¹ Kani umuntu kaiba iñgombe nangu mukoko ne kwipaya nangu kushitisha, penka afwile abwesha ne kupana iñgombe isanu pa ñgombe imo nangu imikoko ine pa umo. ² Kani kabwalala basanga akopasula ne kwingila, kabili kani bamupama ne kukufwa kafwa, muli iishila takulipo mulandu wakukuma ku muntu pafwa yakwe. ³ Lomba kani bamusanga akopasula nishi akasuba kafuma, umulandu wakwipayo muntu ukasangwa na ulya muntu uwamwipaya. Kabwalala afwile akabweshe. Kani takwetepo ikili kyonse, penka bakamushitishe pabukabwalala bwakwe. ⁴ Kani inama iiaiba yasanwa iituntulu kuli ena, nangu ni ñgombe, kabalwe, nangu mukoko, afwile akapane fibili pa imo. ⁵ Kani umuntu alishisha fitekwa fyakwe mwibala nangu mwibala ya fisabo ne kuleta inama yakwe kailya mwibala lya mwine, afwile akapane fya kubwesha fikilile mukuwama kufumya mwibala lyakwe kabili na mwibala lya fisabo fyakwe. ⁶ Kani mulilo abuka mupanga ne kukumbana mu myunga ne kulenga ifya kulya fyaseke fya lumbikwa, nangu ifya kulya fyaseke ifimakene ibala fyapya, ulya uwaokele umulilo afwile kyakine akabweshe fintu. ⁷ Kani muntu apela indalama nagu ifipe ku mwina mupalamano wakwe ati bamusungileko bwino, kabili kani aibwamo mulya mañanda ya ulyo muntu, kani kabwalala amoneka, ulya kabwalala afile akapane fibili pa kimo. ⁸ Lomba kani kabwalala tamonekele, penka umwine wa ñanda afwile aisa kutanshi ya bapingushi pa kwebati bamone kana alibikilepo amabokoo akwe pafipe fya mupalamina wakwe. ⁹ Kulupusano lonse pa fintu, kibe ni ñgombe, kabalwe, mukoko, kyakufwala, nangu nikindo ikyaluba iki muntu alabilati, ''Iki kyangi,'' bonse babili abakopechikana bafwile baisa ku bapingushi. Umuntu uobasanga ne mulandu ku bapingushi afwile akabwesha ne kupana kimo pafibili. ¹⁰ Kani umuntu apela ku mupalamina wakwe kabalwe, iñgombe, mukoko, nangu inama iili yonse ati amusungileko, kabili kani kaifwa nangu yamokoka nangu baipita ukwakubulo kumonako, ¹¹ Ukulapa kuli ba Yawe kufwile kwakitwa ku bonse, mukubona kani umo muntu kabikapo amaboko pakipe kya mupalamina wakwe nangu yo-o. Umwine wafipe afwile akipokelela lukoso, kabili umbi takabebweshepo ikili kyonse yo-o. ¹² Lomba kani bamwibila, umo akamubwesheshe umwine wa fintu. ¹³ Kani inama yatabaule fimpifwa fimpifwa, penkapo umuntu akalete inama ilya batabaula ikabe koti kamboni. Tafwile abwesha pakyatabawilwe. ¹⁴ Kani muntu kaashima inama iili yonse ku mwina mupalamina kabili ilya nama yalisomesha nangu yafwa kwakubula ukuba ku mwina yo, ulyo muntu afwile kyakine akaoele ifya kubwesha. ¹⁵ Lomba kani umwine mwina ilya nama ali na shena, eli umbi umuntu tafwile apela ifya kubwesha yo-o; kani inama yalyashiminwe pa ndalama, ikapelwa kukonka ne mutengo uwayo uyo ba mwashimishishe. ¹⁶ Kani umwalalume aikata umwanakashi wa kisungu uutaambishe, kabili kana alala nakwe, afwile kyakine kine kumupanga ukuba mukashi wakwe ukupichila mu kumulipilila salamo ya kyupo. ¹⁷ Kani wishi wamwana umwanakashi akaninina ukumupela kuli ye, Penka afwile apana isalamo kulingana neya kisungu. ¹⁸ Tamufwile mwaleka indoshi kuba ne bumi. ¹⁹ Uoonse uukalala ne nama afwile kyakine kine akepaiwe. ²⁰ Uo onse ukalambula kuli ka lesa kali konse kufumyako ba Yawe afwile akonaulwe mupwilapo. ²¹ Tamufwile ukukite kibi ku mwina fyalo nangu kumu kyusha yo-o pakuti na mwebo mwali bena fyalo mu kyalo kya Ijipita. ²² Mwika kyusha kitunshi nangu umwanashiwa. ²³ Kani mwa mushupishasana, kabili kani kaita kuli nemo kofwa kulila kwabo. ²⁴ Ubukali bwangi bukabuka, kabili kamwipayeni ne lupanga; abakashi bene bakaba bamukafitushi, kabili ne benu bakaba bakubua bawishibo. ²⁵ Kani mwakongweshe ndalama ku muntu uuli onse wa mu bantu bangi abali muli mwebo abakyulile, tamufwile mwabakoti bakakongwesha kuliye nangu kumupingula ne yakubikapo peulu. ²⁶ Kani mwapoka kyakufwala ku muntu koti kya kwikachilamo, mufwile mwamubweshesha apo kasuba takangengila, ²⁷ Pakuti ekyenka ali nakyo ikya kulifimba; kyakufwala kyakwa kya mubili wakwe. Nga nikindo kimbi iki akuli fimbo mo? Nga kyakwebati alila kuli nemo, nkamufwa, pakuti nemo ji wa nkuumbu. ²⁸ Tamufwile mwantufya, ba Yawe, nangu ukufinga intungulushi ya bantu benu. ²⁹ Tamufwile mwakokola ukupela imilambu yafya kulya fya mufya kusombola kwenu nangu kwamufyo mufina ku fisepo fyenu. Mufwile mwampela abana benu ababeli abalalume. ³⁰ Mufwile mwakita kinga kimo lukoso ne ñgombe shenu kabili ne mikoko. Pashiku isanu na ibili koti shabananginasho, lomba pabushiku bwa busanu na butatu mufwile mwampelasho. ³¹ Mukaba abantu abopatulwile ukuba bangi. Kashi tamufwile mwalya inama iili yonse iibatabaula kunama mwibala yo-o. Mukifulo kyafikyo, mufwile mwaposele mbwa.