¹ kuti muku zwiisa ineo zaako[kwaako] ha kati ka vantu saanzi va zivoni: Ka kuti keeti nno uve nne ituwero kuzwa kwe iso yo wiina ku iwulu. ² Choku va vulyo lyinu choo zwiisa ineo zaako, siye kulyiza intorombita mukati ka vantu, siina vaitimukanyi muva chitira mu itempere zaavo mane nne mu mazira, kuti va woolye ku teembwa nne vantu, cho vusakusima nni mulwiirite, ituwero yaavo veena kalye naayo. ³ Mmi lyinu choo zwiisa ineo, chite kuti iyaanza lyaako lya mamonso saanzi lyi izivi lya malyo zilyi chita: ⁴ Ku chitira kuti ineo zaako zive mu chipirii: hape nne kuti iso yoo vona mu chipirii iiye aku ruwere mu menso a vantu. ⁵ Hape mane choo rapera, saanzi u chiti mane iiri nje vaitimukanyi muva chita: Ka kuti va saka ku rapera nniva ziimeene mu itempere mane nne mu mahondananzira kuti va vonwe nne vantu. Aho nni mulwiirite ituwero yaavo veena naayo. ⁶ Mmi uunwe, chimu rapera, mu injire mu inzuvo, choku iyala kwa teni, mu rapere Ireeza yo wiina mu chipirii; mmi isheenu yoo vona mu chipirii kaa muitave mu menso a vantu. ⁷ Mmi chimu rapera, mu siye ku valavala zintu zi seena musula, siina vaheedani muva chita: Ka kuti va nahana kuti muva zuwiiwa muku valavala a hulu kwaavo. ⁸ Lyinu aho, mu siye ku swaana naavo, mukuti isheenu wiizi zintu zi musaka nne mu seni ku mu kumbira. ⁹ Lyinu mu rapere vuti: taayo yo wiina kwii iwulo,izina lyako lyi teembwa. ¹⁰ Muvuso waako wi ize. Ku suna kwaako ku pangahalye mu inkaanda, siina muku pangahala ku iwulu. ¹¹ Mu tuhe sunu zilyo zeetu ze izuva nne izuva. ¹² Tu woondere zivi zeetu, sena naaswe ha tu woodera va tu pangira vu vilala. ¹³ Mane mu siye ku tu twaala mu ku panga vuvi, mmi mu tu hululye mu vuvi.' ¹⁴ Mu kuti ho woodera vantu vu vilala vwavo, iiso yo wiina ku iwulu nnaaye ka a ku woondere. ¹⁵ Mmi haiva nno u sa va woonderi mafosisa aavo, nne iiso yo wiina ku iwulu nnaaye keeti cho u ku woondera mafosisa aako. ¹⁶ He iwulu lyaaho, chi mulyi nyima zilyo, mu siye ku va nne zifatehu zi zuwire vutuku iiri vaitimukanyi mu va chita, mukuti valyi zuwisa vutuku mu zifatehu zaavo kuti va vooneke ku vantu kuti va kwete valyi nyima zilyo. Cho vusakusima nni mulwiira, chi va va tambulyi ituwero zaavo. ¹⁷ Mmi unwe, chi mulyi nyima zilyo, mulyi singe mafuta mu mutwi choku samba ku zifatehu zeenu. ¹⁸ Kuti mu siye ku voneeka ku vantu ha mulyi nyimite zo kulyia, mmi mbwiita ive vulyo kwe Isheenu yo wiina mu chipirii. Mmi Isheenu yo vona mu chipirii, ka a mu ruwere. ¹⁹ Mu siye kulyi kunganyeza vuhumi mu inkaanda, kwiina mafulapeepe nne muwutera, mane nne vasa kuva tulula choku yiva. ²⁰ Mweendi, mu viike vuhumi vweenu ku iwulu, uuko ku seeti chiku sinywa nne mafulapeepe nnaangati muwutera, hape ku seeti chiku injira vasa kuti va pwachulye choku yiva. ²¹ Ka kuti uuko kwiina vuhumi vwaako, kwa teni ko uuko uuko nne inkulo yaako nnaayo nkweeti nniyi kwiina nnaayo. ²² Lyiinso nje ilaambi lyo muviri. Chiingi lyiinu haiva lyiinso lyaako nni lyi shiyeeme, muviri woonse wu izula iseri. ²³ Mmi lyiinu haiva lyiinso lyaako nni lyi fwiire, muviri waako woonse wu izula keiirima. Mmi lyiinu haiva, mweendi iseri lyiina mwaako toota nni lyilyi keiirima, keiirima ka teni muka ku veere ka kaando ku sika hayi! ²⁴ Ka kwiina yo u woola ku teendera vasimwiine voovere, mmi mbwiita a toye wumwiina ku zwaaho choku suna wumwiina, kamba kaa voneke kulyi nneerera zumwe ku zwaaho choku tokolomoha zumwe. Keeti chimu teendera Ireeza nne vuhumi kumwiina. ²⁵ Lyiinu mpaaha chiingi nni mucho kuti mu siye kuva ku vireeraanga cho vuhalo vweenu, kuti ka mulyie inzi kamba kuti kamu nywe inzi-- kamba kaha muviri, cheeti nni mu zwaate. Ka kuti aa vuhalo ka vu zaambi zilyio, mane nne muviri ku zaamba zizwaato? ²⁶ Mu lolye zizuni mu iwulu. Kazi lyimi nnaangati ku siinza kamba ku viika mu zishete, mmi Isheenu siku iwulu uzi lyiisika. A mmi uunwe ka heena muvo vutokwa a hulu maaswe kuzi zaamba? ²⁷ Mmi njeeni weenu iiye yo u chita kuti muku vireera kwaakwe choku woola kulyi weera vuhalo kaniinizana vulyo? ²⁸ Mmi lyiinu chiinzi ha mu vireera che zizwaato? Mu zeeze che vantuundungala mu inkaanda, mu va kula. Ka va teendi, mane ka va cheencha zizwaato. ²⁹ Mane nnisi mucho kuti, nnaangati Solomoni mu ku vereenga kwaakwe ka heena a vaalyi ku zwaataanga mane iiri nje izo izi. ³⁰ Haiva Ireeza u woola ku zwaatika lyaani mu inkaanda, lyiva kwa teni suunu ku zwaaho izona choku soherwa mu imbawula, kana lyiinu uunwe a keeti nna mu zwaatike choku zaambiriza, uunwe ve itumero iniinizana? ³¹ Chiingi lyiinu mu siye kuva ku vireera nni mucho kuti, Ka tulyie inzi?' kamba, Ka tunywe inzi?, kamba, Mane ka tuve nne zizwaato zo ku zwaata?' ³² Ka kuti ve inkaanda va ghana iizi zintu, mane nne Isheenu siku iwulu nnaaye wiizi kuti musakana nnaazo. ³³ Mmi lwe intaanzi piri musake muvuso waakwe nne kujolola kwaakwe ku zwaaho iizi zintu zoonse njeeti nni muzi heewa. ³⁴ Chiingi, mu siye kuva ku vireera chelye izona, lye izona kalyi lyi vireereerere iilyo lyiine. Lyimwe nne lyimwe izuva lyiina vuvilaala vwaalyo vulyi lyikeene.