¹ Waraga man oa ki bot Paulo, ma pi mit pa Lubaŋa yam Lubaŋa olwoŋe me bedo lakwena pa Kricito Yecu, ki dok ki bot ominwa Coctene. ² Bot jo muye Lubaŋa ma gitye i Korint, ma gin jo ma gilonyo gudoko maleŋ i Kricito Yecu, ma Lubaŋa olwoŋogi me bedo jone kikome, kacel ki jo ducu ma gitye i kabedo ducu, ma gilwoŋo nyiŋ Rwotwa Yecu Kricito, Rwotgi ki mewa bene: ³ Lubaŋa Wonwa ki Rwotwa Yecu Kricito omiwu kica ki kuc. ⁴ Nino ducu amiyo pwoc bot Lubaŋana pi kicane ma en omiyowu i Kricito Yecu, ⁵ pien pi bedowu i Kricito omiyo doŋ wudoko lulonyo i yo ducu. Wutye bene doŋ ki ŋec ducu, dok wutwero doŋ lok maber, ⁶ pien lok ma wabedo ka titone i kom Yecu Kricito odonyo matek i iwu. ⁷ Omiyo mot mo me cwiny pe orem botwu, ma kun pud wutye ka kuro kare me nyuto Rwotwa Yecu Kricito. ⁸ En bigwokowu miyo wucuŋ matek nio wa i agikki, noŋo pe wutye ki gin mo ma myero gidotwu iye i nino pa Rwotwa Yecu Kricito. ⁹ Lubaŋa ma olwoŋowu me ribbe kacel ki Wode Yecu Kricito Rwotwa, en ŋat ma genne. ¹⁰ Abako doga botwu, utmegina, pi nyiŋ Rwotwa Yecu Kricito, ni wun ducu myero wulok lok acel, apokapoka mo pe myero obed tye i kinwu, ento myero wuribbe i cwiny ki tam acel. ¹¹ Pien jo mogo ma gua ki bot Koloe gutitta lok i komwu, ni meno daa tye i kinwu, utmegina. ¹² Gin ma awaco en aye ni, dano acel acel i kinwu tyeka waco ni, “An dano pa Paulo,” nyo ni “An dano pa Kepa,” “An dano pa Apolo,” “An dano pa Kricito.” ¹³ Kricito mono iye opokke? Yam kono giguro Paulo i kom yatariya piwa? Onoŋo yam gibatijawu i nyiŋ Paulo? ¹⁴ Apwoyo Lubaŋa mada pien an gira yam pe abatija dano mo i kinwu, kono abatija Kricipo ki Gayo keken, ¹⁵ wek ŋat mo pe owac ni gibatija en i nyiŋa. ¹⁶ Abatija bene jo ma i ot pa Citepana; pe doŋ atwero po ka onoŋo dok abatija ŋat mukene. ¹⁷ Kricito pe ocwala ka batija dano, ento ka tito lok me kwena maber ma pe atito ki ryeko mo me lok, wek pe omi to pa Kricito i kom yatariya obed gin ma konnye pe. ¹⁸ Lok i kom yatariya ki tuŋ bot jo ma tye ka rwenyo woko, nen calo gin me miŋo, ento ki tuŋ botwa, wan jo ma Lubaŋa tye ka larowa, obedo tek pa Lubaŋa. ¹⁹ Pien yam gicoyo ni, “Abityeko ryeko pa jo maryek, abibalo niaŋ pa jo ma ŋeyo piny woko.” ²⁰ Jo maryek tye kwene? Lupwony-cik kono tye kwene? Lupyem me lobo man tye kwene? Lubaŋa pe oloko ryeko me lobo man odoko me miŋo? ²¹ Pi ryeko pa Lubaŋa omiyo jo me lobo pe guŋeye pi ryekogi, ento Lubaŋa pi twerone olaro jo muye en pi lok me miŋo ma watito. ²² Lujudaya gimito neno lanyut mogo, ki jo Grik giyenyo megi ryeko; ²³ ento wan giwa watito pi Kricito ma yam giguro i kom yatariya, ma lokke ki tuŋ bot Lujudaya obedo lok atata, ki bot Lurok nen lok me miŋo. ²⁴ Ento bot jo ma gilwoŋogi, Lujudaya ki jo Grik, Kricito obedo tek ki ryeko pa Lubaŋa. ²⁵ Pien miŋo pa Lubaŋa kato ryeko pa dano woko ki ryeko, goro pa Lubaŋa bene tek kato teko ma dano tye kwede woko. ²⁶ Utmegina, koŋ wutam pi lwoŋo ma Lubaŋa olwoŋowu kwede. Jo mapol i kinwu onoŋo pe giryek i kit me lobo, jo mapol i kinwu onoŋo pe gitye ki twero, dok jo mapol i kinwu onoŋo pe gubedo wegi deyo. ²⁷ Ento Lubaŋa oyero gin mamiŋ me lobo, wek oket lewic i kom luryeko; Lubaŋa oyero gin ma goro i lobo-ni wek oket lewic i kom gin jo matek; ²⁸ Lubaŋa oyero gin mogo me lobo ma gicayogi, ma rwomgi piny, kadi jami mogo ma pe gitye, wek omi gin ma tye odok gin ata, ²⁹ wek dano mo pe owakke i nyim Lubaŋa. ³⁰ Lubaŋa aye mumiyo wubedo i Kricito Yecu, ma Lubaŋa omiyo odoko ryekowa. Pi Kricito bene omiyo Lubaŋa okwanowa ni kitwa atir, olonyowa wadoko jo maleŋ, okokowa bene ki i opii me bal. ³¹ Doŋ kit macalo yam gicoyo, “ŋat ma nyatte myero onyatte pi Rwot.”