¹ Kabili Kola umwana wakwa Izha umwana wakwa Kohati umwana wakwa Lefi, pamo na Dafani na Abilam abana bakwa Eliab, kabili Oni umwana wakwa Peleti, aba mukikota kyakwa Lubeni, bali kolonganikilepo abalalume bamo. ² Bali mwimine Mose, pamo na balalume bambi ukufuma mu bantu bakwe Isilaeli, 250 intungulushi sha mukimasamasa ishaishi banikilwe sana pamo kwati bantu ba mukimasamasa. ³ Bali bungene abene bonse pamo mu kukukatasha Mose na Aloni. Bali labile kulibo, ''Mwaya patali! Ikimasamasa kyonse kyabikwa pa mbali, bushimwa bushimwa, kabili ba Yawe bali pakachi kabo. Nindo mwalisuntwila mwebene paulu ukukila ikimasamasa kya ba Yawe?'' ⁴ Ilyo Mose aumfwile fyo, alifuneme. ⁵ Alilabile kuli kola nakuli bonse aba ali nabo, '' Mumpindi iya lukelo ba Yawe bakatwishiisha kani nibanyi abali kulubali lwabo kabili naba swetelele. Bakamupalamika ulya muntu kulibo. Uyo bakasala bakamuleta kipikipi kulibo abene. ⁶ Kite fi, kola ne bumba lyobe lyonse. Kamubula imbabula. ⁷ Mailo mukabikemo umulilo kabili mukatekepo ne finunkila bwino ku menso aba Yawe. Uyo ba Yawe bakasala, uyo muntu akabo uswetelele kuli ba Yawe. Mwaya patali, mwebo mwe bana bakwe Lefi.'' ⁸ Kabili, Mose alilabile kuli Kola, ''pano umfweni, mwe bana bakwa Lefi: ⁹ Kani kintwi kinini kuli mwebo ukumono kwebati Lesa wakwe Isilaeli amifunyako ku kimasamasa kya bena Isilaeli, ukumileta mwebo kipikipi naye umwine, ukupyungapo imilimo mukya kukumaninamo ikya ba Yawe, kabili no kwimakana kwi bumba mukubapyungila? ¹⁰ Bamipalamikeni, na bakwanu bonse, abana bakwa Lefi, pamo na mwebo, Lomba mukofwaisha no bupapatilishi nabo! ¹¹ Kanshi webo ne bumba lyobe lyonse mwakumana mukulilishanya kuli ba Yawe. Kanshi Aloni ninani muko liñwiñwishila?'' ¹² Penka Mose alibechile ba Datani na Abilamu, abana bakwa Eliabu, Lomba bali labile ati, ''Tatwaiseko ko. ¹³ Kani kintwi kinini ikya kwebati watufumya mu kyalo ikiwema umukakana menshi, ukwisa mukutwipaila mukiselebwa? Pano mukofwayo kuba ninwe ntangishi pali fwebo! ¹⁴ Ukulundapo lukoso, tautuletele ku kyalo ikileituluka umuka no buki, nangu ukutupela amabala akulimamo na mabala afisepo koti bupyani. Lomba ulefwayo kututumpaika ne milaye iyabufi? Tatwaiseko kuli webo.'' ¹⁵ Mose alifichilwe ikyakuchi kabili kalabila kuli ba Yawe ati, mwikinjika umulambu wabo. Nshipinchilepo imbongolo nangu imo ukufuma kuli bo, kabili nshisomeshepo nangu umo muli bo.'' ¹⁶ Penka Mose alilabile kuli Kola, ''Mailo webo ne bumba lyobe lyonse mufwile ukuya kuli ba Yawe - webo nabo, kabili na Aloni. ¹⁷ Bonse pa muntu pa muntu mufwile ukupinte mbabula nokubikapo ifinunkile bwino mukati. Penka kila munu afwile ukuleta kuli ba Yawe imbabula yakwe, 250 imbabula. Webo na Aloni, na mwebo, mufwile ukuleta imbabula pa muntu pa muntu.'' ¹⁸ Kanshi umuntu onse alipinchile imbabula yakwe, no kubikapo umulilo, abikapo umulilo, kabili nokwimakana pa mulyango wetente lye bungano pamo na Mose kabili na Aloni. ¹⁹ Kola alikiletele pamo ikimasamasa kyonse kuli Mose na Aloni pa mulyango kwi tente lye bungano, kabili ubuleme buba Yawe bwalimonekele ku kimasamasa kyonse. ²⁰ Penka ba Yawe bali labile kuli Mose na kuli Aloni: ²¹ ''Lifumyeniko mwebene ukufuma kuliki kimasamasa pakwebati mbonaune penka pa.'' ²² Mose na Aloni bali funeme kabili nokulabila ati, ''Lesa, mwe Lesa wa mipashi sha bantu bose, ani umuntu umo abifya, nindo mwingafichilwe kimasamasa kyonse?'' ²³ Ba Yawe bali mwasukile Mose. bali labile ati, ''Labila ku kimasamasa. Labila ati, ²⁴ 'Fumenimo mwitente lya kwa Kola, Datani, kabili na Abilamu.''' ²⁵ Penka Mose alimine kabili nokuya kuli Datani na Abilamu; abakulu ba mu Isilaeli bali mukonkele. ²⁶ Alilabile ku kimasamasa ati, ''pano fumenimo mu matente aaba bantu