¹ Juda, muvuya a Jeso Keresite indi muzata Jakowo, kubata beruwa, bati shakuwa ku Rezya Shee, mi ibata bishwira Jeso Keresite: ² Zuxuma indi kozo indi rusuno ziyi njipe kunwe. ³ Batishakuwa, ndasuna kuni nwera shizu ku palisuwa kuta kopanera, ndati nwara shuku kakatiza kurasi akyo, kuniqe kurwena itumero yata pewa kaxiki kubati tishira bayeyi ba bachena wu Rezya. ⁴ Kokunwe kutswaka bayeyi ba bamwe, ikaturo awo ya nwaruwa kare, bayeyi babaku kuku rapera, bati sinya sinya rusuno ru Rezya kuru yaru muna muna, bati shapura muyendisi etu indi Shikati Jeso Keresite. ⁵ Pani ndashaka kuni yanakanisa - nanaga ndinwe ini ziyi zire kare - akya shikati mata yaka bayeyi mulyuvu lya Egepita, kumana aku bbura ibahata tishira. ⁶ Indi akyo, manyiroi ingahata pata zuro zango kono indika siya zibaka zango zezeqa mungaru ku para - anga shimaina kuya maneni sizi, muka rema, kwi katuro mu lyiba yopana. ⁷ Ehee indi sodoma indi Gomora indi minzi yarana shishupi kowo batalipa kuzu wushashi indi kupanga zikyezo zuwu hule. Yata yaru muka ziqe mitara yabapa ishaba pewa ikoto yumunduro. ⁸ Mwi njira yati fwana, bapa ibati rwata bati bbisa mimbiri awo. Ibati shita murawo, indi ku hweta izuto zezibbi ku yeye yo mushiyama. ⁹ Zini Mikaere yeye nduna a manyiroi, puka ruku hweta ni Diabulusi zi shutupu sha Mushe, amamu yatura shuku murwenisa. Mi mata tikya, ''Shikati aku kalimere!'' ¹⁰ Kono bapa bati rwana indi zibaha yizire; mi zubati yuvusisa muzinama, nokoti imba nyawuya bahati yanakana, zopa ndizuto zati ba bbura. ¹¹ Wu manyi wawo! shuku tikya bata yenda mwi njira Kaine bata tira ku kyitakuwa kwa Balami ku shaka wufumu. Batili bbura shukuli kakura tandi Kora. ¹² Bayeyi bapa babbi muzi shangano zenu zurusuno, bashilya paxiki nanwe - mati kuta nabbi wekye. Madzudzo ngamaqu invura ngati hungurwa ku mupupo; miti ushipepo yati kuku muka mapapa, kuku zipata- zafwa kabiri, zata nsuwa. ¹³ Makapa uli wate, ngama yira liqwe lyawo lyati swabisa; ziñyata zati liyendi-ndira ku bishirwa karema lyaha mana. ¹⁴ Enoke, yu 7 ku Adama, mata porofita zawo, atikya, ''Lyaya! Shikati matiya nabakye babenji ma 1000 ni ma 1000 baba chena. ¹⁵ Matiya kubika ikaturo pwi liiro lyu yumwe nu yumwe. matiya ku kalimera wuli khono kowo indi mibberiko awo koyo yemibbi, mayi kongo ngubata ba babbi kukye.'' ¹⁶ Bati bbiraera, bana zikani, bati qama zezibbi zubati shaka. Batili kakura ahuru, bati hweta zaba bamwe akya ba shangane ko shichimwe. ¹⁷ Kono yenwe, nati shakuwa, niyanakane mayi ngata hwetuwa kuliqo shama aposutora a shikati Jeso Keresite. ¹⁸ Bata tikya kunwe, ''muzi nako zama minisizi wuzi hweta zibbi shaba beko isha bara qama zubati shaka zezibbi.'' ¹⁹ Ndibata lyata kukawuhana; bana muyana kano inyama baku mupupo. ²⁰ Kono yenwe, bati shakuwa, ni kwire mi tumero yichena indi ku rapera shu mupupo wo muchena. ²¹ Nili bike muru suno ru Rezya, ni lindye shi shemo sha Shikati etu Jeso Keresite ishani lyetiza wuparo waha mana. ²² Ni yuvure babamwe wutuku. ²³ Niyakye babamwe kuba kusa mu munduro. Babamwe wutuku shuka ywapa. Nitweye shiraro shina wubbi wi nyama. ²⁴ Pani kukye yamati kwana kuni qawu-qawu akya ni siye kuwa, kuni lyeta pumaso akye puku chena, ku njamwa sheshibbi pwanwe, shu kwidze nanyina. ²⁵ Ku Rezya yekye muyaki etu sha Jeso keresite Shikati etu, kube ni kanya, bushikati, iqumu, indi kuyendisa, kudzwa kare ku lyeta apani, ku twara kwaha mana. Amen.