makato jo-nu ducu; ento pe an aye ma atiyo, ento kica pa Lubaŋa aye ma otiyo kacel kweda. ¹¹ Doŋ kadi bed onoŋo an nyo gin jo-nu, lok ma wan doŋ watito en ennu, lok ma wun wuye bene-ni en ennu. ¹² Doŋ ka lok me kwenawa tito ni gicero Kricito ki i kin jo muto, piŋo jo mogo i kinwu giwaco ni cer pa jo muto pe tye? ¹³ Ka ce cer pa jo muto pe, ci Kricito bene kara pe gicero. ¹⁴ Ka Kricito yam pe gicero, ci kwena ma watito-ni doŋ yone pe, kadi wa niyewu bene yone pe. ¹⁵ Medo ki meno, wan bene lucaden me goba i kom Lubaŋa, pien waloko lok i kom Lubaŋa ni en ocero Kricito, ento ka dano pe gicero, ci yam Kricito bene pe gicere. ¹⁶ Pien ka cero jo muto pe, noŋo Kricito bene yam pe gicero. ¹⁷ Ka Kricito yam pe gicero, ci kony me niyewu bene pe, noŋo pud wutye i balwu. ¹⁸ Man doŋ tyen lokke ni, jo muto i Kricito noŋo doŋ gurwenyo woko matwal. ¹⁹ Ka genwa i kom Kricito konyowa i kwo me kare-ni keken, ci doŋ noŋo watye marac makato jo ducu. ²⁰ Ento i adane, Kricito doŋ gicero woko ki i kin jo muto, en tye macalo wi mwaka pa jo muto. ²¹ Pien dano aye mukelo to, dok bene cer pa jo muto dano mukelo. ²² Pien macalo dano ducu to i Adam, en i kit yo acel-lu jo ducu gibimiyogi kwo i Kricito. ²³ Ento ŋat acel acel i kakare: mukwoŋo Kricito, me wi mwaka, ka lacenne jo pa Kricito i kare me dwogone. ²⁴ Ka doŋ agikki piny bio, ma Kricito bimiyo iye ker i ciŋ Lubaŋa Won, ma noŋo doŋ otyeko turo kit loc ki twero ki tek ducu me cwiny. ²⁵ Pien en myero obed ka loc, nio ka Lubaŋa biketo lukworre ducu piny i te tyene. ²⁶ Lakwor ma gibityeko woko me agikki en aye to. ²⁷ Pien yam gicoyo ni, “Lubaŋa oketo en obedo lalo jami ducu.” Ka giwaco ni oketo “jami ducu” i te locce, nen ka maleŋ ni pe gikwano iye Lubaŋa kikome, ma oketo jami ducu i te loc pa Kricito. ²⁸ Ka doŋ gityeko keto jami ducu i te locce, en Wod kikome bene gibiketo i te loc pa Lubaŋa, wek Lubaŋa doŋ ocok jami ducu i te locce. ²⁹ Iyo, ka jo muto pe gibicer, ci doŋ jo ma gibatija pi jo muto-ni gibibedo niŋniŋ? Ka ce cero jo muto pe tye kadi ki acel, piŋo kono dok gibatija pigi? ³⁰ Piŋo wan kono wacuŋ ka marac cawa ducu? ³¹ An mera ato nino ducu, utmegina; meno awaco botwu atir, pi wakke ma atye kwede i komwu i Rwotwa Yecu Kricito. ³² Ka kono nene alwenyo ki lee mager i Epeco, macalo dano giwaco-ni, kono ki kony mene ma anoŋo iye? Ka cero jo muto pe, ci ber doŋ “wacamu, wamatu, pien diki wabito woko.” ³³ Pe wuwek gibwolwu: “Bedo ki jo maraco balo kit mabeco.” ³⁴ Wudwog cen i tam ma atir ma pe me mero, ci wugik bal woko cut. Pien jo mogo pe gitye ki ŋec mo i kom Lubaŋa. Awaco man wek lewic omakwu. ³⁵ Gwok nyo ŋat mo bipenyo