¹ Penka kuli Mose kwalishile abana abanakashi abakwa Zelofeada umwana mwalalume uwakwa Efa umwana umwalalume uwakwa Gilida umwana mwalalume uwakwa Manase, uwa mu kikota kyakwa Manase umwana mwalalume uwaka Yosefi. Aya eali mashina abana bakwe abanakashi: Mala, Nowa, Ogula, Muka, na Telesa. ² Balimakene kuli Mose, Elaeza umupapatilishi, intungulushi, na kukimasamasa kyonse kumulyango wa kwi tente iye bungano. Balilabile ati, ³ ''Bawishifwe balifwilile mukiselebwa. Tabali pamo nabalya ubalufyenye kuli ba Yawe mwibumba lyakwe Kola. Balifwile abene pamulandu wakulufyanya kwabo abene, kabili tabakwetepo abana abalalume. ⁴ Mba nindo ishina lya bawishifwe linga fumishiwapo ukufuma mu bantu ba mukikota kyabo pamulandu wakwebati tabafyelepo umwana mwalalume? Tupeni impanga mubalongo babo na ba Tata.'' ⁵ Kabili Mose naye aliletele uyu mulandu kuli ba Yawe. ⁶ Ba Yawe balilabile kuli Mose ati, ⁷ ''Abana bakwe Zelofiadi bakolabila fishinka. Ufwile ikine kine ubapele mpanga ibe bupyani mukati kabalongo baba wishibo, kabili umone ukwebati ubupyani bwa bawishibo bwatentulukila na pa bana. ⁸ Ufwile ukulabila ku bantu bakwe Isuleli ati, 'Kani umwalalume afwa ukwakubulo kufyalapo umwana mwalalume, penka mukaleke ubupyani bwakwe bukatentulukile pa bana bakwe abanakashi. ⁹ Kani takwetepo abana abanakashi, penka mukapele ubupyani ku ba kwabo. ¹⁰ Kani takwete abakwabo, penka mukapele ifya bupyani fyakwe ku bakwabo na ba wishabo. ¹¹ Kani ba wishi tabakwete abakwabo, penka mukapele ifya bupyani bwakwe ku balongo bakwe aba mukikota kyakwe, kabili naye akapinta bukaba bwakwe. Ili likaba lifunde ili kalikilwe ku mukambisho kubantu bakwa Isuleli, koti fyopelefyo ba Yawe bankambisha.''' ¹² Ba Yawe balilabile kuli Mose ati, ''kabiye uninse kulyulu lupili lwa Abalimu kabili umone impanga iyo napela abantu bakwe Isuleli. ¹³ Panuma wakimona, webo, pamo, ufwile ukukolonganikwa pamo na bantu bobe, koti Aloni umukwanu. ¹⁴ Kino kili nokukichikwa pantu na mwebo babili mwali pondokelile umukambisho wangi mu kiselebwa kya Zini. Kulya, ilyo amenshi apomokele ukufuma mwibwe, mubukali bobe walifililwe ukunkinjika nemo na bu mushilo pa menso akimasamasa kyonse.'' Aya e menshi aku Meliba uwa ku Kadeshi mu kiselebwa kya Zini. ¹⁵ Penka Mose alilabile kuli ba Yawe nokulabila ati, ¹⁶ ''Kuti mwebo, ba Yawe, mwe Lesa wa mipashi sha bantu bonse, musale umuntu umwalalume akomona pa kimasamasa, ¹⁷ Umuntu ukatangilako pakufuma na pakwingila kabili kaluku batangilila pakufuma napakwingila, pakwebati ikimasamasa kyenu kikaba koti nimbelele ishi tashikwete kembela.'' ¹⁸ Ba Yawe balilabile kuli Mose ati, ''Bula Yoshua umwana umwalalume uukwa Nuni, umwalalume emo umupashi wangi wikala, nokumu tenteka ukuboko kobe pali ye. ¹⁹ Mulete kuli Elaeza umupapatilishi na kukimasamasa kyonse, kabili umukambishe pa menso abo ukubatungulula. ²⁰ Ubika amakosa amo pali ye, pakweba ati ikimasamasa kyonse ikya bantu bakwe Isuleli kimunakile. ²¹ Akaya kuli Elaeza umupapatilishi mukufwaya ubufwayo bwangi mu milanguluko yakwa Ulimu. Kikaba kumukambisho wakwe ukwebati abantu bakafuma no kwingila, bonse ye na bantu bonse aba Isuleli pamo nakwe, ikimasamasa kyonse.'' ²² Kashi Mose alikichile fyenkefyo ba Yawe bamukambishe. Alimupinchile Yoshiwa nokumuleta kuli Elaeza umupapatilishi na ku kimasamasa kyonse. ²³ Alimutentekee amaboko akwe pali ye nokumukambisha ukutungulula. koti nifyo ba Yawe bamukambishe ukukita.