¹ फाचे येशे एका इेवलाम गियो, तिही एक माहु आथो तियाएक आथ हुकाय गिहीलो आथो. ² शब्बाथा दिहा दिही येशू त्या माहाल हारो केहे का नाहा इ विन तियाप दोष लागवा केता तिया विरोधी लोक तियाव नजर थोवी रेहला. ³ त्या एका आथा हुकाला माहाल येशुय आख्यो “उठ आन इ माहा हुबूंर उबी रे.” ⁴ ताहा येशुय तियाहाल आख्यो शाब्बाथा दिहा दीही हारो काम केनु का माठो केनु, जिव वाचवुनू का जीव लेवनू यामने केल्लो काम हारो हाय ? पेण ते ठाकाज रिया. ⁵ तियाहा मोन खाराब होय इ विन येशु निराश वि गियो आन तियाय रोगीकी बाठ्ठान वेयो, आन त्या एका आथा हुकाला माहाल आख्यो, “ तो आथ लांबो के” तियाय आथ लांबो केयो आन तो हारो वि गियो. ⁶ ताहा परुशी पंथा लोक बारे जाईन तियाल (येशुल) आपु केहकी माय टाकुहू या बाबत चर्चा केरा हेरोदीयांही तिया विरुध्द टोलवाया. ⁷ येशु तिया चेलाहां आरी गालील फगारावेल निंगी गियो, ताहा गालील प्रांतामेने खुबूज लोक तिया फाचाडीने जातला ⁸ येशु जे मोडा चमत्कार केतलो तो उनायन यहुदिया, यरुशलेम, इदोम आन यार्देन खाडाी तिवेलने देश आन सोर आन सिदोन इयापाहल्या देशामने खुबूज लोक येशूय आला. ⁹ तिही खूबूज गोर्दी आथी तियाहा की येशू चूंदाय नाय जा जोजे तिया खातोर तियाय एक उडी तियार की थोवा, एहकी तिया चेलाहान आखी देदो, ¹⁰ काहाका तियाय खुबूज दुखारे माहन हारे केले तियाहाल जे दुखी माहे आथे ते मे तियाल आथ लागवा केता बादे तिया उच्चे तुटी पोडा लाग्ये. ¹¹ ताहा पुथडो लागले माहे येशुल विन तिया हुंबूर एठा पोडीन मोडाकी बोंबलीन आखतोले “ तु देवा पोयरो हाय”. ¹² ताहा येशूल ती दुख्यान ताकीत दिन आख्यो “मा बोद्दल केडालुज नाहा आखाहा.” ¹³ फाचे येशू डोगावे चोडी गियो आन जे तियाल जोजतला तियाय हाद्या ते इसूही आला. ¹⁴ ताहा येशूय तिया आरी रा खातोर आन पोरमेहेरा हाऱ्या गोठ्या आखा मोकला केला बारा जावान निवाड्या. ¹⁵ आन तियाहावे पुथडे काडनू अधिकार रा जोजे, ¹⁶ ताहा येशूय बारा जावान निवड्या जो शिमोन या पेत्र इ नाव देदो. ¹⁷ जब्दी पोयरो याकोब आन याकोबा पावुहू योहान (इयाहान तियात बोअनेरगेस, इया अर्थ गाजनु पोयरा एहेकी नाव देदो.) ¹⁸ आंद्रिया, फिलीप, बर्थलमय, मत्तय, थोमा, अल्फी पोयरो याकोब, तद्य, शिमोन (जो कनानी आथो) ¹⁹ आन जियाय येशुल ति देदो तो यहुदा इस्कार्योत. ²⁰ आन फाचे येशू को आलो, आन फाची ओता बाठ्ठा लोक टोलवाय गिया का तियाहान मांडो खा बी बोखत नाहा मिल्यो. ²¹ येशू मुनको फीरी गियोहा एहकी माही आखतले तीया खातोर तिया कोमेने माहे तो उनायन तियाल तेरा खातोर तिग्ये. ²² तेहकीज यरुशलेम शहरामने आल्ला शास्त्री लोक बी आखा लाग्या का तियाय कालो पुथ लागलो होय ति या खातोर (बालजबुल) तो काल्यापुथडा मदतीकी पुथडे काडेहे. ²³ ताहा येशूय तियाहान पाही हादीन आख्यो पुथडाल पुथडो केहकी काडी. ²⁴ जर एका राज्याम फुट पोडी गियाी ता तो राज्य केहकी टिकी सके. ²⁵ एहकीज जर एका कोमे फुट पोडी ता ता कोअ केहकी टीकी सेकनारो ? ²⁶ जर सैतान सोतालुज विरोध करा लाग्यो आण तियामुज फुट पोडी ता तो टिकी नाय सकणारो आण तो पारवाय जाणारो. ²⁷ खेरोंज केडालुज एगदा (पेलवान) शक्तीवान माहा कोमे विहीन चोरी नाय केता आवनारी तिया कोमे चोरी केरा बेरी ता पेहला ती (पेलवान) शक्तीवाला माहाल बांदा पोडी. ²⁸ आय तुमाहाल खेरोज आखुहू लोक केताहा तिया केहेंडा बी पापाहा आन पोरमेहेरा निंदा बी माफी मिली. ²⁹ पेन जो केडोबी पवित्र आत्मा निंदा केरी, तियाहाल किदीहीज माफी नाहा मिलनारी तो जोलो मजुग्या पाहाहा गुनालो वी जाहे. ³⁰ येशूय एहकी आख्यो काहाका ते एहकी आखताह का येशुल पुथ लाग्यो ³¹ ताहा येशु याहकी मरीया आण तिया पावुहू तिही आले आने बारे उबी रिन बिहीराल हादा मोकल्यो. ³² आन येशू आरी खुबूज लोक आथा तियाही तियाल आख्यो तो याहकी आन पावुहू बारे वाट जोवी रियेहे. ³³ मायाहकी आण मा पावुले केडे काय ? एहकी तियाय तियाहान आख्यो. ³⁴ तिया आरी चारी चोमखी बोठला आथा तिया लोकाहान देखविन आख्यो, “वेरा मा याहकी आन मा पावू इ हाय.” ³⁵ काहाका जे मा पोरमेहेरा मारजीकी चालतेहे, तेंज माआ पावुहू आन बोअही आन माअ याहकी हाय.