¹ Utmegina, amito wuniaŋ lok i kom mot ma Cwiny Maleŋ miyo. ² Wuŋeyo ni i kare ma yam onoŋo pud pe wuŋeyo Lubaŋa, noŋo wurwenyo woko ata ka woro cal jogi ma pe loko, ka ma giterowu iye ducu-ni. ³ Pi meno amito wuniaŋ ni, pe tye ŋat mo ma Cwiny pa Lubaŋa telo ma wacci, “Yecu giceno;” dok bene pe tye ŋat mo ma twero wacci, “Yecu aye Rwot,” ento Cwiny Maleŋ keken ma twero miye eloko. ⁴ Mot tye ma kitgi patpat, ento Cwiny tye acel. ⁵ Tic ma gitiyo pi Rwot bene tye ma kitgi patpat, ento Rwot tye acel. ⁶ Tek pa Lubaŋa tiyo i yo mapatpat, ento Lubaŋa acel-lu aye ma tiyo i yo ducu ki pi jo ducu. ⁷ Dano acel acel gimiyo bote lanyut me Cwiny ma konyo lwak. ⁸ Cwiny Maleŋ miyo bot dano acel kwena me ryeko; en Cwiny acel-lu bene miyo bot dano mukene kwena me ŋec. ⁹ En Cwiny acel-lu miyo niye bot ŋat mukene, ki bot dano mukene en Cwiny acel-lu miyo mot me caŋo two i kom dano. ¹⁰ Bot ŋat mukene en miyo mot me tiyo taŋo, bot ŋat mukene mot me tito lok pa Lubaŋa, bot ŋat mukene miyo ryeko me poko kin cwiny mapatpat, bot ŋat mukene miyo dumo leb mapatpat, bot ŋat mukene miyo ryeko me gonyo leb mapatpat. ¹¹ Ento Cwiny acel-lu aye ma tiyo tic i mot magi ducu; en poko mot mapatpat bot dano acel acel kit macalo en mito. ¹² Pien Kricito calo kom acel ma tye iye dul mapol; ento noŋo pud tye kom acel, kadi bed gitye dul mapol. ¹³ Pien wan ducu, Lujudaya ki jo Grik, opii ki jo ma gilone kengi, gibatijawa wadoko kom acel i Cwiny acel-lu pa Lubaŋa, wan ducu wamato en Cwiny acel-lu. ¹⁴ Pien kom dano pe tye iye dul acel keken, ento tye iye dul mapol. ¹⁵ Ka kono tyen wacci, “Pien an pe a ciŋ, an pe a dul kom,” meno pe geŋe bedo dul kom. ¹⁶ Ka kono it wacci, “Pien an pe a waŋ, an pe a dul kom,” meno pe geŋe bedo dul kom. ¹⁷ Ka kono kom ducu obedo waŋ, kono giwinyo lok ki ŋo? Dok kono kom ducu obedo it, kono giŋweyo ki ŋo? ¹⁸ Ento kit ma tye kwede-ni, Lubaŋa oketo dul mapatpat i kom, dul acel acel kit macalo en mito. ¹⁹ Ka kono gin ducu gubedo dul acel, kom kono obedo kwene? ²⁰ Kit macalo tye-ni, tye dul mapol, ento kom tye acel. ²¹ Waŋ pe twero waco ki ciŋ ni, “An pe amiti.” Wic pe twero waco ki tyen ni, “An gira pe amitowu.” ²² Ma kaka meno, dul kom maca ma gitamo ni goro mitte twatwal, ²³ dok bene dul maca me kom ma gitamo ni deyogi pe, dul magi aye girukogi ki deyo makato, ki dul komwa ma nen marac warukogi ki ruk ma nen maber makato, ²⁴ ma kun dul komwa ducu ginen maber ma pe dok gimito gin mo. Lubaŋa oketo dul mapol me kom kun ribogi kacel, kun miyo deyo madwoŋ makato bot dul ma deyogi nok. ²⁵ wek apokapoka mo obed pe i kom, ento omi dul acel acel opar pi dul wadgi. ²⁶ Ka dul mo acel tye ki arem, ci dul kom mukenegu bene rem kacel kwede; ka gipako dul acel, dul mukene-gu bene ducu ribbe kwede ki yomcwiny. ²⁷ Kombeddi doŋ wun kom Kricito, dano acel acel obedo dul kom Kricito. ²⁸ Ento Lubaŋa oketo jo magi i lwak muye Kricito; mukwoŋo lukwena, me aryone lutit lok pa Lubaŋa, me adekke lupwony, ki dok jo ma tiyo tic me taŋo; ki jo ma lubo gin jo ma gimiyo botgi mot me caŋo two ki i kom dano, jo ma tiyo tic me kony, jo ma romo loyo tic, ki jo ma gidumo leb mapatpat. ²⁹ Jo ducu gin lukwena? Jo ducu gitye ki mot me tito lok pa Lubaŋa? ³⁰ Jo ducu tye ki mot me caŋo dano? Jo ducu gidumo leb mapatpat? Jo ducu gin lugony leb? ³¹ Wuket cwinywu i noŋo mot ma pigi dito.