¹ Pano ino emikambisho, imishilo iikalikilwe, ne mafunde ifyo ba Yawe ba Lesa wenu bankambishe nemo ukumifundisheni mwebo, pakwebat mulingile ukufisunga mu kyalo umo muleeya bushilya ba Yodani mu kwikalamo; ² pakwebati mukakindike ba Yawe ba Lesa wenu, pakuti ati mukasunge imishilo iikalikilwe yonse kabili ne mikambisho iyo ndemikambisha mwebo - webo, abana bobe abalalume, ne bankana bobe, inshiku shonse isha bumi bwenu, pakwebati inshiku shenu shikatwalilile. ³ Penka umfweni kulibo, mweba Isuleli, ne kufisunga, pakwebati fyengenda bwino na mwebo, pakwebati mukafule ne kufulisha, mu kyalo umwiswile umukaka ne buuki, kwati ba Yawe, ba Lesa babawishinwe, bamilaile mwebo ukukita. ⁴ Umfwa, Isuleli: Ba Yawe ba Lesa wesu bali umo. ⁵ Ukatemwe ba Yawe ba Lesa obe no mutima obe onse, ne mweo obe onse, kabili ne makosa obe onse. ⁶ Ifyebo ifyo ndekukambisha webo lelo fikabe mu mutima obe; ⁷ kabili ukafifundisha makosa ku bana bobe; ukalukupitulukamo ili mukalu kwikala mu nanda yenu, ili mukeenda munshila, ili mukalala panshi, ne lyo mukabuuka. ⁸ Ukafikaka kochi keshibilo pakuboko kobe, kabili fikaba kochi munchinya pa kati ka menso obe. ⁹ Ukafilembe pamapanda aku milyango aa ma nanda enu na pamilyango yobe iikulu. ¹⁰ Ilyo ba Yawe ba Lesa wenu bakamileta mu kyalo ikyo balapile kuli bawishinwe, kuli Abulahamu, kuli Isaki, kabili na kuli Yakobi, ati nkamipeela, ne mishi iikukulu ne iwamishe iyo tamwasompele, ¹¹ kabili ne ma nanda umwiswile imitundu yafintu fyonse ifiweme ifyo tamwapangilepo, imikalo iyo tamwasepele, kabili ne mabala amifaina, kabili ne fichi fyama Olifi ifyo tamwalimbilepo, mukalu kulya ne kwikuta - ¹² kabili kamulukengela pakwebati mwakabalubako ba Yawe, abamifumisheni mukyalo kya Ijipiti, mu nanda ya busha. ¹³ Kamulukukindika ba Yawe ba Lesa wenu; abo mukalukulambila, kabili mukalukulapa peshina lyabo. ¹⁴ Tamwakakonkele ba Lesa bambi, ba Lesa ba bantu abo bonse mwikele nabo - ¹⁵ pakuti ba Yawe ba Lesa wenu mukachi kenu bali ni ba Lesa ba bukwa - ngamwakite ki, ubukali bwa ba Yawe ba Lesa wenu bukababukileni mwebo kabili bakamyo naula ne kumifumya pa kyalo kya panshi. ¹⁶ Tamwakabeshe ba Yawe ba Lesa wenu koti nifyo mwabeseshe ku Massa. ¹⁷ Mukalu kuposeshako amano ukusunga imikambisho yaba Yawe ba Lesa wenu, imishilo iine ine, kabili ne mafunde aekalikilwe, ayo bamukambishe mwebo. ¹⁸ Mukalukukita ifilungeme ne fiweme ku menso aba Yawe, pakwebati fyengeba bwino na mwebo, kabili ati mwenge ngilamo ne kwikala mu kyalo ikiweme ikyo ba Yawe balapile kuli ba wishinweni, ¹⁹ ukubafumyamo bonse abalwani benu pantanshi yenu, koti kulabila kwa ba Yawe. ²⁰ Kani umwana obe umwalalume aipusha ifyakuntanshi, ukwebati, 'Nga kulayana kwa mafunde, imishilo iikalikilwe, kabili na ambi amafunde ao ba Yawe ba Lesa wenu bamukambisheni nifindo? ²¹ elo ukalabila ku mwana obe umwalalume ati, 'Twali basha bakwa falao mu Ijipiti; Ba Yawe balitufumishe mu Ijipiti ne kuboko kwa makosa, ²² Kabili balilangishe ifishibilo ne fyakukumya, ifikulu ne fikateshe, pali Ijipiti, pali Falao, na ponse pananda yakwe, pa menso esu; ²³ Kabili ne kutufumya fwebo mulya, pakwebati bengatuletamo, mukutupela ikyalo ikyo balapile kuli ba wishifwe. ²⁴ Ba Yawe balitukambishe fwebo lyonse ukulu ku sunga ii mishilo ikalikilwe yonse, ukubachina ba Yawe ba Lesa wesu pafya kuwama fyesu, pakwebati bengatu sunga abomi, koti nifyo tuli lelo. ²⁵ Kani twasunga ii yonse imikambisho pa menso aba Yawe ba Lesa wesu fyenka batukambishe fwebo, kino kikaba kololoka kwesu.'