¹ Kimweesho kya kwa Obediya. Aye Yehoba Lesa wa ambile kino na maambo a beena Edoma: Twaumvwa jiiwi kufuma kwi Yehoba kabiji ne ntomesha ye batuma mukachi ka byaalo, ne kwaamba amba, "Imanai peulu! Iyai twiimane tukekilwiishe nzhita!" ² Talai! Amiiwa nkakulenga obeewa kwiikala ke mucheeche mukachi ka mikoka ; Obeewa ukasuulwa pa baisha. ³ Kwitoota kwa muchima obe kwa kujiimbaika obeewa, obeewa muuntu wiikala mu milaala ya mabwe, peulu peene mo mumuzhi obe; kasa waamba mu muchima obe amba, 'In`anyi ukaambwezha paanshi ku mushiji?" <sup>4</sup> Naangwa waaya peulu peene noobe mpuungu naangwa kiinsa kyoobe kyaikala pakachi ka tubaanga baanga, amiiwa nkakuleeta paanshi kukufumya kookwa- akuno ko kwaamba kwa Yehoba. <sup>5</sup> Inge baangivi baiya kwi obeewa, inge batupoondo baiya na kimye kya bufuku-byo bakakonauna!- Naanchi abo keechi bakeebamo byoonka byo bakasakamo ne nyi? Inge baapa man`aanza n`aanza baishile ko uji naanchi keechi bakakushileko akupulula ne nyi? <sup>6</sup> Isao bakamupukula biipe byaanji, ne bunoonshi bwaanji bwafyamika bakebupukwiila! <sup>7</sup> Baantu boobe boonse ba mukipanyi bakakutumaobeewa mujishiinda joobe ja ku mupaka. Baantu bajiinga na muteende ne obeewa bakujiimbaika ne kukwaalukamo obeewa. Aba bo wajaanga naabo shiinkwa obe baka kuta kitweewa muunshi yoobe amba ufweemo. Kafwaamo luumvwan`ano mwi aye. ⁸ "Amiiwa pa jooja juuba keechi nkonauna ba maana beena Edoma ne luumvwan`ano lwa ku mutuumba wa ku Esau ne nyi?"-akuno ko kwaamba kwa Yehoba. ⁹ Babiyaangala boobe bakakaankamanatu, ne Temani, byonkabyo amba muuntu yeense wakoonsha kuchibiwaako ku mutuumba wa ESAO MU KWIIPAIWA. ¹⁰ Na maambo a buumbazhi bwaubile muloongo obe Yakoba, obeewa ukavweetwa na buumvu, kabiji obeewa bakakuchibako kikupu. ¹¹ Pajuuba jo waimeene pa musemi, pa juuba jo baseendele beenyi byuuma byaanji, kabiji ba mu ntaanda batweelele mu bibelo byaanji, ne kuteeya bubale pe Yelusalema, mwajiinga noobe umo wa mwi abo. ¹² Mino keechi utale pajuuba ja kolojoobe ne, mu juuba ja bya kukatazha byaanji , kabiji keechin musekele pa baantu ba mu Yuda mu mooba o bebonawine; keechi mwitoote mu mooba akupelelwa kwaabo ne. ¹³ Keechi mutweele pa bibelo bya baantu baami mu juuba ja malwa abo; keechi mutale pa makatazho abo mu juuba ja malwa, keechi mupukule byuuma mu jiiba ja konaika ne. ¹⁴ Keechi mwiimane pa mansaanga mukuchiba banyemena mu byaalo, kabiji keechi mwiiba pokolole babipuluka mu mooba akupelelwa ne. ¹⁵ Pakuuba juuba ja Yehoba jafweenya peepi pa byaalo byoonse. Noobe byo mwauba, kikoobiwa kwi anweeba; byuubilo byeenu bikemubweelela pa mitwe yeenu anweeba beene. ¹⁶ Pakuuba byo mwatomena pa uno mutuumba waami wazhila, ne byaalo byoonse bikatomanga kikupu. Bakatoma ne kumina kabiji kikeekala noobe keechi ba kijiingako kala ne. ¹⁷ Pakuuba ku mutuumba wa Ziona kukeekala booba bakanyeema, kabiji kikeekala ke kya zhila, kabiji ne nzuubo yakwa Yakoba ikaseenda bipe byajiinga bipe byaabo. ¹⁸ Nzuubo yakwa Yakoba ikeekala ke mujilo, ne nzuubo yakwa Yosefwa ikeekala noobe lubeebe lwa mujilo, ne nzuubo yakwa Esau ikeekala noobe biswaaswa, kabiji bakeebisoka, kabiji bakebamina. Keechi kukeekala ukapuluka mu nzuubo yakwa Esao ne, maambo Yehoba ye wiikyaamba." ¹⁹ Baantu kufuma ku Negeba bakataambula mituumba yakwa Esao ne baantu ba mu kyaalo kya muunshi bataambula ntaanda ya beena Filishitiya. Bakataambula ntaanda yakwa Efulemu ne kyaalo kya Samaliya, ne Benjamina ukataambula Giliada. ²⁰ Mu buzha ba nzhita ba beena Isalela bakataambula ntaanda ya Kenaana kuuya na kufika ne ku Zelefata. Babipuluka ba mu Yelusalema, abo baiji mu bukafuunga, bakataambula mizhi ya Negeba. ²¹ Ba kebapokolola bakaya ku mutuumba wa Ziona mu kwi bataangijila pa byaalo bya mituumba bya kwa Isao, kabiji ne bufumu bukeekala bwa kwa Yehoba.