¹ Cho Pilato wakwatele Yesu na kumupupa. ² Cho muswalale babindile chilonga cha mambimbo. Ba chakele kumutwe wa Yesu cho bamuthikile buthzalo bwakubenga. ³ Bethile kuli ikeye na kwendeka ngwabo, "Bulye, Mwene waba Yunda!" cho bamupupile. ⁴ Cho Pilato watuhukile hanja lalo na kwendeka kuli bakebo, "Kenga, Njili nakuminenelaye hanja lalo ngechi mutanekeye ngweni kunjawanene mulonga muli ikeye." ⁵ Cho Yesu watuhukile hanja, wathzalele chilongo cha mambimbo na buthzalo bwa kubenga. Pilato wendekele kuli bakebo ngwendi, "Kengeni, munu weni ou!" ⁶ Cho omo bakulunu batupilisitu na tupitau ba mwene Yesu, batambekele ngwabo "Mushukikeni, mushukikeni!" Pilato wendekele kuli bakebo ngwendi, "Mwambateni yeni babenya mu mushukike, mwafwa yange kunjawanene mulonga muli ikeye wahi." ⁷ Ba Yunda bamukumbulwile ngwabo, "Tuli na lishiko, cho kwetheketha na lishiko napande bene kuthsa mwafwa na lipwitha ikeye muna Njambi." ⁸ Omo Pilato wathibile lijwi eli, cho wathibile lyoba manene, ⁹ cho wakobelele mu mbongi yakama yafulumende lalo cho wendekele kujli Yesu ngwendi, "Yobe watunda kulijo?" Oloni Yesu kamu kumbulwile. ¹⁰ Cho Pilato wendekele kuli ikeye, "Kumani kuwethi na kwendeka kuli yange? Kuwathzibukile ngwobe yange njili na moko ya kukwechela, na moko ya kukushukila?" ¹¹ Yesu wakumbulwile ngwendi, "Yobe kuwethi na moko hali yange kubanga lika ije banakwana kutunda kwilu. Ngachije, ou nanjinene yange kuli yobe ikeye ali na mulonga wakutubakana." ¹² Ali echi kukumbulula, Pilato wethekele kumwechela, oloni ba Yunda batambekele, ngwabo, "Nga umwechela ou munalume, kethi umuthamba wa Sezale. Woshe alipwitha ikeye babenya mwene napu chitothi cha Sezale." ¹³ Omo Pilato wathibile majwi awa, watuwile Yesu hanja cho watumbamene ha chitwamo cha kusompela mu mwela ubatumbwile ngwabo "Mutambela wakujala na mamanya," oloni muchi Hebelu ngwabo, ''Ngamnbata.'' ¹⁴ Cho lyakele litangwa lya kubwayetha chiwano cha Paseka, yapwile thimbu ya kuyehi yamukati kalitangwa. Pilato wendekerle kuli ba Yunda ngwendi, ''Kengeni, mwene weni ou!'' ¹⁵ Batambekele ngwabo, "Kutumushaka, kutumushaka; mushukikeni!" Pilato wendekele kuli bakebo ngwendi, "Kuma mushaka njishikike mwene weni?" Ba tupolofita baba kulunu bakumbulwile ngwabo, "Kutwethi na mwene weka lalo wahi kubanga Sezale." ¹⁶ Cho Pilato wabanene Yesu linga bamushukike. ¹⁷ Cho bambatele Yesu, cho watuhukile hanja, oku nambata chilindakano chendi babenya, kumwela batumbwile ngwabo "Mutambela wa chikola," muchi Hebelu bautumbula ngwabo "Ngolongota." ¹⁸ Kuje bakamushukikile Yesu, na banalume bakwabo babali, umo kuthambweli imo mukwabo kusambweli ikwabo, na Yesu hakati. ¹⁹ Pilato lalo wathonekele chimwetho nakuchaka hachilindakano. Wasonekele ngwendi: OU IKEYE YESU WAKU NAZALETA, MWENE WA BA YUNDA. ²⁰ Babangi ba Yunda batandele echi chimwetho mwafwa kuje kumutambela bashukikile Yesu kwakele kuyehi na Nganda. Cho chimwetho chije bachisonekele mu chi Hebelu, muchi Latini, na muchi Ngiliki. ²¹ Cho tupilisitu ba bakulunu baba Yunda bendekele kuli Pilato ngwabo, "Kethi usoneke ngwabo, 'Mwene waba Yunda,' oloni soneka ngwabo, 'Ou umo nendeka, "Nji Mwene waba Yunda.""' ²² Pilato wakumbulwile