¹ परमेश्वरन पुरयू येशु मसी से यी वात परचार एंहे सुरु ओयी।

² एंहेज यशायाह बविष्य जांवणारू तेरी पुस्तक मां लेखलो से|

³ बोयडा मां एक आयवणारान आवाज ओती के प्रभुन मार्ग तयार करू, ऐने तेरी वाट होव्वी सीधी करू। ⁴ युहन्ना आव्यु च्यु बोयडा मा रोयन बपतिस्मा आपतूत ऐने पापोन माफीन करता मन फिरावलेवू य बपतिस्मान परचार करतूत|

⁵ आखा यहुदिया ऐने यरूशलेम सेहरोंन गांव मायला बट्टा रोयणारा तेरे हाते गया, ऐने तिंदरा पापोंन कबूल करिया |ऐने यरदन नदीमा जाईन तेरे आथेन बपतिस्मा लेदिया

⁶ युहन्ना ऊटडान जुटान लुगड़ा पेरीन एने तेरा कोळच्यामा चामडान पट्टू बादीन रयततू ऐने टिड्या

एंने जंगल मां मव खायीन रयततू|

⁷ एने य परचार करततू , मार फसव च्यु आव नारू से च्यु मेहे देखू भी ताकत वावू से, मी ते तेरा पायोमयाला चाटियांन बोंद सुवळेन लगण लायक निम्बे।

⁸ मिते तुमुहू पाणी करीन बपतिस्मा आप रोयु पुण च्यु तुमुहू बगवानोन चुखला जीव-आत्‌मा मां बपतिस्मा आपहे, देखूं मी मारा दुतह तुंबरे ओगव मुकलो च्यु तारेन करता वाट तयार करहे| ⁹ एंने तीनु दिहोम,येशू गोलील जीलान नासरेत होयरोम आविन ,यरदन नदिमा युहन्नान आथेन बपतिस्मा लेदयू ।

¹⁰ एंने जेंहे येशु पाणी मां दखु उपर निकव्यु उचकालुन होरोग उगेड़त्‌लो एने बगवानोन जीव-आत्माह पेरवान वेहम तेर उपर उतोरत्‌लु देख्यु |

¹¹ एने तीना जागापर वादवामा, उपर दोखु अवाज आव्यू के तु मारू लाड़कलु पुरयु से, मी तह पर खुप खुश छेतूह । ¹² तेतारूस तिनाहा चूखलो जीव आत्मा मा होयिन जंगलों बोयडामा मुकली देदू|

¹³ एने जंगलोंमा चाळीस दीह तक, बुतडू , तिनाहा परजाव्यू एने चेहरी च्यू जंगलों मायला जंगली जानवरोंन हाथे रोयू एने स्वर्गदूत तेरी सेवा करतू रयू। ¹⁴ युहन्नाहा दरनेन फसव बादमा येशु अवतु गलील सहरो मा आविन परमेश्वरन राज्यन हाजी वातोन परचार करतु रयू।

¹⁵ ओवी कयू के, टाइम पुरु अयगयलु से, ओवी परमेश्वरन राज्य हाते आव गोयलो से, तुमु मन फिरावू, एने इनि वातोन परचार पर विस्वास करू। ¹⁶ गलील गांव शहरोमा दरियान मेरे जातु-जातु, तेतार च्यु शमौन ने ओवी अंद्रियासह दरियामा मासान जाव नाखतला देख्यू ; काहाके च्या मासामारनारा अता।

¹⁷ ओवी येशु तीनुहू कयू, मार फसव होयु, मि तुमूहू मासा जेहे दरिन एखटा करतला तेहेज मी तुमुहूं माणहोह जीवता दरनारा बणाविही। ¹⁸ च्या बी अवता तिनी जावह चेहरी छुडिन तेरे फसव चालीन जाणे बाज गया। ¹⁹ ओवि थुडुक अगु गयु , तेतार तीनाहा जब्दीन पुरयु याकूब ओवि तेरु भाय यूहन्नाहा डंडया पर जाव हसकरतला देख्यू |

²⁰ च्यु अवतु मामार तिनुहू आयडीन हादयू , जब्दीही रुज्या हाते डूंडयापर मेलीन , तेरफसव जाणेबाजगया | ²¹ ओवता च्या कफ़रनहुम सहोरो मा पूच्या अवता चेहरी लगेच ,सब्तन आरामन दिही अतु तेदीही च्या आराधानय मा जाइन चेहरी च्यु तेरी वात हिकावणे बाजगयु |

²² ओवीच्या माणहे तेरी उपदेशन वात होंबविन बोखलाय गया , कहाके तिनुहू आखाहा चेहरी च्यु पुड़ारीन हच नी पुण हक देखू तिनुहू वात हिकाडयू ²³ ओवि तिना टाइममा , तिंदरा आराधनालय मा एक माणुह ओतु , तेरा डिलोमा एक बूतड़ान आत्मा अति