ni, “Jo muto gicerogi niŋniŋ? Gibibedo ki kit kom macalo niŋniŋ?” ³⁶ In lamiŋmiŋ! Kodi ma icoyo i potoni pe twero noŋo kwo nio ka doŋ oto woko. ³⁷ Gin ma icoyo-ni obedo mere kodi nono, nyo kodi kal, nyo kit kodi mukene-ne, pe en kom ginapita ma bidoŋo-ni. ³⁸ Ento Lubaŋa miyo kom ki kodi meno kit macalo yam en oyero, kodi acel acel ki kiti kome. ³⁹ Riŋo kom gin makwo ducu pe rom; riŋo dano pat, riŋo lee pat, me pa winyi pat, ki me pa rec bene pat. ⁴⁰ Dok bene tye kom me polo ki kom me lobo; ento deyo pa kom me polo tye ki yone pat, ki deyo pa kom me lobo bene tye ki yone pat. ⁴¹ Ceŋ tye ki deyone, deyo pa dwe bene mapat, ki lakalatwe-gu bene gitye ki deyo mapatpat; pien lakalatwe bene kitgi patpat, omiyo deyo ma gitye kwede bene tye patpat. ⁴² Tye bene kit meno i kom cer pa jo muto. Kodi ma gicoyo-ni en gin ma top; ento ka doŋ gicero pe dok to. ⁴³ Gicoyo ma noŋo deyone pe, gicero ma noŋo deyone tye; gicoyo ma noŋo pud goro, ento gicero ma noŋo doŋ tye ki tek. ⁴⁴ Gicoyo i kom me lobo man, ci gicero i kom me cwiny. Ka kom me lobo man tye, ci kadi wa kom me cwiny bene tye. ⁴⁵ Yam gicoyo ni, “Dano mukwoŋo, Adam, odoko gin makwo”; ento Adam me agikkine odoko cwiny ma miyo kwo. ⁴⁶ Pe kom me cwiny koŋ aye ma kwoŋo bino, ento kom me lobo man, ka doŋ kom me cwiny bino lacen. ⁴⁷ Dano mukwoŋo yam gitiyo ki apwa me lobo, ento dano me aryone oa ki i polo. ⁴⁸ Jo me lobo gicalo dano ma gitiyo ki ŋom; ento jo me polo bene gical ki dano ma oa ki i polo. ⁴⁹ Doŋ macalo waruko cal pa dano ma gitiyo ki ŋom, kit meno bene wabiruko cal pa dano ma oa ki i polo. ⁵⁰ Man aye gin ma aloko botwu, utmegina, ni, gin ma tye ki kom ki remo pe twero leyo ker pa Lubaŋa, gin ma top bene pe twero leyo gin mo ma pe top. ⁵¹ Koŋ wuwiny muŋ man, ni, pe wan ducu wabito, ento wan ducu gibilokowa woko. ⁵² oyotoyot, pi kare manok mo keken, macalo waŋ ma neno piny litubetube, ka buriji me agikki doŋ bikok. Pien buriji bikok, ka doŋ gibicero jo muto woko kun pe dok gibito, wan bene gibilokowa woko. ⁵³ Pien gin ma balle myero orukke ki gin ma pe balle, ki gin ma to myero orukke ki gin ma pe to. ⁵⁴ Ka gin ma balle doŋ orukke ki gin ma pe balle, dok ka gin ma to doŋ orukke ki gin ma pe to, ka doŋ miyo lok ma yam gicoyo obicobbe kakare ni, “To doŋ gimwonyo woko, giloyo woko matwal.” ⁵⁵ “In to, locci doŋ tye kwene? In to, aremmi kono tye kwene?” ⁵⁶ Arem me to aye bal, doŋ tek me bal aye cik. ⁵⁷ Ento myero wapwoyu Lubaŋa ma miyowa loc pi Rwotwa Yecu Kricito. ⁵⁸ Pi meno, utmegina ma amaro, wucuŋ matek ma pe wuyeŋŋe, kun wumedde bene ki tic pa Rwot nino ducu, kun wuniaŋ ni, i Rwotwa yellewani pe me nono.