¹ Lyinu Jeeso njaa hindwa ne luhuho lu jolola choku mu twaala ku chikwa kuti aka lyikiiwa nne Saatani. ² Mmi chinga alyi nyima zilyio mazuva eena makumi oonne ne masiku eena makumi oonne, nja [choku] fwa inzala ku zwaaho ³ Mmi siku lyika chiinga eeza kwaalyi, nnaati, Haiva u mwaana wee IREEZA lawulye kuti a a mavwe a saanduke masikono [kamba zilyio]. ⁴ Mmi nneetava nnaati, Ku ngolyetwa, muntu kaati nnaa hala che chilyio vulyo, wiina ne kuhala ne che lyinzwi lyimwe ne lyimwe lyi zwa mu kalomo ke IREEZA. ⁵ Lyinu Javulusi nnaa mu hiindira ku iwulu lyo muzi u jolola, choku ka muviika kuka tungani, ⁶ Choku mucho kuti, Haiva kuti uuwe u mwaana we IREEZA, lyi wiisikiza haansi: ka kuti ku ngolyetwa, kaaku lawiire mangiloyi aakwe: kaaku kambulye cha maanza ao, kuchita kuti nnaangati che inako yihi iteende lyaako saanzi nni lyilyi ghumi ku ivwe. ⁷ Jeeso nnaa muta kuti, ku ngolyetwa hape, Saanzi u lyiki simwiine IREEZA waako. ⁸ Hape Javulusi nnaa muhiindira ku iruundu ilyelyelye, choku mutondeza mivuso yoonse ye inkaanda, nne vulotu vwaayo; ⁹ Hape choku mucho, muni kuhe zintu zonse iizi, chiwa nni fukamina choku nni kumbiira[rapera]. ¹⁰ Lyinu Jeeso nnaa muti, Zwaaha Saatani: ka kuti ku ngolyetwa, Kumbiire[Rapere] simwiine IREEZA waako vulyo yeeyeenna, mane teendere iiye vulyo chipeto. ¹¹ Mpaaha haa musiya Saatani, mmi vone, mangiloyi nni eeza kwaalyi nni a waamba naaye. ¹² Mmi lyinu Jeeso chinga zuwa kuti Johani u woondetwa wiina mu intorongo, avaalyi yeenderi kwa Ghalaliya; ¹³ Mmi choozwa kwa Nazareta, nna yeenda choku kee kala kwa Kaperanama, iina ne ikomwe lye irizo, ku inyiinza ye inkaanda za Zavulona nne Naavutalyi: ¹⁴ Ku chitira kuti ku izuzirizwe chi vaati nni chaa waambwa nne muporofita Isaya, nnaati, ¹⁵ Inkaanda ya Zavulona nne Naavutalyi, che inzira yee iwate, ku vusu vwa Jorodani, Ghalaliya wa veinkaanda; ¹⁶ Vantu va vee keere mukeerima va vaa voni iseri ikaando; mane naavo va vee keere mu munzunde nne chivaka cho lufu, iseri lyi vaa voneki kwa teni. ¹⁷ Ku zwa cheeyo inako Jeeso nnaa tanga ku kutaza, mmi nnaati, lyi nyaanse: ka kuti muvuso wee IREEZA wiina ha fwihi. ¹⁸ Hape Jeeso, nnaa yeenda che iwate lya Ghalaliya, choku vona valombwaana voo vere, Sayimoni nne Piita, nne Enduru mwaanche, nniva teya kanyandi mu iwate: ka kuti va vaalyi vandwiiyi. ¹⁹ Mmi choku vacho kuti muni ichirire, mane kani mupange vayaambi va vantu. ²⁰ Hoohwaaho vulyo nni vaa siya tunyaandi twaavo, choku mu ichirira. ²¹ Chiva zwaaho, choku vona valombwaana voovere, Jemusi mwaana wa Zevede, nne Johani mukulwe, mu vwaato nni veena nne ishaavo Zevede, nniva wonga tunyandi twavo; mmi nnaava sumpa. ²² Mmi choku hweera nni vaazwa mu vwaato choku siya nne ishaavo, mane choku mu ichirira. ²³ Mmi Jeeso nnaa yeendenda mwa Ghalaliya yonse, nnaaya vu kutaza mu mazuvo avo e ituto, nnaaya vu kutaza maanzwi o muvuso, nne ku hoza ku lwaala konse nne matuku onse mu vantu. ²⁴ Ku iziveeka kwaakwe nni kwa ka sika nni kwa Siriya yonse: mmi niva kamu lyeetera vantu vonse choku lwaala kwaavo kwa matuku a saa swani nne ku katazeha, mane naavo vava kateezwa madimona choku venjira, mane naavo va vaalyi ku lwaala ingana[italuhanyo] nne voku kosoka; a vaa vahoza vonse. ²⁵ Mmi kookooko nne chirirwa vantu vaangi va zwa kwa Ghalaliya, nne kwa Dekapolyisa, mane nne kwa Jerusalema, nne kwa Judiya, mane nne kuka zaamba Jorodani.