²⁴ तेतार च्यु आयडिन कयु , ओ येशु नासरी , मेहे तार हाते काय काम से , तू मैंहे बर्बाद करने आवलु काय , मी तोहों जाणतुलू , तु कुण से ? परमेश्वरन चूखलू माणुह से |"

²⁵ येशु तिनाहा जुरकरीन कोंयू , ठावकूरय , एने तिना डिलोम दोखी निकवी जा |

²⁶ तेतार ची बूतड़ान आत्मा तिना माणहन डीलोम दोखी पिव्वाइन ओवती ची मोटा आवाजमा आयडिन निकवी गई ²⁷ च्यों देखिन आखा माणहे बोंगलाय गया , ओवता च्या तिंदरे -तिंदरे वातू कारने बाजगया , यी काय वात से च्या -च्या मुये- मुये आयळतला , यी काय वात से यी काल्ली नवली वात से च्यु हकदखु बूतड़ान आत्माहा हुकूम आपलू से , एने ची तेरी हुकूम मानतली से |

²⁸ ओवतों तेरो नाव गलील सहरन आस-पासन आखा गाव मा फैल गयो | ²⁹ ओवि च्यु मामार आराधनालय मंदिरोमा दोखू निकवीन , याकूब ने यूहन्ना हाथे शमौन ने अन्द्रियासन घर आविया |

³⁰ ओवि शमौनन हाहूह मजबूत जुरखे हरी हाते माँदली पवडयली अति , ओवतेन लगेच तेर वारामा वात टीनुहू कोरयू|

³¹ तेतार च्यु हाथे जाईन तेरु आथ दरीन तिनिही उठाडयू अवतु लगेच तेरो हरी उतरी गयो , चेहरी तिंदरी चाखरी करने बाजगयी | ³² हांजपोरलु टाइम अतु तेतार दिही बुड गयु , तेतार आखा मांदला माणहे जीनापर बुतड़ान आत्मा ओति , तेर हाथे चेहरी लाव्या |

³³ ओवि आखा सहरों गली एने टुवा मायला माणहे आखा जूपा अगव टुवाय गया |

³⁴ ओवि च्यु वार हवटा माणहे आयता मोटा दुख वाला मांदला माणहे अता, च्या आखा माणहोह हाजा करयु ,ओवि वार हवटा माणहे बुतड़ान आत्माहा बुलने नी देयु , कहाके ची तिनाहा उवखतती | ³⁵ ओवी कुकड़ा वाहरे दिह उगळेन पेल आंदारलेच वेगु च्यु उठिन च्या दोखू निकविन जात रयू। जंगलों मायला तेरा जागापर जाईन प्रार्थना करने बाज गयु।

³⁶ तेतार तेरा हातीही शमौन ओवी तेरा बट्टा हातीही तीनाहा च्या बावणे बाज गया ।

³⁷ तेतार च्यु सापडयु, तेतार तिनाहा च्या कया के, आखा माणहे तोहों हुदणे बाज रया। ³⁸ येशु तिनुहू कयणे बाजरयु, आवु आपू, काहरी तरी आस पास गांवमा जाता, एने चेहरी मी इनि वातोन परचार करनेन करता आवलु से।

³⁹ ओवी चेहरी बट्टा गलील सहरोमा गावमा तिंदरा आराधनालय मंदिरोमा जाईन परचार करततू एने ओवी बुतडान आत्माहा निकावततु। ⁴⁰ एक कुढ़ावु माणुह तेर हाते आविन ,तिनाहा रावण्या करणे बाज गयु ,तेर सामने गुटणाटेकिन ,तिनाहा कोये , जर तारी इच्छा ओये तेतार तु मेहे हाजू कर सकतलू |

⁴¹ च्यु तीनापर गीण करीन आथ अगूढाविन , तिनापर आथ मेकीन कोयू "मारी इच्छा से के तु हाजू अयजा |"

⁴² एने तेतारुज तेरी कुढ़न बीमारी जात रयी, अवतु च्यु हाजू अय गयु | ⁴³ तेतार च्यु येशु तिनाहा कयु के कडक वात कय मुकल्यू के यी वात कुणीहीज जुण कयतु |

⁴⁴ ओवि तिनाहा कयु के ,देख मार वगे बाव कुणीहीज काईज जुण कयतु, पुण जा एने तारतारेज माहाराजहो नीते बुडवाहा देखाडजी , तहलतु तारों हाजू अयणेन बारामायली जी वात से ची जेहे मुसान नेमोमा ओति तेहे , तिना मोन्दीरोमा जाईन ची वातन भेटन गवाही आपजी | ⁴⁵ पुण चेहरी च्यु बारथे जाईन तिनी वातन मजबूत परचार करने बाज गयु ,एने आखे ची वात फेलाव देव्यू , के तिना गावोमा येशु फसु चेहरी आखान सामने तिना गावोमा सहरोमा जायनिसके अहलूच्यु परचार कर देल्लु अतु , पुण गावन सेटू बोयडामा बंद नि रया आवता रया |