ababipile kabili tekwi katako ku kintu kyabo ikili kyonse yo-o, anga yo-o mukonaulwa kukubifya kwabo.'' ²⁷ Kanshi ikimasamasa kumbali shonse ishe tente lya kwa Kola, Datani na Abilamu bali fuminemo nokwi makana pa mulyango waku matente abo, na bakashi babo, abana babo abalalume, kabili notwana twabo utunini. ²⁸ Penka Mose alilabile ati, ''pali ki mukeshiba ati ba Yawe bantuma nemo ukukite nkito shonse, pakuti nshifikichile mukufwaya kwangi. ²⁹ Kani aba bantu bafwa imfwa iyaku lifwila koti fyenka kimoneka lyonse, ninshi ba Yawe tabantumine nemo. ³⁰ Pano kani ba Yawe bapangapo fimo ifya bukumo, kabili umushili washinkuka nokubamina, ne fintu fyonse ifi bakwete, kabili fyaya fyonse ifyumi ku musha ya bantu abafwile, penka mufwile ukwishiba ati aba batu basule ba Yawe.'' ³¹ Panuma lukoso Mose apwisho kulabila aya mashiwi, umushili walishinkukile apali balya bantu. ³² Umushili walishinkukile nokubamina, ifi fyashi fyabo, na bantu bonse aba kwa Kola, kabili ne fintu fyonse ifi bakwete. ³³ Kanshi bo na fyonse ifi bakwete fyalile panshi ifyumi ku mpusha ya bantu abafwile. Umushili ali besalile, kabili balyonaikile ukufuma mukachi ka kimasamasa. ³⁴ Isilaeli onse uwabashingulwike alibutukile ukufuma kukulila kwabo. Bali punjile ati, ''Ikyalo kuchi kya tumina na fwebo pamo!'' ³⁵ Penka umulilo walyakile ukufuma kuli ba Yawe nokonaula abalalumeabali 250 abalambwile ifinunkila bwino. ³⁶ Kabili ba Yawe balilabile kuli Mose noku mweba ati, ³⁷ ''Labila kuli Eliaza umwana mwalalume uwakwa Aloni umupapatilishi kabili ukamuleke akapinte mbabula ukufuma mumulilo, pakuti imbabula shambikilwa pa mbali. Penka umuleke apalanganye amalashaalukwaka apatali. ³⁸ Atole mbabula shababo abalufishe imyeo shabo pamulandu wakulufyanya kwabo. Bakapangemo ifyela ifi papakene ifyakufimba pa kipailo. Balya bantu balifilambwile kuli nemo, kanshi fishilile kuli nemo. Fikaba keshibilo akakubapo kwangi ku bantu bakwe Isilaeli.'' ³⁹ Eliaz umupapatilishi alitolele imbabula shalubemba isho balebomfya kubalalume abaokelwe pa kipailo, ⁴⁰ Kikabe kya kwanukilako ku bantu bakwe Isilaeli, pakwebati abena fyalo aba tabali bana abakufuma kuli Aloni baisa mukokya ifinunkila bwino kuli ba Yawe, pakwebati nabo beekesa kubakwati ni Kola ne bumba lyakwe - kwati fyenka ba Yawe bakambishe ukupichila muli Mose. ⁴¹ Lomba ulukelo ulwakonkelepo ikimasamasa kyonse ikya bantu bakwe Isilaeli kyalililishenye kuli Mose na Aloni. Bali labile ati, ''Waipaya abantu ba ba Yawe.'' ⁴² Penka kyali monekele, ilyo ikimasamasa kyabungene pa mulandu wakwa Mose na Aloni, bali kebele lubali lwetente lye bungano kabili, moneni, ikumbi lyale fimbapo. Ubuleme bwa ba Yawe bwali monekele, ⁴³ Kabili Mose na Aloni balishile kuntanshi ye tente lye bungano. ⁴⁴ Penka ba Yawe bali labile kuli Mose ati, ⁴⁵ ''Kabiyeni fumeniko kuntanshi yaiki kimasamasa pakwebati mbo naule penka pa lukoso.'' Penka Mose na Aloni balifuneme. ⁴⁶ Mose alilabile kuli Aloni ati, ''Tola mbabula, bikamo umulilo ukufuma pa kipailo, ubikemo ifyaku futumuna ifinunkila bwino, upinte bwangubwangu nokutwala ku kimasamasa, kabili upange ikya kubafuchilako umulandu, pantu ubukali buleisa ukufuma kuli ba Yawe. Umwalo watampa.'' ⁴⁷ Kanshi ALoni alikichile koti fyenka bamubulile kuli Mose. Alibutukilile mukachi ke bumba. Umwalo alitendekele bwangu ukukumana mukachi ka bantu, kanshi, alibikilemo ifya kufutumuna ifinunkila bwino nokubapangile bantu ikya kubafuchilakwe milandu. ⁴⁸ Aloni alimakene pakachi kabafwile na bomi; muli inshila umwalo walipwile. ⁴⁹ Abo abafwile ku mwalo bali 14,700 mu mpendwa, ukubikapo pamo nababo abafwile mulyashi lakwa Kola. ⁵⁰ Aloni alibwelele kuli Mose pa mulyango wakwi tente lye bungano, kabili no mwalo alipwile.