¹ Alikaki mutondo tondo, tupilisitu ba bakulunu bali wanene na bakulunu na bakakuthoneka na nthzango yoshe ya ba Yunda. Cho bakutile Yesu na kuya nendi. Ba mwanene mu maboko a Pilato. ² Cho Pilato wamwihwile ngwendi, "Yobe mwene wa ba Yunda tai indi?" Cho wa mukumbulwile ngwendi, "Yobe u nendekamo." ³ Tupilisitu ba bakulunu ba kele na ku mu bangeyeya byuma bya bingi. ⁴ Pilato wa mwihwile lalo ngwendi, "Kumani na mukumbu bene unatha kwanako wahi? Tala kutuma kwa byuma ebi bali na ku kubangelekeya!" ⁵ Olojo Yesu ka mukumbulwile lalo Pilato na meme kamandondo, cho echi cha mu hayamethele. ⁶ Cho ha thimbu ya chilika, Pilato wakele na ku ba patwila chinthzinda umo, uje chinthzinda ba lombele bakebo, ⁷ cho kwakele munalume bathanene Mbalambatha mu kamenga na bihwanga baje thzile banu ha thimbu ya mpindangano ije yakeleko. ⁸ Cho mbunga yethzile kuli Pilato na ku putuka ku mulomba ngwabo aba lingile lalo ngwe muje wakele na kuba lingila mu thimbu ya kunima. ⁹ Pilato waba kumbulwile ngwendi, "Mushaka njimi tundithile ou Mwene wa ba Yunda tai ndi?" ¹⁰ Mwafwa wa thzubukile laja ngwendi baje tupilisitu baba kulunu banene Yesu mu maboko endi a mulonga wa chipululu chabo lika. ¹¹ Olojo baje bakapilisitu ba bakulunu ba showangeyeye ije mbunga mangana ba tambekele ngwabo Mbalambatha ikeye natela ku thzituka. ¹² Pilato waba kumbulwile lalo ngwendi, "cho mu thetela ngwendi nji linge bikajo nou Mwene wa ba Yunda?" ¹³ Cho batambekelele ngwabo, "Mushukuke a chilindakano!" ¹⁴ Pilato wendekele kuli bakebo ngwendi, "Bubi mukajo bwanalingi ou?" Olojo bakebo ba twaleleleho na ku tambekela ngwabo, "Mushukike a chilindakano." ¹⁵ Akulinga Pilato wa tondele ku bwaheletha ije mbunga, cho bene wa banene Mbalambatha. Chojo wa mwakwile Yesu makote cho na hanima wa mwanene kuli bakebo mangana ba ka mu shukike a chilindakano. ¹⁶ Cho mathwalale ba mutwalele ku chipango (ocho chakala lipela lya ngubulu), cho bathanene mbunga yoshe ya mathwalale. ¹⁷ Chojo ba mu thzikile Yesu mukanjo wa ku benguluka, na kumubindila cholongo cha mingonga na kumuthzikacho. ¹⁸ Ba mu thsopele na kathingimiko ka buthwalale oku bali na kwendeka kuli ikeye ngwabo, "Abulye, Mwene wa ba Yunda!" ¹⁹ Cho bakele na kumupupa ku mutwe na chibanthzi cha lihongo na kumujekwila mate. Bamulyamene kuli ikeye na kuli kwitha ku mu lemetha. ²⁰ Omwoni ba mwethele ku mu thsopa na kumu yeluwitha, cho bamu shulwile uje mukanjo na kumu thzika buthzalo bwendi, cho na kumutwaloni ku kuya na kuka mu shukika ha chilindakano. ²¹ Munalume umo, Simoni wa ku Sirene, wakele na kwija kufuma kwimbo (wakele ishe wa Alekizanda na Lufasi), cho ba mukakateyeye kwambata chilindakano chendi. ²² Cho mathwalale ba nenele Yesu ku mwela bathana ngwabo Ngolongota (kulumbununa ngwabo "Mwela wa Chikola"). ²³ Cho ba mwanene binyu bya ku kumbathana na miili, olojo kabinwile embwe. ²⁴ Ba mu shukikile a chilindakano na kuli pangela buthalo bwendi cho batele lyongo mangana ba wane buthzalo muka na pande kwambata lithwalale na lithwalale. ²⁵ Yakele thimbu ya mu chitanu na biwana ku mutondo iba mu shukikile a chilindakano. ²⁶ Chojo a katanekeyetho ba thonekeleho mulonga wa kumubangeyeya ngwabo, "Mwene wa ba Yunda." ²⁷ Ba mu shukikile hamo na mapwepwe ba bali, umo