¹ Utmegina, amito wuŋe ni, kwarowa ducu yam gubedo i te pol, gin ducu guwok ki i dye nam, ² gin ducu bene yam gibatijagi i i pol ki i nam, wek doŋ gubed jo pa Moses. ³ Gin ducu yam gucamo cam acel me cwiny, ⁴ gin ducu bene gumato ginamata acel me cwiny. Pien gumato pii mua ki i kom got me cwiny ma woto kacel kwedgi, got meno yam en Kricito. ⁵ Kadi bed kumeno, Lubaŋa pe opwoyo pol jo mogo ma i kingi; pien guto gutum woko liweŋ i tim. ⁶ Lok meno ducu odoko labol botwa, ma cikowa ni pe myero wabed ka paro gin maraco macalo yam gin guparo. ⁷ Pe wawor jogi macalo jo mogo i kingi, kit macalo yam gicoyo ni, “Lwak gubedo piny gucamo ka gumato, ci gua malo ka myel.” ⁸ Wan pe myero wadonyu i timo tim kwele, macalo jo mogo i kingi yam gutimo, ci jo alip pyeraryo wiye adek guto woko ducu i nino acel. ⁹ Pe waomu cwiny Rwot, macalo jo mogo i komgi yam guomo cwinye, ci omiyo twol onekogi woko. ¹⁰ Pe waŋur, macalo jo mogo i kingi yam guŋur kwede, ci omiyo Lanek oŋinyogi woko. ¹¹ Meno ducu yam otimme i komgi macalo lapo wic, ka doŋ gicoyo me cikowa, wan jo ma agikki piny oo i komwa-ni. ¹² Pi meno ŋat mo ma tamo ni etwero cuŋ myero ogwokke wek pe opoti. ¹³ Pe tye bita mo ma makowu ma pe mako dano ducu; Lubaŋa genne, pe biye ni gibitwu matek makato ma wuromo cirone, ento i kare ma Catan tye ka bitowu, Lubaŋa bimiyowu yo ma myero wubwot kwede, wek wubed ki twero me ciro. ¹⁴ Pi meno, wun luwota ma amaro, wubol woro jogi woko matwal. ¹⁵ Aloko kwedwu macalo jo ma luryeko; wubed ki tam kekenwu i lok ma aloko. ¹⁶ Kikopo me gum ma walego iye gum, pe waribbe iye i remo pa Kricito? ¹⁷ Pien mugati tye acel, wan ma wapol-li bene wabedo kom acel, pien wan ducu wanywako camo en mugati acel-lu. ¹⁸ Koŋ wunen jo Icrael; jo ma camo gitum ma gityero bot Lubaŋa pe giribbe ki keno tyer? ¹⁹ Ka aloko kumeno noŋo atamo aŋo? Ni cam ma gityero bot jogi obedo gin mo, nyo ni jogi gubedo gin mo? ²⁰ Pe, gin ma awaco en ene ni, gitum ma jo ma pe ŋeyo Lubaŋa gutyero, gityero bot jogi, ento pe gityero bot Lubaŋa. Pe amito wuribbe ki jogi. ²¹ Pe wutwero mato ki kikopo pa Rwot ki pa jogi. Pe wutwero cam i meja pa Rwot ki dok i meja pa jogi. ²² Wamito omo cwiny Rwot wek nyeko omake? Wan mono watye ki tek wakato en? ²³ “Atwero timo jami ducu,” ento meno pe nyuto ni jami ducu tye ki kony. “Atwero timo jami ducu,” ento man pe nyuto ni jami ducu doŋ niye pa dano. ²⁴ Dano pe olub gin ma konyo en keken, ento myero olub gin ma konyo lawote bene. ²⁵ Wucam kit riŋo ducu ma gicato i cuk, pe wubed ka penyo gin mo iye pi lworo bal. ²⁶ Pien lobo ki jami ducu ma tye iye obedo jami pa Rwot. ²⁷ Ka ce dano mo ma pe oye Lubaŋa olwoŋowu ka cam, kun wumito wucit wucam, ka wuo i gaŋŋe wucam gin ducu ma giketo i nyimwu, pe wubed ka penyo gin mo iye pi lworo bal. ²⁸ Ento ka ŋat mo owaco botwu ni, “Man gin ma doŋ gityero bot jok,” pe wucam, pi paro pi ŋat ma doŋ otito lok meno pi poyo wiwu-ni, ki pi tamme ma i cwinye ma nyuto balle bote. ²⁹ Meno aloko pi tam ma tye i cwiny dano mukene ca, pe pi tam ma i cwinyi. Piŋo gigeŋo kuc ma atye kwede me timo gin mo-ni woko, pi tam ma tye i cwiny dano mukene? ³⁰ Ka anywako camo cam ki jo mukene kun apwoyo Lubaŋa bene, piŋo giyeta pi gin ma doŋ atyeko pwoyo Lubaŋa pire? ³¹ Doŋ ka wucamo cam nyo ka wumato mat, nyo gin ducu ma wutiyo, wutim ducu pi miyo deyo bot Lubaŋa. ³² Pe wubal cwiny Lujudaya, kadi jo Grik, nyo jo muye Lubaŋa, ³³ macalo an atemo yomo cwiny jo ducu i gin ducu ma atiyo, kun pe alaro pi gin ma konyo an kena, ento alaro pi gin ma konyo jo mapol, wek gularre.