ngwendi, "Echi njasoneka njachisoneka kunahu." ²³ Omo maswalele bashukikile Yesu, bambatele buthalo bwendi, babu pangele hawana, umo na umo wambateleho chimo; bambatele lalo mukanjo. Oloni uje mukanjo kuwakele nakusholoka sholoka, chakele nabutongo bumolika kutunda kwilu. ²⁴ Cho bendekele kuli umo na mukwabo, "Kethi tuchitabule, oloni tuteni ngela tumone iya achambata." Echi chalingiwile mngana bisoneka bipwe bya kushulithiwa ebi byendeka ngwabo, "Banalipangethela buthzalo bwange hakati kabo cho batele ngela ha mukanjo wange." Ebi bikebyo balingile mashwalale. ²⁵ Oloni kuyehi nachilindakano cha Yesu kwemanene baina, bandokathzi yabaina, Maliya munakathzi wa Kolopase, na Maliya Mangandalena. ²⁶ Omo Yesu wamwene baina na uje ndongethi yathemene manene banemana kuyehi, wendekele kuli baina ngwendi, "Obe munakathzi, kenga, munobe!" ²⁷ Cho wendekele lalo kuli uje ndongethi ngwendi, "Kenga, banyoko!" Cho kutunda ha thimbu ije uje ndongethi wamutwalele ku njubo yendi. ²⁸ Hanima yechi, nakuthzubuka ngwe byuma byoshe binahu cho mangana bisoneka bishulithiwe, Yesu wendekele ngwendi, "Njili na lihwila." ²⁹ Kwakele chitenga chakushula na binyu byakungangamena, cho babwitilile mupelo mu binyu bawakele ku munango wa hisope cho baujundwile naku waka kukanwa kendi. ³⁰ Omo Yesu wanwile bije binyu byakungangamena, wendekele ngwendi, "Kunahu." Cho wakulamene mutwe wendi nakwecha kumwonyo. ³¹ Cho ba Yunda, mwafwa lyakele litangwa lya kulibwayethela, cho kubashakele mibila ikale ha bilindakano halitangwa lya Sabata (mwafwa litangwa lya Sabata linapwile lya kulimanena mukulema), cho behwile Pilato abatabethe kupokola mendi na kuba tundithaho. ³² Cho mashwalale bethzile nakupokola mendi a munalume uje wakulibanga na mendi amukwabo uje wamuchibali baje baba shukikile hamo na Yesu. ³³ Oloni omo bethzile kuli Yesu, bamwene ngwabo nathsi laja, ngechi kubamupokwele mendi endi. ³⁴ Oloni, umo wabaje ma swalale watibile Yesu likunga ku bimati, haje bene maninga na mema byatundile. ³⁵ Umo uje wamwene echi wambulwile, cho kwambulula kwendi kwabuthunga. wathubukile ngwabo nendekele buthunga managana neni lalo mukulahele. ³⁶ Ebi byoshe byuma byalingiwile ngechi mangana bisoneka bipwe byakushulithiwa, "Kukwethi buthsiya byendi bimo bikakapokokako." ³⁷ Cho lalo, bisone bikwabo byendeka ngwabo, "Bakakenga kuli ikeye ou batibile likunga." ³⁸ Munima ya byuma ebi, Yosefa waku Alamatiya, omwo wapwile ndogethi ya Yesu (oloni mukubanda hamulonga wa lyoba lya ba Yunda), wehwile Pilato nga atha kwambata mubila wa Yesu. Pilato wamutabethele. Ngechi Yosefa wethzile nakwambata mubila wa Yesu. ³⁹ Nikondema lalo wethzile, uje hakulibanga waile kuli Yesu buthsiki. Wanenele n'undu ya kukumbathsana namila na malimangango, akupwa kuchita chimo. ⁴⁰ Cho bambatele mubila wa Yesu bauthzengele ha binanga bya lingu ebi byakele nabweko bwabubwa, ngwe omu mwaya chithemwa chaba Yunda ngwe omu mubaka thindila mibila. ⁴¹ Cho kumutambela kuje kubashukikile Yesu kwakele chitungu; cho muje chitungu mwakele mbumbo yahihya muje kanda bathsindemo laja munu. ⁴² Mwafwa lyakele litangwa lyakulibwayethela cha ba Yunda cho nawa ije mbumbo yakele kuyehi, balangekelemo Yesu.