ku chilyo chendi umo ku chimoshwe chendi. ²⁸ Chobene mathona a lishulithilile aje ende ka ngwabo, 'Ba mu labelelele hamo na baje ba ka kwilika ku thzila mashiko,' ²⁹ Cho banu boshe bakele na kwitila kuyehi nendi ba muthzindile, bakele na ku pikitha mitwe yabo na kwendeka ngwabo, "Ewa! Yobe wakele na kulishasha ngwobe u natha ku pujula tembele na ku itunga lalo mu matangwa a tatu, ³⁰ liyobole yobe babenya cho u shuluke woho a chilindakano!" ³¹ Muchifwa chimo lika na tu pilisitu baba kulunu nabo bakele na ku mu jola umo na mukwabo, kwakelawo bene na ba ka kusoneka, cho bakele nakwendeka ngwabo, "Wakele na ku yoyetha bakwabo, olojo nonowa ku liyobola ikeye babenya. ³² Tutonda ku mona ou wa ku Bwabetha, Mwene wa Isalela, ashuluke hathi kufuma ha chilindakano, manganoni chili bene tu tabe na ku kulahela muli ikeye." Cho lalo nabaje ba mu shukukile nendi hamo ba mu tombele. ³³ CHojo omwo litangwa lyetele ha kati ka mutwe, lithuthulungu lya fwikile lifuti lyoshe ama hola atatu. ³⁴ Na thimbu ya muchitatu ya mangwethzi Yesu wa tambekelele na lijwi lya ku kanguka ngwendi, "Eloi, Eloi, Lama sabakatani?" kulumbununa ngwabo, "Njambi yange, Njambi yange, bika tai jo unanji thethzela?" ³⁵ Cho kwa kele bamo baje bemanene ku yehi nendi obo bathzibile awa majwi na kwendeka ngwabo, "Kengeni, ali nakuthana Elinja." ³⁶ Munu umo wa shatukile, na kwambata mupelo na ku utupika mu binyu bya ku nganganena, cho wa shomekele uje mupelo ku lihongo, na kwanoni ikeye ngwendi mangana anwe. Cho uje munalume wendkele ngwendi, "Imaneni tu tale nge Elinja aija naku mu fumitha a chindakano." ³⁷ Oloni Yesu walilile na lijwi lya ku kanguka cho wathsa na kuthsa. ³⁸ Chojo na nanga ije ya mu tembele ya tabukule na kuli panga a bali kufuma kwilu kweta na kwithi. ³⁹ Omwoni uje mukulunu wa mathwalale he manene ku lutwe lwa Yesu wa mwene mu chifwa chije cha thsilililemo, wendekele ngwendi, "Chili bene ou munalume na kele Muna Njambi." ⁴⁰ Cho kwakele lalo banakathzi bamo obo bemaneneko alako na kutala bya kele na kusholoka. A kati kabo a kele Maliya Mandalena, Maliya (baina ya Yakomba wa mwanike na Yosesa), na Salome. ⁴¹ Omwo mwa kele mu Ngaliuleya ba kele na kumu kabangeya na kumu pangela. Banakathi lalo ba bengi bethzile nendi ku Yelusalema. ⁴² Omwo mangwethzi ethzile, mwafwa amulonga wa kupwa ha litangwa lya Kulibwahethela, kwendeka ngwe, litangwa lya kutata Sabata, ⁴³ Yosefa wa ku Alimateya wethzile bene kuje. Wakele munu owu ba thingimikile manene mu chikungulukilo owo wa kele na ku bandamena bumwene bwa Njambi. Chojo na ku thimpa kwa kaina waile kuli Pilato na ku ka mulomba mubila wa Yesu. ⁴⁴ Pilato wa likomokelele manene a ku thziba ngwabo Yesu na toko laja; cho wa thanene mukulunu wa mathwalale na ku mwihula ngwendi a muleke ngwe chili bene Yesu na toko. ⁴⁵ Omwoni Pilato ba mu lekele kuli uje mukulunu wa mathwalale ngwabo Yesu nathsi, wanene mubila ku li Yosefa. ⁴⁶ Yosefa walandele nanga ya mbili. Cho wa mushulwile ku mu fumitha a chilindakano,kumu thzengela muje mu nanga ya mbili, na ku mwaka mu chihilo chije chiba chokwele mu limanya. Cho wa thindumwinineho limanya lya kama a chikolo cha ije mbumbo. ⁴⁷ Maliya Mangandalena na Maliya baina ya Yosesa ba mwene ho aje a mwela ba thsindile yesu.